BELKNIGA.BY
Hetaja dziaržaŭnaja sietka kniharań maje vialiki vybar litaratury. Jość nieśmiarotnaja kłasika nakštałt Bykava, Mieleža, jość i mienš zvykłyja rečy: naprykład, mastacki tvor «Boh kachańnia Mars» ad homielskaha piśmieńnika Siarhieja Bałachonava ci hruntoŭnaja «Hałoŭnaja vulica Minska» — daśledavańnie historyi praśpiekta Niezaležnaści ad piśmieńnika i encykłapiedysta Leanida Marakova.
Nie abyšłosia tut i bieź cikavych pierakładaŭ: źviarnicie ŭvahu, naprykład, na knihu tvoraŭ vialikaha kyrhyzskaha piśmieńnika Čynhiza Ajtmatava pa-biełarusku abo na zbornik kitajskaj paezii.
BIBLIJATEKA KAMUNIKAT
Sajt Kamunikat.org raim zapomnić navat tym, chto nie źbirajecca nabyvać sabie nijakija knihi pa-biełarusku, bo heta bahataja anłajn-biblijateka. Tut jość bieźlič biełaruskamoŭnych tvoraŭ, dastupnych u pdf-farmacie, uražvaje navat bahaćcie tematyki — ad mastackaj litaratury da ekałohii i hieahrafii. Jość na «Kamunikacie» i aŭdyjaknihi, zapisy radyjopieradač, pieryjodyka, muzyka i videa — i ŭsio pa-biełarusku.
«Kamunikat» stvaryŭ biełarus z Padlašša Jarasłaŭ Ivaniuk. Dakładnaj infarmacyi pa dastaŭcy vy na sajcie kramy nie pabačycie, dla hetaha vam spatrebicca napisać na poštu jaje supracoŭnikam. Ale ž jość tam knihi, sapraŭdy vartyja hetaha kroku. Pieraličym tolki niekalki aŭtaraŭ: Taćciana Sapač, Uładzimir Niaklajeŭ, Uładzimir Arłoŭ. Siarod cikavostak — vydańnie «Kultura seksualnych stasunkaŭ u Vialikim Kniastvie Litoŭskim u XVI—XVII stahodździach».
KNIHI.BY
Admietnaść hetaj kramy ŭ tym, što, akramia vydańniaŭ dla darosłych, tut prapanujuć jašče i nievialički dziciačy knihazbor. Naprykład, tut vy nabudziecie sabie knihi viadomaj dziciačaj piśmieńnicy Nadziei Jaśminskaj, a taksama pierakłady kłasičnych dziciačych tvoraŭ ad tvoraŭ Astryd Lindhren da historyi pra Pitera Pena. Na Knihi.by dobry vybar tvoraŭ, pierakładzienych ź inšych movaŭ na biełaruskuju: tut vam i znakamityja Ramen Hary i Čak Pałanik, i mienš viadomyja šyrokamu čytaču Hintaras Bieraśniavičus i Jarasłaŭ Hžendovič.
Cikavaja znachodka: na sajcie možna nabyć nabor vinšavalnych paštovak da prafiesijnych śviat. Tolki pahladzicie na ich — chiba heta nie pryhažość?
Fota: knihi.by
KNIGANOSHA.BY
Kali vieryć sajtu hetaj kramy, jaje admietnaść — toje, što tut možna nabyć staryja vydańni. I praŭda, u hetaj kramie vy znojdziecie rarytety pa našym časie: naprykład, jak nakont «Uładara» ad Makijavieli 2008 hoda vydańnia? Časam tut źjaŭlajucca ŭ adzinkavaj kolkaści jašče bolšyja rarytety nakštałt «Płača pierapiołki» Ivana Čyhrynava 1978 hoda vydańnia abo knihi vieršaŭ Adama Rusaka, vydadzienaj tady ž.
Z bolš novych, ale taksama niezvyčajnych vydańniaŭ raim źviarnuć uvahu, naprykład, na pryhožuju knihu «Tradycyjnyja stroi Biełarusi: biełaruskaje adzieńnie kanca XIX — pačatku XX stahodździaŭ pa rehijonach», vyjavy ź jakoj razyšlisia paru miesiacaŭ tamu pa biełaruskich telehram-kanałach — nadta ŭžo jany pryhožyja.
RAGNA.BY
«Rahna» — heta cełaja etnakrama z rečami, stvoranymi ŭ biełaruskim styli. Maleńkija cacki-zajčyki ŭ nacyjanalnych kaściumach, rukavicy z arnamientam, jarkija paštoŭki-vycinanki — trymajciesia, kab nie skupić heta ŭsio i nie zabycca, što vy tut pa knihi.
Knih u «Rahnie» nie tak i šmat, ale heta pa-svojmu niezvyčajnyja vydańni. Naprykład, «Smak biełaruskaj kuchni» — jaskravy zbornik receptaŭ na biełaruskaj, ruskaj i anhlijskaj movach, albo knihi pra astranomiju ŭ Vialikim Kniastvie Litoŭskim ci zbornik fotazdymkaŭ Biełarusi, zroblenych niamieckim sałdatam padčas Pieršaj suśvietnaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»«Ja čuju hetuju knihu ich hałasami». Razmova ź Siarhiejem Leskieciem pra knihu «Šept»
Uładzimir Ściapan: U ich svaja mierka litaratury — kolkaść bazavych
