Śpiecsłužba farmuje novyja padraździaleńni na akupavanych terytoryjach. Vajennyja kontrraźviedčyki patrebnyja nie tolki «ŁNR» i «DNR», ale taksama ŭ akupavanych častkach Chiersonskaj, Zaparožskaj i Charkaŭskaj abłaściach.
Pryčym na ŭsich uzroŭniach: ad pamočnikaŭ dziažurnaha kamiendanta da apieratyŭnikaŭ i kiraŭnikoŭ siaredniaha źviana.
️Achvotnych jechać na zachoplenyja terytoryi zanadta mała. U pieršuju čarhu imknucca zavierbavać tych, pad kim chistajecca kresła — pahražaje zvalnieńnie, papiaredžany ab niapoŭnaj słužbovaj adpaviednaści. Adździeły kadraŭ aktyŭna abzvońvajuć i byłych supracoŭnikaŭ, zvolnienych pa dyskredytujučych padstavach.
Usio heta nie prynosić vialikich vynikaŭ. «Z 200 čałaviek, jakich abtelefanavali, tolki troje skazali, što padumajuć. I heta niahledziačy na abiacańni vielizarnych vypłat i lhot», — kaža krynica «MO».
Apieratyŭnikam abiacajuć dadatkovyja lhoty i zarpłaty ad 450 da 600 tysiač rubloŭ na miesiac (19000—26000 biełaruskich), heta ŭ 6-8 razoŭ vyšej za zvyčajnyja ŭ śpiecsłužbie. I ŭ razy bolš, čym vajavaŭ kantraktnikam (150-300 tys. rasijskich). Ale i heta nie dapamahaje. Čekisty šukajuć sposaby ŭchilicca ad ukrainskaj kamandziroŭki.
«Mnohija «kuplajuć zdaroŭje». Patrebnaja daviedka ź viedamasnaj palikliniki kaštuje 300-400 tysiač rasijskich rubloŭ (13000—16000 biełaruskich). Mnohija prynosiać daviedki, što nieabchodny dohlad blizkich. Zrazumieła, što heta padstavy, ale z takimi daviedkami jurydyčna nichto nie moža ich adpravić. Akramia taho, načalstva baicca chvali niezadavolenaści i sudovych ciažbaŭ», — kaža surazmoŭca «MO».
U niezadavolenaści jość całkam kankretnyja pryčyny: ludzi ŭžo vymatanyja, usie padraździaleńni słužby, u tym liku techničnyja, znachodzicca «va ŭzmacnieńni» ŭžo 5 miesiacaŭ, adpačynki admienienyja.
Ale ŭnutranaja słužba biaśpieki ŭvažliva sočyć za nastrojami siarod čekistaŭ. «Paśla pačatku vajny raspracavali zahady, usich pad rośpis aznajomili. Pry najmienšych vykazvańniach suprać śpiecapieracyi, pravodziacca prafiłaktyčnyja hutarki. Jość pakazalnyja ratacyi ŭ Anadyr i na Daloki Uschod, z adznakaj u asabistaj spravie», — kaža supracoŭnik FSB.
Infarmacyju pra kadravy hoład u śpiecsłužbie paćviardžaje i ŭniesieny samoj FSB prajekt ukaza, jaki dazvolić zaklučać kantrakty z hramadzianami ź siaredniaj śpiecyjalnaj adukacyjaj (a nie vyšejšaj, jak patrabavałasia raniej), jakija nie majuć vopytu terminovaj słužby.
«Tut nie prosta hoład. Supracoŭniki pačkami pišuć raparty na zvalnieńnie. Adnak ź sistemy možna syści ci napierad nahami, albo z šlejfam kryminalnaha pieraśledu», — narakaje surazmoŭca «MO».
