Pucin sam daje ŭkazańni hienierałam na miescach, zajavili dźvie krynicy, datyčnyja da amierykanskaj raźviedki. Takaja taktyka kiravańnia ŭzbrojenymi siłami śviedčyć pra dysfunkcyjanalnuju, nieefiektyŭnuju strukturu kamandavańnia.
Fota: kremlin.ru.
Pierachopy raźviedvalnaj infarmacyi zafiksavali, jak rasijskija aficery spračalisia pamiž saboj i skardzilisia siabram i svajakam na rašeńni maskoŭskaha kamandavańnia. Isnujuć značnyja roznahałośsi adnosna stratehii siarod vojenačalnikaŭ, jakija sprabujuć damovicca pra toje, dzie zasiarodzić svaje asnoŭnyja siły.
Kramloŭskija čynoŭniki i ekśpierty ŭ dziaržaŭnych ŚMI lichamankava abmiarkoŭvajuć pryčyny niaŭdačy pad Charkavam, i ŭ svajoj maniery Kreml sprabuje pierakłaści vinu z Pucina na rasijskich vajskoŭcaŭ.
Užo adbylisia pierastanoŭki ŭ vajennym kiraŭnictvie, u vyniku čaho kamandnaja struktura Rasii stała jašče bolš biazładnaj, čym była raniej, kažuć krynicy CNN.
Adzin z kamandziraŭ, jaki kiravaŭ bolšaściu padraździaleńniaŭ vakoł Charkaŭskaj vobłaści, byŭ na hetaj pasadzie ŭsiaho 15 dzion i ciapier vyzvaleny ad abaviazkaŭ.
Amierykanskija aficyjnyja asoby ličać, što Rasija abmiežavanaja ŭ svajoj zdolnaści arhanizavać adkaz na kontrnastupalnyja apieracyi Ukrainy. Navat paśla abviaščeńnia mabilizacyi čynoŭniki skieptyčna staviacca da taho, što Rasija zdolnaja chutka razharnuć vialikuju kolkaść vojskaŭ va Ukrainie, uličvajučy jaje pastajannyja prablemy ź linijami zabieśpiačeńnia, kamunikacyjaj i maralnym ducham.
Nievialiki maštab rasijskaj apošniaj pieradysłakacyi vojskaŭ źjaŭlajecca sihnałam jaje niazdolnaści pravieści lubyja surjoznyja apieracyi, skazaŭ CNN vysokapastaŭleny pradstaŭnik Minabarony ZŠA.
Rasija adkazała na pośpiechi Ukrainy atakami na krytyčna važnuju cyvilnuju infrastrukturu: płaciny i elektrastancyi. Ale heta bolš nahadvaje ataki pomsty, a nie asensavanyja dziejańni, jakija majuć choć niejkuju vajennuju značnaść.
U rasijskich vajskoŭcaŭ drennaja zhurtavanaść padraździaleńniaŭ, deziercirstva ŭ šerahach, sałdaty nie žadajuć vajavać. U ich žudasny maralny duch, paviedamlaje amierykanskaje vydańnie.
Rasparadžeńnie Pucina ab mabilizacyi maje važnaje značeńnie, bo heta pramoje pryznańnie taho, što «śpiecyjalnaja vajennaja apieracyja» Maskvy nie spracavała. Navat kali Maskvie ŭdasca pavialičyć kolkaść svaich vajskoŭcaŭ za košt mabilizacyi reziervistaŭ, joj budzie ciažka navučyć, arhanizavać i intehravać hetyja vojski ŭ isnujučyja padraździaleńni. Heta, chutčej za ŭsio, nie buduć navabrancy vysokaj jakaści.
Niaŭdačy Rasii ŭ płanavańni, kamunikacyjach i materyjalna-techničnym zabieśpiačeńni byli ŭskładnienyja stratami pry adstupleńni z vakolic Charkava.
Pucin u sieradu čarhovy raz pryhraziŭ prymianieńniem jadziernaj zbroi. Amierykanskija aficyjnyja asoby zajavili, što ŭsprymajuć hetuju pahrozu surjozna, ale nie ŭbačyli niepasrednych prykmiet taho, što jon płanuje realizavać jaje.
Vysokapastaŭleny čynoŭnik NATA skazaŭ CNN, što ahułam Rasija ciapier znachodzicca ŭ abaronie. Ukraina maje inicyjatyvu, što prymušaje Rasiju pryniać časovyja miery prosta dla taho, kab paźbiehnuć dalejšych strat.
