Siarhiej Hlebka. Fota z sacsietak
Hlebku zatrymali ŭ noč z 1 na 2 sakavika ŭ Stoŭbcach razam z žonkaj za toje, što padpaliŭ biarvieńnie, kab pieraškodzić ruchu ciahnikoŭ z technikaj i bojeprypasami rasijskich vojskaŭ. Paźniej žonku adpuścili.
Pavodle pravaabarončaha centra «Viasna», 19 kastryčnika Minski rajonny sud pakaraŭ Siarhieja Hlebku 11 hadami kałonii ŭzmocnienaha režymu i štrafam u 9600 rubloŭ. Sudździa Anton Kołabaŭ pryznaŭ jaho vinavatym u «akcie teraryzmu» i «naŭmysnym paškodžańni čyhunačnych šlachoŭ».
Chto taki Siarhiej Hlebka i čamu staŭ «rejkavym partyzanam»
Siarhieju Hlebku 44 hady. U jaho troje niepaŭnaletnich dziaciej — dziaŭčatki. Mienšaja chodzić u sadok, a bolšaja ŭ 10 kłas. Da źniavoleńnia šmat hod jon rabiŭ kiroŭcam-dalnabojnikam. Padoŭhu byŭ u rejsach. Chobi? Lubiŭ chadzić na rybu.
«Pra jaho nichto kiepskaha słova nie skaža. Jon spahadlivy čałaviek. Jak treba było niečym dapamahčy, to adhukaŭsia», — kaža pra Siarhieja žychar Stoŭbcaŭ.
Pavodle ziemlakoŭ, Siarhiej staŭ aktyvistam paśla vybaraŭ 2020 hoda. Udzielničaŭ u miascovych akcyjach pratestu. Niekalki razoŭ jaho zatrymlivali, a ŭ domie pravodziŭsia vobšuk.
«Siarhieja ja b acharaktaryzavaŭ jak čałavieka, jaki nie ŭsprymaje hvałt — usio toje, što adbyvałasia ŭ 2020 hodzie. Jon emacyjna dałučyŭsia da pratestu. Jon nie moh stryvać», — apaviadaje pra Siarhieja adzin ź jaho ziemlakoŭ.
«Tady šmat žycharoŭ Stoŭbcaŭ vychodzili na pratesty, — praciahvaje jašče adzin surazmoŭca. — Jany abjadnali ludziej. Utvaryłasia supołka. Siarhiej byŭ siarod aktyvistaŭ. Mnohija raźjechalisia pa zdušeńni pratestaŭ. Jon zastaŭsia».
«Kali pačałasia vajna, to jon chacieŭ zrabić niešta dla abarony Ukrainy», — praciahvaje jon. Surazmoŭca miarkuje, što Siarhiej doŭha vynošvaŭ ideju, jak dapamahčy susiedniaj krainie, tamu jaho ŭčynak byŭ «śviadomym».
«Byvaje, my vynošvajem ideju, a tut emocyja nadyšła i my zadumu realizujem. Tak adbyłosia i ź Siarhiejem. Sam jon žyŭ la čyhunki i ŭ peŭny momant pajšoŭ na jaje i zrabiŭ toje, što zrabiŭ», — miarkuje pra ŭčynak ziemlaka žychar Stoŭbcaŭ.
Siarhiej Hlebka. Fota z sacsietak
Jašče adzin ziamlak Hlebki adznačaje, što za niekalki dzion da jaho ŭčynku hutaryŭ ź im i toj byŭ «emacyjna napružanym».
«Siarhiej nie dumaŭ pra ŭłasnuju biaśpieku. Jon zdymaŭ, što robić, na videa, — vykazvajecca surazmoŭca. — Siarhiej nie moh ściarpieć, što vajna idzie va Ukrainie, i zrabiŭ toje, što zrabiŭ, bo nie moh inačaj paŭpłyvać na situacyju».
Pravaabaroncy adznačajuć, što Siarhiej Hlebka pryznaŭ toje, što pakłaŭ na čyhunačnym pałatnie biarvieńnie i padpaliŭ jaho. Abvinavačvańnie nastojvała, što dziejańni Hlebki «stvaryli realnuju pahrozu nadychodu ciažkich nastupstvaŭ u vyhladzie avaryi, paškodžańni ruchomaha składu, hibieli albo traŭmavańnia ludziej».
Pazicyja abvinavačvańnia i pravaabaroncaŭ
7 lipienia 2022 hodu KDB unios Siarhieja Hlebku ŭ śpis «terarystaŭ» — u hetym śpisie pieravažajuć prosta palityčnyja praciŭniki dyktatarskaha režymu. Naprykład, tudy ŭklučyli Śviatłanu Cichanoŭskuju i Antona Matolku.
15 lipienia spravu suprać Hlebki prakuratura adpraviła ŭ sud, a ŭ žniŭni pačaŭsia jaje razhlad. Praces byŭ adkryty.
21 krasavika pravaabarončaja supolnaść pryznała Siarhieja Hlebku palitźniavolenym.
«Biełaruskija hramadzianie, pazbaŭlenyja mahčymaści ŭpłyvać na rašeńni ŭładaŭ zvyčajnymi srodkami, vymušanyja šukać dziejsnyja sposaby ŭpłyvu, u tym liku miery krajniaj nieabchodnaści (p.3.3.a Kiraŭnictva pa vyznačeńni paniaćcia «palityčny viazień»). Pravavaja acenka hetych dziejańniaŭ pavinna być abjektyŭnaj, praparcyjnaj, jakaja vyklučaje ŭsiakija zdahadki i raspłyvistyja farmuloŭki, jakaja ŭličvaje jak nastupstvy, tak i praduchilenuju škodu», — havorycca ŭ zajavie pravaabaroncaŭ.
Pavodle ich, na momant pryniaćcia zajavy było viadoma ab zatrymańni z pačatku vajny va Ukrainie minimum 8 «rejkavych partyzanaŭ». Usiaho z pačatku vajny ŭ krainie adbylisia dziasiatki akcyj drobnaha sabatažu, jakija mieli na mecie zapavolić ruch ciahnikoŭ z rasijskaj vajskovaj technikaj u bok Ukrainy.
Čytajcie taksama:
Pryznanyja palitviaźniami jašče 5 čałaviek, u tym liku «rejkavyja partyzany»
Arastovič: Ja nie dumaju, što biełarusy mienš advažnyja, čym ukraincy. Ja dumaju, biełarusy znachodziacca ŭ bolš składanych umovach
