Dzianis Cichanienka. Skrynšot videa
Ideja Nacyjanalnaha savieta — pravieści anłajn-vybary ŭ niejkaha rodu parłamient, jaki, na dumku aŭtaraŭ, daść abranym sapraŭdnuju lehitymnaść, jakoj bolš, pavodle ich mierkavańnia, ni ŭ kaho niama.
Valeryja Capkału možna śmieła ličyć natchnialnikam i hałoŭnym pravadnikom idei hetaj arhanizacyi, sabranaj ź ludziej, jakich abjadnoŭvaje niepryjaznaść da Cichanoŭskaj.
I choć sam Valeryj tam aficyjna nie prysutničaje, jon aktyŭna dziejničaje praz žonku.
Čytajcie taksama: U Nacyjanalny saviet Capkała i Karač uvajšli 17 čałaviek. Chto hetyja ludzi?
Da hetaha choru dniami dadałasia jašče adna fihura — Dzianis Cichanienka. Jaho prezientujuć jak pradstaŭnika niejkaha ruchu «Pachnie čabor» i «Našaj partyi» (pra ich pahavorym nižej).
Videa ź jaho vystupleńniem na adpaviednym jutub-kanale zapościŭ u svaim telehram-kanale Valeryj Capkała.
U svaim vystupleńni Cichanienka ahučvaje nabor tezisaŭ ab nibyta adsutnaści lehitymnaści ŭ Cichanoŭskaj, nierazumieńni pryncypaŭ raboty płatformy «Hołas», nieabchodnaści stvaryć «nieprydumanuju lehitymnaść» šlacham niejkaha anłajn-hałasavańnia.
Padziei 2020-ha, pavodle jaho, ni pra jakuju padtrymku kaho b tam ni było nie havorać.
Mnohija ludzi, jakija ŭpieršyniu dakranulisia da palityki letam 2020-ha, peŭna i nie ŭspomniać, chto taki i čym viadomy Cichanienka.
Nahadajem, što heta za fihura, jakuju dastali ź niabytu.
Varta pačać z taho, što Cichanienka — šmathadovy pamočnik Hanny Kanapackaj. Chto jana takaja i na čyim baku sapraŭdy hulała, stała jasna pazaletaś.
Cichanienka vioŭ jaje sacyjalnyja sietki, padkazvaŭ, jak dziejničać.
Hałoŭnym ich «dasiahnieńniem» ledź nie staŭ razvał apazicyjnaj partyi AHP — kali Kanapackuju pryznačyli ŭ parłamient, Cichanienka pačaŭ razhaniać nieabchodnaść stvareńnia asobnaha ruchu ź joj na čale: «Napierad, Biełaruś!»
Kanapackuju tady abvinavacili ŭ destruktyŭnym sieparatyźmie, a jana pierakinuła strełki na Cichanienku, jakoha z partyi vyklučyli.
«U Cichanienki jość patencyjał da palityki, ale jon čałaviek avanturnaha składu. Jaho siabroŭstva z AHP skončyłasia skandałam. Z partyi jon syšoŭ, padtrymlivaŭ Kanapackuju ŭ momant jaje raskolnickaj dziejnaści. Ustojlivych ideałahičnych pazicyi i pryncypaŭ u hetaha čałavieka niama», — skazaŭ «Našaj Nivie» pra Cichanienku kolišni staršynia AHP Anatol Labiedźka.
Jašče adna zapaminalnaja padzieja z žyćcia Cichanienki — zabałbatańnie studenckaha pratestu suprać źmienaŭ u Zakon ab pryzyvie.
Situacyja była takaja: moładź, niezadavolenaja pryniaćciem papravak, pačała hurtavacca i dzialicca dumkami ŭ telehram-čacie @ProtestBY Chat. Jaki, jak nieŭzabavie vyjaviłasia, byŭ stvorany i administravaŭsia Cichanienkam.
Toj jaŭna nie cikaviŭsia papraŭkami, ale pierakonvaŭ, što dapamahaje studentam, bo jamu nieabyjakavaja tema.
Cichanienka «asiadłaŭ» toj nievialiki pratest pad vyhladam mientara dla ludziej, jakija ŭpieršyniu sutyknulisia z patrebaj vykazać svaju niazhodu i šukali kansultatyŭnaj padtrymki ŭ mietadach dy srodkach. Status pamočnika deputata rabiŭ na ich uražańnie.
Cichanienka dapamoh vypracavać płan pratesnaj aktyŭnaści i zapuściŭ zbor srodkaŭ na jaje finansavańnie — srodki pieraličvalisia na jaho rachunak u sistemie PayPal, pryjšło niedzie 1500 rubloŭ.
Ale samyja aktyŭnyja ŭdzielniki pačali źviartać uvahu, što «ad Cichanienki sychodzić zanadta šmat bałbatni», čas hublajecca, a sama tema ŭvohule sychodzić u bok i padmianiajecca zaklikami Cichanienki padtrymać jaho na vybarach. Bo, maŭlaŭ, sa źmienami ŭ zakon treba zmahacca, majučy zakanadaŭčuju ŭładu.
Kali sprava dajšła da arhanizacyi mitynhu, Cichanienka schłusiŭ, što padaŭ dakumienty ŭ harvykankam, a potym vydaliŭ čat i źnik z sabranymi hrašyma.
Abjadnacca jašče raz maładyja ludzi ŭžo nie zdoleli.
Čytajcie taksama: Pamočnik Kanapackaj kinuŭ moładź, aburanuju zakonam ab pryzyvie. Nieviadoma, dzie sabranyja hramadoj hrošy
Ciapier ža pa pijar da hetaha čałavieka źviartajecca inicyjatyva Capkały.
Sam Cichanienka prezientujecca jak «palitołah, palityčny kansultant, lidar partyi».
Što ŭ Cichanienki za partyi i inicyjatyvy?
My znajšli niejkuju fejkavuju arhanizacyju «Pachnie čabor», u jakoj 2 tysiačy padpisantaŭ u fejsbuku, jakich Cichanienka ličyć svaim palityčnym kapitałam.
Śpis padpisantaŭ staronki niemahčyma ŭbačyć — jon schavany, bačna tolki kolkaść z nulom piersanalnaj infarmacyi.
Ab kolkaści žyvych ludziej, a nie botaŭ, možna mierkavać pa kolkaści łajkaŭ pad žnivieńskimi dopisami z palityčnymi manifiestami Cichanienki — ad 6 (šaści) da 9 (dzieviaci) štuk, uklučna z łajkam ad Valeryja Capkały i inšych aktyvistaŭ Nacyjanalnaha savietu.
Z «Našaj partyi» (jaje stvaraŭ Andrej Dźmitryjeŭ), ź jakoj źviazvajuć Cichanienku, jaho vyklučyli hod tamu i zajavili, što nie niasuć adkaznaści za jaho ŭčynki.
Pavodle infarmacyi ad «Kibierpartyzan», apošniaje aficyjnaje miesca raboty Cichanienki — Administracyja Kastryčnickaha rajona Minska, dzie jon z 2017 pa 2019 hod atrymlivaŭ zarobak, imavierna, jak pamočnik Kanapackaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
