Fota: sacsietki
Maćvieju Hrankieviču ciapier 21 hod. Jon naradziŭsia ŭ nieprykmietnaj vioscy Niomanica Barysaŭskaha rajona Minskaj vobłaści. U 2018 hodzie pastupiŭ u Biełaruski dziaržaŭny piedahahičny univiersitet na histaryčny fakultet. Paśpieŭ pravučycca tam dva z pałovaj hoda.
Maćviej Hrankievič na pieršym kursie. Fota: sajt BDPU
Viadoma, što Maćviej udzielničaŭ u pratestach u 2020 hodzie. Jaho zatrymlivali 23 vieraśnia 2020 hoda padčas pratestaŭ suprać «tajnaj inaŭhuracyi» Łukašenki. Tady jamu prysudzili štraf.
Pieršaje paviedamleńnie pra zatrymańnie Maćvieja źjaviłasia 16 listapada na nievialikim kanale «Salidarnaść BDPU». Tam pryvodzicca skrynšot ź videa jaho dopytu i paviedamlajecca, što chłopca zatrymali za kamientary i ŭdzieł u adzinaccaci roznych akcyjach, a taksama što ŭ jaho ŭ telehramie było šmat infarmacyi. Z taho času śled chłopca faktyčna zhubiŭsia.
Pra jaho stała viadoma tolki zaraz. Maćvieja ŭklučyli ŭ hetak zvany «terarystyčny» śpis KDB. Stała viadoma, što jaho vinavaciać pa dvuch artykułach kryminalnaha kodeksu — 342 («Udzieł u dziejańniach, jakija hruba parušajuć hramadski paradak») i 130 («Raspalvańnie varožaści abo varažniečy»). Pry kancy žniŭnia jamu prysudzili 2 hady i 2 miesiacy turmy, a ciapier pieraviali ŭ Mahiloŭskuju turmu.
Skrynšot ź videa, zmantažavanaha na asnovie dopytu
Viadoma, što ŭ Maćvieja dobraja siamja, jość siastra Maryja, starejšaja za jaho na siem hadoŭ. My znajšli siabroŭku Maćvieja, jakaja raskazała nam pra jaho:
«Maćviej dobry chłopiec. Vučyŭsia na histaryčnym fakultecie, hladzieŭ sieryjały, kino. Zvyčajny čałaviek. Zvyčajny chłopiec, jakich miljony. Pazityŭny, hladzić na žyćcio z humaram. Anijakim «terarystam» ja nazvać jaho nie mahu».
Maćviej. Fota: sacsietki
My znajšli mužčynu, jaki siadzieŭ z Maćviejem na Vaładarcy ŭ adnoj kamiery.
«Maćviej — prystojny, načytany i pryjemny ŭ znosinach chłopiec. Pa charaktary jon saramlivy, ścipły i zusim niekanfliktny. Jon dobra viedaje historyju i šmat čym cikavicca, navat vykładaŭ jaje, choć tolki vučyŭsia.
Chłopiec maje prablemy z dykcyjaj, zaikajecca i nievyrazna pramaŭlaje niekatoryja huki. Nie mahu skazać, ci było ŭ jaho heta da zatrymańnia, ale ŭ chvalujučyja momanty hetaja prablema bolš vyrazna prajaŭlajecca.
U čakańni navinaŭ, listoŭ, sustreč Maćviej moh kołami chadzić pa kamiery i refleksavać. I ŭ hety momant jon byccam zamykaŭsia ŭnutry siabie. Ale tak ci inakš za ŭvieś čas usie sukamierniki, uklučajučy mianie, padtrymlivali ź im pastajanny kantakt: razmaŭlali, žartavali, spačuvali, bo razumieli, što dla jaho hetyja ŭmovy nievynosnyja. Jon nie byŭ hatovy da pazbaŭleńnia voli.
Pra jaho spravu ja viedaju niašmat, tolki toje, što źviazanaja jana z repostami i kamientarami, a taksama z udziełam u maršach pratestu. Ja nie lubiŭ havaryć pra toje, za što čałaviek siadzić, bo pa mnie heta zališniaje: uhaniaje ŭ depresiju i vyklikaje sumnievy i padazreńni ŭ čałavieka. I ŭvohule ŭ takich miescach nie pryniata raspytvać pra toje, chto za što siadzić. My ŭsioj kamieraj mocna spadziavalisia, što jamu pakinuć tolki 342-hi artykuł, ale akazałasia, što jamu prypisali jašče 130-y.
Rodnyja jaho padtrymlivali: pisali listy, prychodzili na spatkańni i adpraŭlali pieradački, z hetym prablem nie było. Maćviej nie byŭ u baku ad sukamiernikaŭ, naadvarot, jon zaŭsiody ŭdzielničaŭ va ŭsich aktyŭnaściach.
Ničoha drennaha pra Maćvieja ja skazać nie mahu dakładna, tolki ŭsio samaje dobraje. Heta sapraŭdy dobry i śvietły čałaviek, miescami naiŭny, ale ŭsio ž prystojny i razumny, jakomu žyćcio dało vielmi ciažkaje vyprabavańnie».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
