Pad Iziumam ukrainskija vojski zachapili sotni adzinak techniki. Tut i dalej: skrynšoty ź videa i foty z sacyjalnych sietak
Niezaležny Oryx Project fiksuje straty Rasii i Ukrainy, zafiksavanyja videa— i fotamateryjałami. Rasijski śpis za apošni tydzień papoŭniŭsia 333 punktami. Ź ich 224 adzinki techniki ŭkraincy zachapili.
Heta daloka nie poŭny śpis, tamu što ŭkraincy jašče nie skončyli začystki Iziuma i jaho vakolic. Tym nie mienš, jon dazvalaje zrabić niekatoryja vysnovy. Dola sastarełaj, savieckaha času braniatechniki značna vyrasła ŭ paraŭnańni z pačatkam kanfliktu. Heta značyć, što rasijskija arsienały vyčerpvajucca.
Na zachoplenuju techniku z rasijskimi V, Z i O ŭkraincy nanosiać svoj znak: kryž
Usiaho Oryx Project zafiksavaŭ stratu rasijanami 5801 adzinak techniki, u tym liku 1083 tankaŭ. Dla paraŭnańnia: ukraincy stracili 1577 adzinak.
Pierad praryvam frontu pad Bałaklejaj ukraincy abrynuli na rasijskija pazicyi škvał ahniu. Paźniej rasijanie panieśli ciažkija straty padčas adstupleńnia
Rasijskaja armija praktyčna nie maje i reziervaŭ. Kali ŭkraincy prarvali front, dalej jany prasoŭvalisia da samaj rasijskaj miažy, nie sustrakajučy nijakaha supracivu.
Takaja redzieńkaja linija abarony — na mnohich učastkach 1300-kiłamietrovaha frontu, pryznajuć rasijskija frantavyja błohiery.
Šmatlikija videa, što fiksujuć niejtralizacyju rasijskaj techniki, pakazvajuć pieravahu ŭkraincaŭ u raźviedcy i vysokadakładnaj zbroi.
Ukraincy, faktyčna, bačać rasijskuju armiju z pavietra ŭ režymie anłajn, tady jak rasijanie — tolki ŭ binokl.
Na videa zaŭvažny taksama kantrast dobra abmundziravanych, asnaščanych ukrainskich vajskoŭcaŭ z rasijskimi bajcami. Da hetaha dadajecca roźnica ŭ matyvacyi.
Dakładnaja kolkaść pałonienych rasijskich vajskoŭcaŭ pakul nie nazyvajecca
Sa statystyki rasijskich strat vynikaje, što Maskva nie pravodzić mabilizacyi nie stolki z palityčnych pryčyn, kolki tamu, što mabilizavanym nie było b na čym vajavać. Jany apynulisia b z kałašami suprać dobra ŭzbrojenaj ukrainskaj armii.
Miascovyja žychary sustrakajuć ukrainski patrul. Na zadnim fonie — kinutaja rasijskaja braniatechnika
Rasijskija sacyjalnyja sietki poŭniacca tryvožnym čakańniem, dzie ŭkraincy naniasuć čarhovy ŭdar.
Frantavyja błohiery pišuć, što ŭkrainskaja armija ŭžo raźbiraje minnyja zaharody pad Vuhladaram — heta miž Danieckam i Hulaj-Polem, viadzie intensiŭnuju pavietranuju raźviedku nad Danieckam i padvodzić braniatechniku praź Mikałajeŭ da Chiersona.
Rasijskija vojski zachoŭvajuć inicyjatyvu ŭ rajonie Bachmuta i Horłaŭki. Adnak usia rasijskaja hrupoŭka na poŭnačy Łuhanskaj vobłaści moža apynucca pad pahrozaj paśla padzieńnia Limana — bai tam praciahvajucca dvoje sutak. Ukraincy nie tolki svabodna farsiravali Sievierski Daniec, kab vyjści da hetaha horada, ale i pierakinuli tudy braniatechniku. Što padziei tam razhortvajucca ŭ niavyhadnym dla Rasii rečyščy, śviedčać dopisy šavinistyčnych kanałaŭ, jakija prasoŭvajuć dumku, što tam ukraincami kirujuć nataŭskija instruktary.
Na fota nižej: ukrainskija vajskoŭcy ŭ Vaŭčansku, samym uschodnim horadzie Charkaŭskaj vobłaści, za 2 kiłamietry ad miažy z Rasijaj.
Videa fiksujuć taksama sceny radaści i śloz na vulicach vyzvalenych haradoŭ i viosak. Miascovyja žychary sustrakajuć ukrainskuju armiju z kvietkami i ściahami paśla paŭhadavoj akupacyi ŭ vajnie, jakaja dla ŭkraincaŭ nabyła charaktar «ajčynnaj».
Usiaho za minuły tydzień ukrainskaja armija vyzvaliła bolš za 8000 kvadratnych kiłamietraŭ terytoryi. U Charkaŭskaj vobłaści pad kantrolem rasijan zastajecca tolki terytoryja na levym bierazie raki Askoł. U vypadku padzieńnia Limana i vychadu ŭkrainskaj braniatechniki da Svatava, adstupleńnie rasijskaj armii z usioj poŭnačy Łuhanščyny stanie taksama pytańniem času.
