Fota: Miedcentr «Łade»
Harbačoŭ raspavioŭ vydańniu, što padčas praviadzieńnia pravierki miedcentraŭ byli vyjaŭlenyja «asobnyja niedachopy ŭ častcy vykanańnia kampanijaj ustanoŭlenych pravił u halinie ažyćciaŭleńnia miedycynskaj dziejnaści».
Jon zaznačyŭ, što ŭ historyi «Łade», jakomu ŭ listapadzie spaŭniajecca 30 hadoŭ, heta pieršy taki incydent.
«Skažu ščyra, ja nie byŭ hatovy da takoha raźvićcia padziej. Razam z tym z pazicyi siońniašniaha dnia ja z udziačnaściu hladžu na pražytuju situacyju. Nikoli z momantu stvareńnia kampanii ja nie atrymlivaŭ takuju padtrymku ad znajomych i nieznajomych mnie ludziej», — skazaŭ jon.
«Jak ułaśnik i kiraŭnik kampanii ja vynies peŭnyja ŭroki ź incydentu. I ja pahadžusia z kiraŭnictvam Ministerstva achovy zdaroŭja, jakoje, kamientujučy prypynieńnie dziejańnia našaj licenzii, vykazała dumku, što «prypynieńnie dziejańnia licenzii idzie biznesu tolki na karyść», — dadaŭ kiraŭnik kampanii.
Uładzimir Harbačoŭ taksama prakamientavaŭ infarmacyju nakont taho, što kampanija nibyta «adkupiłasia», kab joj viarnuli licenziju.
«Mnie składana kamientavać heta, pakolki ja nie dumaju padobnymi katehoryjami. Mahu tolki vykazać zdahadku, što havorka idzie pra toje, što ŭ ramkach pravierki KDK byli vyjaŭlenyja asobnyja fakty niapravilnaj traktoŭki nami ŭstanoŭlenych u śfiery padatkovaha zakanadaŭstva norm», — skazaŭ Harbačoŭ.
«Pa vynikach pravierki, my, u adpaviednaści z zakanadaŭstvam, ažyćciavili karekciroŭku spravazdačnaści i dapłacili ŭ rehijanalnyja biudžety kala 236000 rubloŭ», — rastłumačyŭ jon.
Pavodle Harbačova, ciapier u struktury «Łade» 9 miedcentraŭ, raźmieščanych u Minsku, Breście i Hrodnie. Štodzień jany prymajuć bolš za 5 tysiač pacyjentaŭ. Pavodle jaho, kampanija płanuje pašyracca.
