Fota: dac.by
Doŭhal rodam z Rasii, jon były vajenny lotčyk, major zapasu. U Biełarusi žyŭ nie mienš za 20 hadoŭ — zavioŭ tut siamju, dobra staviŭsia da krainy i navat zapaminaŭ niekatoryja biełaruskija słovy. Apošnija hadoŭ dziesiać jon dapamahaŭ pacyjentam biełaruskich psichanieŭrałahičnych internataŭ (PNI).
Supracoŭnica fonda Maryja (imia źmienienaje), ź jakoj my pahutaryli, raspaviadaje, što paznajomiłasia z Doŭhalem prykładna ŭ 2013 hodzie. Tady jana łaviła paputku, i la jaje spyniŭsia Siarhiej Doŭhal, jaki jechaŭ z adnaho ź internataŭ. Jon padvioz dziaŭčynu da Maładziečna i raskazaŭ joj u darozie pra dapamohu internatam — na toj čas jon rabiŭ heta praz zasnavanaje im pry pravasłaŭnaj carkvie bractva.
Paźniej Maryja zhubiła kantakt Doŭhala, ale praz paru hadoŭ, jak jana raskazvaje, joj zachaciełasia zaniacca čymści sapraŭdy vartym i dobrym. Maryja ŭspomniła pra Siarhieja i praz ahulnych znajomych znoŭ vyjšła na jaho, z taho času jana i pracuje ŭ inicyjatyvie.
Va ŭstanovach, jakimi zajmaŭsia Siarhiej, žyvuć paŭnahadovyja ludzi z chraničnymi psichičnymi zachvorvańniami, jakija atrymlivajuć tam pastajanny dohlad. Usiaho takich ustanoŭ u Doŭhala było 10, usie znachodzilisia ŭ Minsku i Minskaj vobłaści. Zbolšaha heta byli psichanieŭrałahičnyja internaty, ale taksama i dziciačy dom, i dom sastarełych.
Fota: church.by
Spačatku Siarhiej i jaho kamanda pracavali jak pravasłaŭnaje bractva, ale paźniej atrymali jurydyčny status i zarehistravalisia jak dabračynny fond «Śpiras». U pajezdki pa internatach Doŭhal časta braŭ z saboj śviataroŭ, sadziejničaŭ tamu, kab pry adnym ź internataŭ pabudavali chram, ale pry hetym siarod vałancioraŭ fondu jość ludzi roznych kanfiesij, i pry dapamozie fond nikoli nie hladzieŭ na toje, da jakoj kanfiesii naležać ich padapiečnyja.
«Jon pryjazdžaŭ u internaty ź siabroŭskimi vizitami, nie pavodziŭ siabie jak čałaviek, jaki płača nad invalidami ci škaduje ich. Jon čytaŭ im knihi, hutaryŭ, moh prosta vysłuchać ich i abniać. Dla jaho ŭsio pačałosia mienavita ź siabroŭstva z padapiečnymi, i Siarhiej nikoli nie hladzieŭ na ich jak na invalidaŭ, jak na ludziej, jakich treba škadavać. U dziesiaci internatach, jakimi my zajmajemsia, žyvie kala dvuch tysiač čałaviek», — raskazvaje Maryja.
Doŭhal vyrašyŭ skancentravać svaju dapamohu na darosłych internatach. Jak tłumačyć Maryja, dzieciam taksama patrebnaja dapamoha, ale ž darosłym internatam jaje dastajecca ŭ razy mienš.
Kali vałanciory znachodzili čas naviedać niejki internat, źbirali z ułasnych biudžetaŭ hrošy na toje, kab pryvieźci padapiečnym niešta sałodkaje, ci piakli pirahi. Časam Doŭhal znachodziŭ dla fondu niejkich miecenataŭ, i tady atrymoŭvałasia, naprykład, niešta adramantavać u internatach ci nabyć tudy techniku, ale ž u asnoŭnym kamanda spraŭlałasia ŭłasnymi siłami.
«Jon ich mocna lubiŭ, i jany jamu adkazvali tym ža. Jak jany jaho čakajuć! Chłopcy ź internataŭ mahli vybiehčy da jaho pad daždžom i ŭ kašulach naroschryst, kali tolki bačyli jaho mašynu. Abdymali, płakali, kazali «dziakuj Bohu, što ty pryjechaŭ», — zhadvaje Maryja pajezdki z fondam.
Doŭhal maryŭ pabudavać dla padapiečnych dom, kudy jany mahli b pryjazdžać na niejki čas ź internataŭ. Tam im dali b mahčymaść pad nahladam vychavalnikaŭ vučycca samastojnaści i kłopatu pra siabie, i dla hetaha doma ŭžo byŭ vybrany nadzieł ziamli. Taksama lotčyk šukaŭ mahčymaści adnaŭlać dziejazdolnaść padapiečnym internataŭ, ale ž praca heta duža składanaja, i dla jaje treba šmat hrošaj — stolki, kolki ŭ fondu nie było.
Akramia vizitaŭ u internaty, Siarhiej ładziŭ dla padapiečnych kancerty ź biełaruskimi pop-zorkami. Pakul byŭ žyvy śpiavak Alaksandr Cichanovič, jon pastajanna braŭ u ich udzieł. Mienavita dačka śpievaka, Anastasija Cichanovič, i paviedamiła ŭ fejsbuku pra toje, što lotčyk zahinuŭ.
«My adnaznačna budziem praciahvać dapamahać, ciapier my nie majem prava zahubić hetuju spravu. Siarhiej na samoj spravie vielmi šmat zrabiŭ, u jaho było mocnaje ŭnutranaje śviatło, i jon umieŭ natchniać ludziej na dobryja spravy. Zaraz mnie pišuć i pišuć ludzi, navat nieznajomyja, i kažuć, što my pavinny praciahvać pracu. Viadoma, my budziem dapamahać dalej, i ja dumaju, što Siarhiej by hetaha vielmi žadaŭ», — padsumoŭvaje Maryja.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»U Słonimie padčas śviata horada raźbiŭsia aerapłan. Ekipaž zahinuŭ
Stali viadomyja imiony piłotaŭ, jakija zahinuli ŭčora ŭ Słonimie
«Kolki hrošaj pajšło, nie ličyŭ i nie chaču». Były kiraŭnik Tałačyna adzin adnaŭlaje 200-hadovuju kaplicu
