Pamiery novych nadbavak prapisanyja ŭ pastanovach Ministerstva achovy zdaroŭja №57 i 58 ad 22 červienia. Tak, daktaram ustanavili nadbaŭku ŭ pamiery 85% ad akładu, siarednim miedrabotnikam — 35% akładu. Samyja vialikija vypłaty — u adździaleńniach aniestezijałohii i reanimacyi: daktaram — 200% akładu, siarednim miedrabotnikam — 70% akładu.
«I heta ŭžo niadrenna»
Dvoje z šaści miedrabotnikaŭ, ź jakimi ŭdałosia parazmaŭlać Intex-press, adznačyli, što ich zarobak paśla ŭviadzieńnia novych nadbavak vyras. Adna z takich — Iryna, jakaja pracuje miedsiastroj u adnoj z baranavickich balnic. Jana kaža, što ŭ jaje zarobak dziakujučy novym nadbaŭkam staŭ bolšy. Praŭda, tolki na 85 rubloŭ.
— Suma nadbaŭki zaležyć ad katehoryi. Pakolki ŭ mianie jaje jašče niama, to mnie da zarobku za lipień dadali 85 rubloŭ. U tych, u kaho jość katehoryja, suma krychu vyšejšaja — kala 100 rubloŭ, — kaža dziaŭčyna. — Zarpłata, viadoma, nie mocna źmianiłasia. Ale i heta ŭžo niadrenna.
Inšaja miedsiastra, Śviatłana, pracuje ŭ paliklinicy. Dziaŭčyna adznačaje, što z karanavirusnymi pacyjentami ni razu nie pracavała i kavidnych nadbavak nie atrymlivała. Tamu paraŭnoŭvać zarobak z kavidnymi i novymi nadbaŭkami nie moža. Tym nie mienš, jaje zarobak za lipień taksama staŭ bolšy.
— Moj zarobak, u paraŭnańni z papiarednim miesiacam, vyras. Za červień ja atrymała 570 rubloŭ, a za lipień, dziakujučy novym nadbaŭkam — 670, — rastłumačyła Śviatłana.
«Zarpłata vyklikała šmat pytańniaŭ»
Astatnija miedyki, jakija pahavaryli z Intex-press, pastavilisia da zamieny kavidnych nadbavak novymi stymulujučymi vypłatami nie tak radasna.
Ludmiła — doktar u adnoj z baranavickich balnic, zapeŭnivaje, što kali paraŭnoŭvać zarobak zimoj, kali dapłačvali za kavid, i ciapier, to z novymi nadbaŭkami jon «jaŭna staŭ mienšym».
— Z nadbaŭkami zrazumieła, i jany jość. Tolki čamu zarpłata stała mienšaj? Heta vyklikała ŭ maich kaleh šmat pytańniaŭ, — adznačaje Ludmiła.
Skazać dakładna, na kolki červieńskaja zarpłata adroźnivajecca ad lipieńskaj, pa słovach doktara, ciažka, tamu što ŭ kožnym miesiacy roznaja kolkaść dadatkovych dziažurstvaŭ.
— U pazaminułym miesiacy na staŭku ŭ mianie vyjšła 1140 rubloŭ, i heta biez nadbavak. U lipieni na 1,75 staŭki ja atrymała 1600 rubloŭ z novymi nadbaŭkami. Heta značyć, kali ŭličyć, što ŭ nas u adździaleńni nadbaŭka prykładna 200 rubloŭ, a nam pa pasadzie ŭchvalena 70% ad akładu pa novych praviłach, to roźnicy ŭ zarpłacie amal niama. Tamu tut albo niešta nie tak z nadbaŭkaj, albo 0,75 staŭki — 300 rubloŭ, — razvažaje Ludmiła. — Našy čakańni nie apraŭdalisia. My čakali adno, a atrymali, jak zaŭždy…
«Lepš by nie śmiašyli hetymi rublami»
Andrej u miedycynie ŭžo kala 4 hod. Aficyjna jon pracuje na staŭku. Heta, pavodle jaho słoŭ, prykładna 165 hadzin na miesiac, ale z-za niedachopu rabotnikaŭ vychodzić značna bolš — ad 190 da 240 hadzin.
— Kali ŭ našaj krainie pačałasia pandemija karanavirusa, u krasaviku 2020 hoda miedykam, jakija pracujuć u «čyrvonaj zonie», uviali nadbaŭki, — uspaminaje Andrej. — Tady naša praca sapraŭdy apłačvałasia pa zasłuhach i dadatak da zarpłaty moh być i 2000 rubloŭ u miesiac. Amal paŭhoda ja atrymlivaŭ kala 2700—3500 rubloŭ. Nam kazali, što dobry zarobak pavinien zachavacca ŭ daktaroŭ i ŭ budučyni.
Zatym, jak kaža Andrej, nadbaŭki za kavid prybrali, pačali ŭličvać kožnaha karanavirusnaha pacyjenta, jaki «traplajecca» na pryjomie. Tady, pavodle jaho słoŭ, navat za dvuch takich pacyjentaŭ doktar moh atrymać plus 300 rubloŭ da zarpłaty.
— Jašče hetaj zimoj ja zarablaŭ prykładna 1100-1300 rubloŭ, ale i karanavirusnych pacyjentaŭ było nie tak šmat. U krasaviku-mai sa źmianšeńniem kolkaści chvorych na kavid ja atrymlivaŭ užo kala 800-850 rubloŭ, — raspaviadaje miedyk. — Ciapier pa novych praviłach maja nadbaŭka składaje 60% ad akładu — heta kala 120 rubloŭ. Bačyli, jak uźnialisia košty na ježu, paliva i ŭsio astatniaje? Dyk voś, lepš by nie śmiašyli hetymi 120 rublami nadbaŭki pa novych praviłach.
U lipieni, adpracavaŭšy na paŭtary staŭki 240 hadzin, Andrej, pavodle jaho słoŭ, zarabiŭ kala 1200 rubloŭ. I jon ličyć, što «heta dastatkova mała za takuju ciažkuju pracu».
— Ź siaredziny žniŭnia znoŭ pajšoŭ rost kavidnych pacyjentaŭ, heta mocna zaŭvažna ŭ paraŭnańni ź viasnoj i pačatkam leta. A nadbaŭki ciapier zastanucca na adnym uzroŭni, niezaležna ad kolkaści chvorych na pryjomie. Heta niespraviadliva, — adznačaje Andrej. — U mianie na pracy ŭžo dva daktary sychodziać paśla hetaha novaŭviadzieńnia. Dy i ja sam padumvaju mianiać śfieru dziejnaści.
«Zarpłata z kavidnymi nadbaŭkami nieparaŭnalnaja z novymi»
Nastaśsia pracuje ŭ adnoj z baranavickich miedustanoŭ, i z pačatku pandemii joj nie raz davodziłasia mieć spravu z kavidnymi pacyjentami. Pa jaje słovach, nadbaŭku jana jašče nie atrymlivała, tamu nie viedaje, jakoj jana budzie.
— Premija za lipień budzie naličvacca nam tolki ŭ vieraśni, — tłumačyć dziaŭčyna. — Da taho ž treba ŭličvać, što niekatoryja supracoŭniki ciapier u vodpuskach, i ŭ hety pieryjad zarpłata zaŭsiody vyšejšaja, bo za adsutnych ludziej rabotnikam staviać dadatkovyja nadbaŭki.
Anastasija ličyć, što novyja stymulujučyja vypłaty — heta «časovaja akcyja, jakaja siońnia jość, a potym nie budzie».
— Dy i kolki b rabotnik ciapier nie braŭ padpracovak, suma nadbaŭki zaŭsiody budzie adna i taja ž, — dadaje jana. — Z karanavirusnymi nadbaŭkami zaŭsiody zarobak vychodziŭ bolšy, i jon nieparaŭnalny z novymi nadbaŭkami. Za karanavirus była pahadzinnaja apłata, heta značyć, źmienu adpracavaŭ z chvorymi pacyjentami abo z analizami chvorych — atrymaješ dobruju premiju da zarpłaty. Takim čynam za miesiac možna było zarabić try svaje zarobki da pandemii. A ciapier… Pracuješ, nie pracuješ z chvorymi na kavid — suma z novymi nadbaŭkami budzie adnolkavaja.
«Dumaju, hetyja nadbaŭki paciešać tolki reanimatołahaŭ»
Volha rodam z Baranavič, ale pracuje ŭ miedustanovie ŭ inšym rajcentry. Da zamieny kavidnych nadbavak novymi vypłatami jana stavicca niehatyŭna. Pavodle jaje słoŭ, kavidnyja nadbaŭki istotna padnimali zarpłatu, i ź imi jana stabilna atrymlivała na 500-700 rubloŭ, a ŭ niekatoryja miesiacy i na 1000 rubloŭ, bolš.
— Ciapier maja novaja nadbaŭka skłała ŭsiaho 135 rubloŭ. Tamu roźnica, kaniečnie, vielmi adčuvajecca. A ŭličvajučy, jak rastuć košty absalutna na ŭsio, hetaja suma da zarpłaty, pa sutnaści, naohuł nijakaj roli nie adyhryvaje, — upeŭnienaja Volha. — Ja dumaju, hetyja nadbaŭki paradujuć tolki ŭračoŭ-reanimatołahaŭ. Voś im idzie dastatkova dobraja suma pa pracencie ad akładu.
Paraŭnoŭvać zarpłaty za červień i ŭ lipień, na dumku Volhi, niama sensu — razabracca ŭ raźlikovych listach miedykaŭ vielmi składana, uličvajučy roznuju kolkaść adpracavanych hadzin.
— U nas kožny miesiac roznaja kolkaść hadzin na staŭku, i jany apłačvajucca pa adnym taryfie, zvyš normy — pa inšym taryfie. Plus dadatkovyja źmieny… U mianie ŭ červieni i lipieni ich była roznaja kolkaść, — tłumačyć jana. — Ale što zarpłata ŭpała ŭ paraŭnańni z apłataj u kavidny pieryjad — heta prykmietna. A karona ciapier znoŭ nadychodzić.
