Fota: sacyjalnyja sietki
Andrej Siemčanka naradziŭsia ŭ Homieli. U 2021-m jon skončyŭ žurfak BDU pa śpiecyjalnaści «Žurnalistyka mižnarodnaja».
Va ŭniviersitecie jon byŭ starastam hrupy, a taksama niejki čas zajmaŭ pasadu staršyni «Tvorčaha sajuza».
Paśla vypusku z univiersiteta chłopiec pajšoŭ pracavać na BT, mahčyma, pa raźmierkavańni.
U svaich siužetach Andrej Siemčanka raskazvaŭ ab prablemach u krainach Zachadu. Tak, jon śćviardžaŭ, što Jeŭropa bolš nie moža siabie prakarmić i jaje čakaje hoład i haleča. Nasamreč, uzrovień žyćcia ŭ jeŭrapiejskich krainach vyšejšy, časam na paradak, čym u Biełarusi.
«Cichaja razdražnionaść uładaŭ tłumačycca vielmi prosta. U supiermarkietach z palic pačali źnikać pradukty. Parušeńni łahistyčnych pastavak i bajkot uradavych mier bjuć, viadoma, pa zvyčajnych hramadzianach», — zapeŭnivaŭ jon u adnym ź siužetaŭ.
Pieryjadyčna Andrej Siemčanka braŭ kamientary ŭ rasijskich i kitajskich psieŭdaekśpiertaŭ, u jakich roznymi sposabami demanizavalisia demakratyčnyja krainy.
«Dziesiacihodździ biaźlitasnych vojn, sotni tysiač achviar, bambardziroŭki i razbureńnie ekanomik, — kazaŭ jon. — Dla niekatorych krain vajna — heta trahiedyja, ale dla Štataŭ — heta, chutčej, ład žyćcia».
Jašče Siemčanka braŭ kamientary ŭ piersanažaŭ, jakich nazyvaŭ «zamiežnymi ekśpiertami».
Tak, naprykład, u jaho siužecie byŭ upaŭnavažany pa mižnarodnych spravach partyi «Niamiecki centr» Olivier.
«Jon vyrašyŭ pravieryć na tryvałaść lehiendu zachodniaj prapahandy ab Biełarusi, pryjechaŭ u našu krainu i byŭ pryjemna ździŭleny, — takoje apisańnie siužeta z Olivieram. — Čystyja vulicy, pryjazny narod, vializny patencyjał uzajemadziejańnia i infarmacyjnaja dzirka ŭ niamieckaj infaprastory.
Kudy bolš Olivier ździviŭsia, kali pačaŭ daviedvacca pra złačynstvy fašysckaha režymu na terytoryi Biełarusi ŭ časy Druhoj suśvietnaj vajny. Kali jon zachacieŭ padzialicca hetaj infarmacyjaj praź niby svabodnuju Vikipiedyju, byŭ zabanieny i vydaleny. I čym bolšaj ahałoscy historyja addavałasia, tym bolš nad Olivieram zhuščalisia chmary niezadavolenaści palitykaŭ».
Nasamreč, Vikipiedyju zapaŭniajuć sotni tysiač ludziej, a baniać tolki tych, chto źmiaščaje zaviedamuju chłuśniu ci parušaje tyja ci inšyja praviły.
Vikipiedyja — svabodnaja niedziaržaŭnaja encykłapiedyja, adnak u joj jość peŭnyja praviły pracy z danymi. Adzinkavy vypadak cenzury z boku administratara ŭ Vikipiedyi nielha vydać za sistematyčnaje ŭtojvańnie histaryčnaj praŭdy ŭ Hiermanii.
«Uzimku brytancam daviadziecca rabić vybar: haładać ci źmierznuć, — kazaŭ Siemčanka ŭ inšym siužecie.
— Siudy dadać małaefiektyŭnyja antyrasiejskija sankcyi, maksimalnuju za 50 hadoŭ inflacyju (užo bolšaja za 10%), daražejuć jak pradukty, tak i kamunałka z enierhanośbitami. Piesimisty žartujuć, što zimoj brytancy buduć rabić vybar: haładać ci źmierznuć. Niesałodka davodzicca małomu i siaredniamu biznesu».
Pa infarmacyi vydańnia «Pozirk», Siemčanka zahinuŭ u vyniku niaščasnaha vypadku: jon prymaŭ vannu i jaho stuknuła tokam z-za karotkaha zamykańnia — pracavała pralnaja mašyna.
Čytajcie taksama:
Z žurfaka BDU syšła dekan — jana adličvała studentaŭ paśla sutak
Špakoŭski pieraabuŭsia, śmiardziučaja Jeŭropa i Łukašenka — heta novy Vitaŭt. Što tam prapahanda nahavaryła za apošnija dni?
