MOST pahladzieŭ jaho kanał na YouTube i pierakanaŭsia, što prapahandysty čarhovy raz zmanili.
22 vieraśnia prapahandyscki telehram-kanał «Žoŭtyja źlivy» apublikavaŭ videa z błohieram-padarožnikam, jaki naviedaŭ Biełaruś pa biaźvizie. Post pierapościŭ taksama blizki da pres-słužby Łukašenki kanał «Puł pieršaha». Pa śćviardžeńni łukašysckich kanałaŭ, błohier nibyta zachapiŭsia tym, jak u Biełarusi čysta i biaśpiečna, a potym pabieh kuplać siabram i svajakam majki z cytatami Łukašenki.
Prapahandysty śćviardžajuć, što Piotr naviedaŭ u Minsku kramu atrybutyki z cytatami Łukašenki, «kab prykupić tam kruty mierč z cytatami prezidenta». Adnak aŭtar błoha navat nie nazyvaje Łukašenku prezidentam. «Krama ŭ handlovym centry, jakaja na sto adsotkaŭ pryśviečanaja spadaru, jaki adlustravany na fota», — kamientuje błohier. Usiaho raskručanaj łukašystami kramie jon pryśviaciŭ paŭchviliny, i nie vidać, kab jon tam što-niebudź kuplaŭ. Nie bačna ŭ vypusku i zachapleńnia asobaj dyktatara i suvienirami ź jaho cytatami.
Vypusk z charakternaj nazvaj «Biełarusy nie chočuć hetaj ułady» Piotr zapisaŭ na vulicach Hrodna, ale apublikavaŭ paśla vyjezdu ź Biełarusi. U hetym vypusku błohier adkazvaje na pytańni, jakija cikaviać aŭdytoryju, ab palityčnaj situacyi ŭ Biełarusi i staŭleńnie biełarusaŭ da palakaŭ.
Padarožnik kaža, što drennaje staŭleńnie da palakaŭ majuć biełaruskija ŭłady, a nie narod. Pra biełarusaŭ jon kaža, što jany ŭ bolšaści svajoj nie padtrymlivajuć režym, i ŭspaminaje praciahłyja pratesty ŭ 2020 hodzie.
— Tut nielha vykazvacca na temu palityki i, vidavočna, nielha krytykavać urad. Amal usie, kaho b vy ni sustreli z maładoha pakaleńnia, skažuć vam toje ž samaje — što niehatyŭna staviacca da ŭrada. Ale hetyja ludzi nie mohuć publična vykazvacca, bo bajacca, što trapiać u turmu. Kali byli pratesty, ich taksama ŭcichamirvali, i ciapier taksama nie pratestujuć, bo aścierahajucca, što ŭ vyniku pratestu aŭtamatyčna trapiać u turmu, — kaža Piotr.
«Adkaz prosty: staŭleńnie miascovych žycharoŭ da ludziej z našaj krainy vielmi vietłaje», — padvodzić vynik padarožnik.
