«Sustreča doŭžyłasia hadzinu. Nas pasadzili ŭ tuju ž kabinku, što i hod tamu.
Vyhladaje ŭ paraŭnańni ź minułym hodam narmalna. Blednaja, kaniečnie, brakuje sonca. Chudaja. Skazała, što važyć kala 45 kiłahram. Ale bolš enierhičnaja, tamu što hod tamu jana ledź žyvaja była — tady jana vielmi chvaravita vyhladała. Zdaroŭje ŭsio jašče turbuje. Jana pa-raniejšamu pakutuje ad bolevych adčuvańniaŭ u šyi z pryčyny novaŭtvareńniaŭ u ščytapadobnaj załozie, praciahvajuć razburacca zuby, i ź niadaŭniaha času źjavilisia prablemy ź nieŭrałohijaj u vobłaści rebraŭ. Vielmi pieražyvaje za mamu, usio raspytvała.
Pieradaŭ joj pryvitańni — jana vielmi dziakuje ŭsim. Raspavioŭ pra mižnarodnuju padtrymku i reakcyi na prysud mižnarodnaj supolnaści — była radasnaja i zadavolenaja, što jaje nie zabyvajuć.
Prysud uspryniała adekvatna, kaža: «Biazhłuździca». Na amnistyju navat blizka nie raźličvaje… Ale spadziajecca na lepšaje! Raspaviała, što ŭ asnovu abvinavačvańnia taksama lahli zadačy pa kryminalnym pravie ŭ EHU, kali artykuły Kryminalnaha kodeksa raźbirali z punktu hledžańnia abvinavačvańnia i abarony. U jaje znajšli fajły z rašeńniem hetych praktykavańniaŭ, dzie jana raśpisvała, što treba zrabić, kab nie padpaści pad toj ci inšy artykuł. I heta kvalifikavali jak padrychtoŭku da złačynnaj dziejnaści. Marfa kazała, što heta ŭniviersiteckija zadańni, ale abvinavačvańnie zajaviła, što jana dziela paźbiahańnia adkaznaści tak rabiła.
Marfa raskazała, što, kali vazili na apošnija pracesy i na prysud, to ŭ hałavie ŭ jaje hučała «Miesiacovaja sanata» Bietchoviena.
Da etapu ŭ kałoniju joj dzieści try-čatyry miesiacy — da apielacyi. U hety čas jaje jašče možna padtrymlivać pasyłkami, navat miedycynskimi, hrašovymi pieravodami. Kali pieraviaduć u kałoniju — užo nie budzie takoj mahčymaści».
Padtrymajcie Maryju Rabkovu listami salidarnaści, pasyłkami, hrašovymi pieravodami pa adrasie:
SIZA-1, 220030, h. Minsk, vuł. Vaładarskaha, 2. Maryi Alaksandraŭnie Rabkovaj
Čytajcie taksama:
Apošniaje słova Marfy Rabkovaj: My nabližajem nadychod našaj Biełarusi. Nie adčajvajciesia i viercie ŭ svaje siły!
