Kvatera znachodzicca ŭ rajonie «Majak Minska», na 20-m paviersie karkasna-błokavaha doma. Jaje ahulnaja płošča adnosna nievialikaja — usiaho 80 kvadratnych mietraŭ, ale prastora arhanizavanaja tak, što jość druhi ŭzrovień.
Akramia taho, da kvatery prymykaje 45-mietrovaja adkrytaja terasa, ź jakoj adkryvajecca šykoŭny vid na praśpiekt Niezaležnaści i Nacyjanalnuju biblijateku. Ułaśnik rabiŭ dyzajn pad siabie, ale ciapier vymušany vystavić kvateru na prodaž u suviazi z papaŭnieńniem u siamji: dvuch pakojaŭ na ŭsich užo nie chapaje.
«Ja architektar pa prafiesii, šmat zajmajusia dyzajnam interjeraŭ. Naturalna, raspracoŭvaŭ i prajekt svajho žylla, — raskazvaje Dzianis Vołkaŭ. — U dyzajnie našaj papiaredniaj kvatery ja, chutčej, aryjentavaŭsia na žonku: interjer byŭ maksimalna śvietłym ź jarkimi kalarovymi akcentami. A hetym razam zachacieŭ zrabić kvateru «pad siabie», taki mužčynski łoft, jaki mnie časta zamaŭlajuć klijenty».
Niahledziačy na toje, što kvatera vykanana ŭ čorna-šerych tonach, jana vyhladaje vielmi śvietłaj za košt panaramnaha škleńnia i kalarovych akcentaŭ. U kvatery šmat mietaličnych kanstrukcyj. Ź ich zroblenaja antresol nad kuchniaj, dzie raźmiaščajecca harderobnaja. A taksama mini-kabiniet na druhim uzroŭni ŭ dziciačym pakoi.
«U dziacinstvie ja byvaŭ u Paryžy, i tam mnie zapała ŭ dušu Ejfieleva vieža — brutalnaja mietaličnaja kanstrukcyja, usia ŭ zaklopkach. Hety pryjom mnie zachaciełasia pryŭnieści ŭ svaju kvateru. Usie mietaličnyja kanstrukcyi zrabiŭ zbornymi — nijakich zvarnych švoŭ. Pry žadańni ŭsio možna razabrać», — dzielicca aŭtar prajekta.
Zrabić druhi ŭzrovień atrymałasia za košt vysokich stolaŭ. Ich pieršapačatkovaja vyšynia — 3,6 mietra. Ale, dziakujučy asablivaści kanstrukcyi kvatery, tam-siam ich udałosia pavialičyć, prybraŭšy prasłojku z kieramzitabietonu vyšynioj amal 70 santymietraŭ. Heta dazvoliła vykraić dadatkovuju prastoru «naviersie» ŭ dziciačym pakoi i kuchni.
Z haścioŭni jość vychad na adkrytuju terasu ahulnaj płoščaj 45 kvadratnych mietraŭ. Ź jaje vidać Nacyjanalnuju biblijateku. Dzianis pryznajecca, što razhladaŭ ideju nakryć terasu dla abarony ad daždžu abo zašklić całkam, zrabiŭšy zimovy sad. Ale spyniŭsia na adkrytym varyjancie.
Zrešty, rasparadzicca hetaj prastoraj pa-svojmu zmoža novy haspadar. U abjavie paznačana, što cana «dahavornaja»: ciapierašni ŭłaśnik upeŭnieny: prapanova nastolki ekskluziŭnaja, što abaviazkova znojdzie taho, chto jaje acenić.
