Jany mohuć być našymi najlepšymi siabrami, ale heta nie značyć, što našy sabaki nie mohuć asudžać nas. The Times piša, što daśledčyki nibyta znajšli dokazy: sabaki, asabliva samki, aceńvajuć ludziej, ci možna im daviarać u vykanańni prostaj zadačy.
Tysiačy hadoŭ supracoŭnictva pamiž dvuma vidami pryviali da taho, što sabaki stali vielmi dobra adčuvać nastroj i pavodziny ludziej. Daśledavańnie pakazała, što sabaki ŭśviedamlajuć niekampietentnaść ludziej.
U ekśpierymiencie ŭziali ŭdzieł 74 chatnija sabaki roznych parod va ŭzroście ad 5 miesiacaŭ da 14 hadoŭ. Ich paznajomili z «kampietentnym» čałaviekam, jaki zmoh źniać nakryŭku z prazrystaha kantejniera. Sabaki taksama sustreli «niekampietentnaha» čałavieka, jaki nie zmoh źniać kryšku. Paśla sproby na praciahu piaci siekund čałaviek staviŭ usio jašče zakryty kantejnier na padłohu.
Potym sabakam jašče raz pakazali tych samych ludziej. Ludzi trymali tyja samyja kantejniery, ale ciapier unutry byli smačnyja pačastunki. Kali ježu možna było ŭbačyć, sabaki hladzieli na kampietentnaha čałavieka daŭžej, čym na niekampietentnaha. U pryvatnaści, samki značna čaściej źviartalisia da kampietentnaha čałavieka, paźbiahajučy niekampietentnaha.
Padobnyja pavodziny byli zaŭvažanyja taksama siarod pradstaŭnikoŭ inšych vidaŭ: šympanze, krumkačoŭ i delfinaŭ.
