Hałoŭny pres-sakratar Jeŭrakamisii Peter Stana paćvierdziŭ «Biełsatu» hetuju infarmacyju i vystupiŭ z zajavaj:
«Uvohule, našy delehacyi i našy ambasadary, kiraŭniki našych delehacyj u śviecie jość asnoŭnymi punktami kantaktaŭ dla ŭzajemadziejańnia z krainami i dla raźvićcia partniorstva i kantaktaŭ z krainami. Tamu dla nas vielmi važna, kab u nas byli ludzi, akredytavanyja na miescach, i našy ambasadary mahli pracavać biez abmiežavańniaŭ, štučnych abmiežavańniaŭ. A ciapier kankretna: paśla niezakonnaha i niedapuščalnaha zatrymańnia i pieraśledu našaj časovaj pavieranaj u delehacyi ŭ Minsku biełaruskija ŭłady pastanavili pajści jašče dalej, nie praciahnuŭšy akredytacyju našamu ambasadaru Dyrku Šubielu, kiraŭniku delehacyi ES u Minsku, niahledziačy na jaho hatoŭnaść praciahvać svoj mandat u jakaści kiraŭnika delehacyi ES u Minsku. Vidavočna, što heta niedružalubny krok, jaki jašče bolš abmiažuje vuzkija dypłamatyčnyja kantakty i dvuchbakovyja adnosiny pamiž Jeŭrasajuzam i Biełaruśsiu».
Dyrk Šubiel — niamiecki dypłamat i ekanamist. Z 2019 hoda jon pracuje ŭ Jeŭrapiejskaj słužbie źniešnich suviaziej (EEAS) u jakaści kiraŭnika delehacyi Jeŭrapiejskaha sajuza ŭ Biełarusi. Raniej Šubiel byŭ kiraŭnikom delehacyi Jeŭrapiejskaha sajuza ŭ Małdovie ŭ 2009-2013 hadach, a zatym pierajšoŭ na pracu ŭ hałaŭny ofis EEAS.
Paśla pačatku pracy ŭ Biełarusi Šubiel zajaŭlaŭ, što choča zrabić Biełaruś bližejšaj da Jeŭropy i płanavaŭ pavialičyć finansavańnie biełaruskich prajektaŭ u miežach płatformy «Uschodniaha partniorstva».
