7 kastryčnika Homielski abłasny sud nie zadavoliŭ apielacyjnuju skarhu Haliča.
39-hadovaha mužčynu pryznali vinavatym pavodle troch artykułaŭ Kryminalnaha kodeksa: č. 1 art. 342, č. 1 art. 179, i art. 188. Zhodna z abvinavačvańniem, Jaŭhien raspaŭsiudžvaŭ u internecie «zaviedama niepraŭdzivyja danyja i paklop» na načalnika DAI, kiraŭnikoŭ homielskaha AMAP i supracoŭnicu Homielskaha techničnaha ŭniviersiteta imia Suchoha — u spravie było šaściora paciarpiełych. Raspaŭsiudžvańnie palahała ŭ tym, što Halič pierasłaŭ u pryvatnym paviedamleńni dva čužyja artykuły, dapisaŭšy ad siabie «Možam paŭtaryć». U sudzie heta paličyli zaklikam da masavych akcyj.
Paciarpiełyja ŭ sudzie zajavili, što stracili pakoj i adčuvali dyskamfort. Supracoŭnica ŭniviersiteta kazała, što joj paśla źjaŭleńnia ŭ internecie infarmacyi pra jaje (jakaja była napisanaja nie Haličam) maładziony śviacili lichtarykami ŭ vokny i hučna ŭklučali pieśniu «Pieramien» Viktara Coja. Jana vyklikała na ich milicyju, jakaja zatrymała ich i jašče jaje susieda, jaki vypadkova vyjšaŭ na vulicu. Paśla susiedka na jaje łajałasia i «praklinała». Usie paciarpiełyja namahalisia spahnać z padsudnaha ad 500 da 5000 rub. kampiensacyi maralnaj škody.
Sam Jaŭhien vinu pryznaŭ častkova, u pakryŭdžanych paprasiŭ prabačeńnia.
Prakuror u sudzie zapytaŭ za adzin pierasłany Haličam artykuł dva miesiacy aryštu, za druhi — try miesiacy aryštu, a za «zaklik» «Možam paŭtaryć» — dva hady pazbaŭleńnia voli. Viktar Kazačok asudziŭ mužčynu da dvuch hadoŭ pazbaŭleńnia voli ŭ kałonii ahulnaha režymu.
