Radyjostancyja zabaŭlalna-infarmacyjnaja, pa formie mała čym adroźnivajecca ad padobnych na postsavieckaj prastory. Rasijskija i zabaŭlalnyja naviny razbaŭlenyja žartačkami i łajfchakami.
Radyjo mimikruje pad rasijskaje, tam vykarystoŭvajuć terminałohiju i słovy, charakternyja vyklučna dla rasijskaha palityčnaha i sacyjalnaha dyskursu: «śpiecialnaja vojennaja opieracija», «na Ukrainie», «Mołdavija», «Kirhizija».
Tam paźbiahajuć rezkich acenak adnosna ciapierašniaj palityčnaj situacyi ŭ Rasii, ale ŭsio ž-taki tam praskokvaje praŭdzivaja infarmacyja adnosna ahresiŭnaj sutnaści ciapierašniaj Rasii i realnaj situacyi na froncie.
Surjoznyja naviny razbaŭlenyja navinami pra kino, psichałohiju, zdaroŭje, intymnaje žyćcio, a taksama parady dla dačnikaŭ i humar. Kłasičnaja, vielmi dobra zapakavanaja i zakamuflavanaja kontr-prapahanda.
Ale adkul heta radyjo?
Na sajcie stancyi ničoha nie paznačana pra zasnavalnikaŭ i pra toje, adkul viadziecca viaščańnie, viadučyja ŭ efiry siabie nie nazyvajuć.
Sihnał radyjostancyi vielmi tryvały. Radyjoamatary vyličyli, što viaščaje jana ź Litvy, z-pad Koŭna, ź vielmi mocnaha pieradatčyka (na 50—150 kVt). Rasijskija radyjoamatary ź jeŭrapiejskaj častki RF vykładvajuć u sacsietki śviedčańni pryjomu tajamničaj radyjostancyi.
Niderłandskaje vydańnie RadioVisie.eu paviedamlaje, što radyjo «Lenta» finansujecca za košt pryvatnych achviaravańniaŭ. Stancyja atrymała dazvoł kamisii pa ŚMI Niderłandaŭ, prahramy vyrablajucca tam ža, a zatym pieradajucca ŭ Litvu dla retranślacyi na častacie 1557 kHc. Litoŭskija ŭłady, u svaju čarhu, vydali «licenziju na retranślacyju».
Čamu radyjostancyja, chutčej za ŭsio, ukrainskaja? Pa-pieršaje, heta čujecca fanietyčna. Pa vymaŭleńni možna pačuć, što bolšaść dyktaraŭ — nie rasijanie. Naviny čytajuć ludzi z ukrainskim i biełaruskim akcentam.
Taksama stała viadoma, što sajt radyjostancyi raźmiaščajecca na Hosting Ukraine LTD. Raspracoŭščyk mabilnaj prahramy radyjostancyi — Eugene Melnyk, jaki raniej raspracoŭvaŭ prahramy dla ŭkrainskich internet-radyjostancyj.
Akramia hetaha, u kodzie staronki (u mieta-tehu <author>) internet-sajta źmiaščałasia zhadka aŭtara staronki, jon ža nazvany ŭ kodzie sajta kijeŭskaha Radyjo Power FM.
Radyjostancyi na karotkich i siarednich chvalach byli istotnaj krynicaj infarmacyi dla zamiežnaj aŭdytoryi i prapahandy ŭ časy Chałodnaj vajny. Dziakujučy padobnym radyjostancyjam ludzi mahli atrymlivać apieratyŭnuju infarmacyju ź inšaj častki śvietu, abychodziačy dziaržaŭnuju cenzuru. Ale z kancom Chałodnaj vajny i masavym raspaŭsiudžvańniem internetu značnaść takich radyjostancyj źmienšyłasia. Zaraz radyjo na siarednich i karotkich chvalach słuchajuć tolki radyjoamatary albo žychary, dla jakich niedastupny jakasny i niecenzuravany internet.
Toje, što dla žycharoŭ Rasii zrabili radyjostancyju na siarednich chvalach, śviedčyć pra toje, što ŭkraincy i ich chaŭruśniki aceńvajuć imaviernaść adklučeńnia Rasii ad hłabalnaha internetu jak całkam realnuju.
