Fota: vecteezy.com
Praŭda ŭ tym, što na hetuju temu isnuje zanadta mała daśledavańniaŭ, tamu adkazać dakładna na hetaje pytańnie składana. U kožnaha varyjanta isnujuć i plusy, i minusy, piša New York Times.
Da śniadanku
Šmat chto ŭklučaje ŭ svoj śniadanak sałodkija vuhlavody. Miuśli, chleb, kieksy i bliny — usie hetyja pradukty źmiaščajuć u siabie fiermientavanyja vuhlavody, jakimi lubiać charčavacca bakteryi.
Kali vy pračynajeciesia ranicaj, kolkaść bakteryj u vašym rocie i tak dasiahaje pikavaj, voś čamu ranicaj šmat u kaho drenna pachnie z rota. Kali dadać da hetaha vuhlavodny śniadanak, atrymlivajucca idealnyja ŭmovy dla razmnažeńnia bakteryj. Jany, u svaju čarhu, vydzialajuć kisłoty, jakija mohuć znošvać emal na zubach, što pavyšaje imaviernaść karyjesu. Čystka zuboŭ pierad śniadankam prybiraje hetyja bakteryi.
Jašče varta čyścić zuby pierad śniadankam, kab paskoryć vypracoŭku śliny, jakaja taksama adkazvaje za zdaroŭje zuboŭ. Ślina spryjaje ŭmacoŭvańniu zuboŭ, bo jana adkładaje minierały, jakija bakteryi mahli b źjeści za noč, a taksama dapamahaje niejtralizoŭvać kisłotnaść u rocie.
Narešcie, kali pačyścić zuby pierad śniadankam, heta dakładna nie daść vam potym zabycca na hetuju spravu ci adkłaści jaje praź niedachop času. Heta asabliva aktualna, kali ŭ vas jość dzieci, bo, chutčej za ŭsio, čystka zuboŭ — heta apošniaje, pra što vy dumajecie paśla taho, jak prahłynuli śniadanak i śpiašajeciesia na pracu. Kali heta vaš vypadak, čyścicie zuby pierad vychadam z domu, inakš vy nikoli ich nie pačyścicie.
Paśla śniadanku
Bolšaść ludziej, kažuć miedyki, nie nadta jakasna čyścić zuby. Tamu navat kali vy bieraciesia za ščotku niepasredna pierad śniadankam, u vašym rocie ŭsio roŭna mohuć zastacca bakteryi, zdolnyja razmnažacca i vypracoŭvać kisłoty padčas śniadanku i na praciahu ŭsiaho astatniaha dnia. Tamu možna čyścić zuby paśla śniadanku, kab pakinuć bakteryjam jak maha mienš ježy.
Niekatoryja ekśpierty kažuć, što čystka zuboŭ adrazu paśla ježy, asabliva kali vy ŭžyvali kisłyja napoi nakštałt kavy ci apielsinavaha soku, moža paškodzić emal. Heta sapraŭdy tak, ale realnaja škoda budzie nastolki małoj, što jana nijak nie paŭpłyvaje na zdaroŭje zuboŭ. Ale, kali možacie, pačakajcie 30 chvilin paśla śniadanku pierad tym, jak čyścić zuby, a kali chočacie da hetaha času pazbavicca ad kavałkaŭ ježy ŭ zubach, prapałaščycie rot vadoj.
Bakteryi, što prysutničajuć u rocie adrazu paśla abudžeńnia, sapraŭdy siłkujucca vašym śniadankam i vyrablajuć škodnyja kisłoty, ale ž bolšaść ludziej śniedajuć zanadta chutka (10-15 chvilin), kab bakteryi paśpieli im mocna naškodzić. Čystka zuboŭ paśla śniadanku, takim čynam, dapamahaje prybrać z rota reštki ježy i spryjaje lepšamu zasvojvańniu ftoru ŭ paście, bo tady jamu nie pieraškadžaje pieražoŭvańnie ježy.
Takim čynam, vam samomu vyrašać, kali čyścić zuby, bo ŭ navuki niama na hetaje pytańnie adnaznačnaha adkazu. Zadajcie sabie pytańnie: kali dla mianie budzie zručniej čyścić zuby, kab ja nie prapuskaŭ hetuju zvyčku? Jak znojdziecie na jaho adkaz, uviadzicie hetuju zvyčku ŭ svoj raskład i trymajciesia jaje.
Jakija stravy i napoi najhoršyja dla vašych zuboŭ? Raskazvajuć daktary
Parady ekśpiertaŭ pa baraćbie ź niepryjemnym pacham z rota
Jak pazbavicca plamaŭ na zubach
