«Kali b my byli ŭdvaich, bieź dziaciej, dumaju, što ŭžo b źjechali»

Alaksiej (imia źmieniena) pracuje ŭ nievialikaj IT-kampanii. Asnoŭnaja pryčyna, pa jakoj mužčyna sa svajoj siamjoj nie navažvajecca na pierajezd, — dvoje dziaciej.

«Im 14 i 12 hadoŭ. Pry pierajeździe budzie pytańnie sa škołaj. Vielmi chaču, kab jany atrymali dobruju adukacyju.

U hetym płanie, naprykład, Polšča vyhladaje bolš-mienš pryvabna.

Dzieci svaich dumak nakont emihracyi nie vykazvali. Usia situacyja ŭ krainie ich niervuje, viadoma, ab tym, što adbyvajecca, jany viedajuć.

U nas u škole niadrennyja nastaŭniki, z chvalaj ideałohii my nie sutykalisia. Ja navat u dziaciej pytaŭsia, ci byŭ urok z Łukašenkam 1 vieraśnia, adkazali, što nie.

Dumaju, što dalej heta ŭsio budzie narastać, sistema razvalicca ci prosta stanie nievynosnaj», — kaža jon. 

Tak jak kampanija, u jakoj pracuje Alaksiej, maleńkaja, mahčymaści dla rełakacyi niama. Kiraŭnictva nie suprać, kab ich supracoŭniki pierajazdžali ź Biełarusi, ale rabić heta daviadziecca samastojna.

«I tut uźnikaje prablema z atrymańniem vizy, — kaža jon. — Jechać, naprykład, u tuju ž Hruziju my nie chočam, bo ličym, što tam nizkaha ŭzroŭniu adukacyja. 

Jašče adna pryčyna — finansavaje stanovišča. Košt na arendu kvater navat u Polščy dastatkova vialiki, a nam patrebnaja trochpakajovaja. U Biełarusi ŭ mianie svaja kvatera. Pahadziciesia, što heta davoli kamfortna. I kali, naprykład, žonka budzie doŭha šukać pracu, to dla mianie hetyja vydatki buduć adčuvalnyja.

Jość varyjant pierajści pracavać u inšuju vialikuju kampaniju. Adzin moj znajomy tak pierajechaŭ. Znajšoŭ pasadu ŭ EPAM. Jaho zapisali dastatkova chutka ŭ pasolstva, tam IT-śpiecyjalistami zajmajecca niejkaja asobnaja słužba. Ale pakul na heta nie advažvajusia». 

Alaksiej kaža, što ŭ techničnych momantach ich praca paśla 2020-ha i pačatku vajny asabliva nie źmianiłasia. 

«Staŭ tolki niedasiažny šerah prahram. Heta aznačaje, što zaraz płacić za ich treba z karty zamiežnaha banka. Taksama jość servisy, jakija niedastupnyja, ale heta niekrytyčna», — tłumačyć jon. 

Alaksiej ličyć, što ciapier u suviazi z usimi padziejami niaprosta vyrašyć zastavacca ci biehčy strymhałoŭ. Dla siamji ŭsio ž važnaja najaŭnaść svajoj kvatery. 

«Žonka miarkuje, što jechać nie varta, nie viedaje kudy, — kaža jon. — Napeŭna, usie, chto zastaŭsia ŭ Biełarusi, zaraz u razhublenym stanie, tamu što ryzyki vielmi ŭzraśli ŭ suviazi z mabilizacyjaj u Rasii. Navat kali budzie viza, to pry abjaŭleńni vajennaha stanovišča vyjechać z krainy budzie ciažka. Kali b my byli ŭdvoch, bieź dziaciej, dumaju, što ŭžo źjechali b.

Za apošnija niekalki dzion šmat čaho zdaryłasia, tamu dumaju, što kiraŭnictva našaj kampanii budzie ŭzdymać pytańnie ab mahčymym pierajeździe. Bo ŭ vypadku pačatku niejkich vajennych dziejańniaŭ u Biełarusi moža zdarycca tak, što nie budzie kamu pracavać».

Kali siamja navažycca na pierajezd, to chutčej za ŭsio abiaruć Polšču. 

«Zdajecca, što tam da biełarusaŭ zaŭždy buduć dobra stavicca. Nie chočacca paŭtaryć los niemcaŭ u ZŠA, jakija biehli i apynulisia ŭ filtracyjnych łahierach», — padsumoŭvaje Alaksiej. 

«Jość układ žyćcia, jaki mnie pakul padabajecca» 

Anastasija (imia źmieniena) pracuje ŭ vialikaj IT-kampanii. Dziaŭčyna pakul što nie hatovaja da pierajezdu, jana nie bačyć svajho žyćcia ŭ inšaj krainie. 

«Kampanija daje mahčymaści dla pierajezdu. Nie adčuvaju, što mahu zrabić taki krok, bo treba budzie prykłaści šmat siłaŭ dla ŭładkavańnia žyćcia ŭ inšaj krainie», — tłumačyć jana. 

Na pytańnie, jak źmianiłasia jaje praca paśla pačatku vajny, Anastasija adkazvaje, što «ŭsio tak, jak i było». 

«Moj režym absalutna nie źmianiŭsia, sa składanaściami nie sutyknułasia. Zamiežnych zamoŭcaŭ, jakija b chacieli pracavać ź Biełaruśsiu, stała mienš. 

U cełym situacyja ŭ Biełarusi mianie pałochaje. Padziei i ŭ krainie, i pobač ź joj adbyvajucca drennyja. 

Moža być, pajechała b u jakuju-niebudź raźvituju jeŭrapiejskuju krainu, bo dla mianie važnaja dobraja infrastruktura. 

Tut u mianie zastajecca siamja, siabry, znajomyja nie sa śfiery majoj pracy. Jość układ žyćcia, jaki mnie pakul padabajecca i šmat miescaŭ, jakija lublu», — raskazvaje jana.

«Zarobak pry rełakacyi zastajecca takim ža»

Maćviej (imia źmieniena) pracuje ŭ vialikaj IT-kampanii. U Biełarusi chłopiec zastajecca, tamu što za svoj zarobak jon moža davoli kamfortna žyć. U Jeŭropie ŭ jaho tak nie atrymajecca.

«U niejkaj jeŭrapiejskaj krainie za arendu žytła, volny čas treba budzie vykładvać značna bolš. Taksama ŭ mianie tut naładžany pobyt, koła znosin. Liču, što našmat zručniej zastavacca tut.

Byŭ u Hruzii miesiac, tam mnie nie padabałasia absłuhoŭvańnie, servis, žytło. Ciapier dumaju pajechać pahladzieć Turcyju», — kaža jon. 

Kampanija prapanoŭvała Maćvieju rełakacyju ŭ Litvu, ale ad takoj mahčymaści jon admoviŭsia. 

«Zarobak pry hetym praktyčna zastajecca takim ža, jany davali tolki vizu pry ŭmovie pracaŭładkavańnia ŭ Litvie, — raskazvaje chłopiec. — Pierajezd u hetuju krainu ja nie razhladaŭ, bo tady treba było b asvojvać litoŭskuju movu. Jaje vyvučeńnie, uładkavańnie žyćcia, taki ž zarobak — usio heta nieprydatnyja dla mianie kryteryi. Taksama ŭ Biełarusi jość ofis, a ŭ Litvie niama». 

U pracy Maćvieja za apošnija paŭhoda ničoha nie źmianiłasia. 

«Prykmietna, što na ofisie našmat mienš ludziej stała, usie kudyści rełakavalisia. Rynak źmianiŭsia, vakansij stała mienš. Šerah kampanij praviali masavyja zvalnieńni tych, chto nie zachacieŭ źjazdžać, źjavilisia svabodnyja raspracoŭščyki, ale popyt na tych, chto zastajecca ŭ Biełarusi, vielmi ŭpaŭ. 

Inviestycyi ŭ biełaruskaje IT mocna padajuć. Klučavyja kampanii-hihanty sychodziać ź Biełarusi. I heta ŭpłyvaje na rynak. Taksama pierastali prychodzić niejkija cikavyja startapy, biełaruskija prajekty aryjentujucca zaraz na jeŭrapiejski rynak», — zapeŭnivaje Maćviej. 

Chłopiec kaža, što zastavacca ŭ Biełarusi jamu tryvožna, ale ŭ jakuju kankretna krainu rełakavacca, Maćviej nie viedaje.

«Kampanija prapanoŭvała rełakacyju ŭ Kazachstan, Kyrhyzstan, Indyju»

Marharyta (imia źmieniena) pracuje ŭ vialikaj IT-kampanii. Jana zastajecca ŭ Biełarusi, tamu što žyć stała ŭ Jeŭropie nie choča. 

«Pierajazdžać nie chaču, mnie ŭ Biełarusi padabajecca. Chaciełasia b adkryć vizu, padarožničać.

Kampanija prapanoŭvała rełakacyju ŭ Kazachstan, Kyrhyzstan, Indyju. Viadoma, u hetyja krainy jechać zusim nie chočacca», — kaža jana. 

U pracy Marharyty ničoha, akramia prajektaŭ, za hety čas nie źmianiłasia.

«Tyja, chto z Rasii i Biełarusi, nie mohuć pracavać na jeŭrapiejskich prajektach. Tamu nas usich zaraz pieravodziać na ŭnutranyja prajekty albo na arabskija.

Zastavacca, viadoma, strašna, ale i źjazdžać nie chočacca», — padsumoŭvaje jana. 

Čytajcie taksama: 

«Pasprabujem sabrać biełarusaŭ jak nacyju ŭ adno vialikaje kamjunici». Ajcišniki stvaryli «Ličbavuju Biełaruś»

Za biełaruskich ajcišnikaŭ vyrašyŭ pazmahacca i Kyrhyzstan

Pracavaŭ aficyjantam, a potym biez kursaŭ pieravučyŭsia na prahramista i zarablaje kala $3 tysiač

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?