Śviatłana Cichanoŭskaja skazała:
«Siońnia 25 žniŭnia — dzień, jaki pavinien być našym dziaržaŭnym śviatam — Dniom adnaŭleńnia niezaležnaści Biełarusi. Dla režymu suvierenitet nikoli nie byŭ ni śviatam, ni kaštoŭnaściu — ale byŭ tavaram, jakim možna handlavać, kab zachoŭvać uładu.
Katavańni, prysudy pa palityčnych matyvach, zvalnieńni, źniščeńnie biźniesaŭ nie majuć ničoha supolnaha z sapraŭdnymi biełaruskimi kaštoŭnaściami: imknieńniem da biaśpieki i dabrabytu, sumlennaściu, pracavitaściu i hodnaściu.
Ale hałoŭnaja našaja kaštoŭnaść — heta niezaležnaść. I dla Abjadnanaha Pierachodnaha Kabinieta, jaki ja stvaryła, abarona niezaležnaści Biełarusi — hałoŭny pryjarytet.
Apošnija 2 tydni čalcy kabinieta ŭzhadniali stratehiju i damaŭlalisia pra padzieł adkaznaści: chto što musić rabić, i, mabyć, što bolš važna — što nie musić rabić. Kab kabiniet pracavaŭ efiektyŭna, u im pavinna być adładžanaja sistema. Za apošnija tydni my atrymali mnostva zapytaŭ ad achvotnych pracavać u kabiniecie.
Zaraz my pracujem dla ludziej, jakim užo nie chapaje na ježu, ale jany radyja, što pakul im na hałovy nie padajuć rakiety. Usio heta — nastupstvy taho, što dziela zachavańnia ŭłady režym pajšoŭ na zdaču niezaležnaści. I tamu nam treba jaje viarnuć.
Bo niezaležnaść — heta adčuvańnie, što ŭ ciabie jość tvaja ziamla i ty na joj haspadar. Što čyjści varožy tank nie staić pad tvaimi voknami. Heta ŭpeŭnienaść, što zaŭtra ciabie nie adpraviać na čužuju vajnu pamirać za ambicyi dyktataraŭ.
Siońnia, praz 31 hod, biełarusy znoŭ stajać pierad ryzykaj straty niezaležnaści. Niezaležnaść jak pavietra. My nie zadumvajemsia, nakolki jana važnaja, pakul jana jość. Tamu nie treba čakać, kali my jaje stracim, kab pačać jaje baranić».
