Zhodna ź viersijaj abvinavačvańnia, Andrej Ruskich 6 studzienia 2022 hoda ŭ «miesiendžary publična raźmiaściŭ kamientar, źmiest jakoha nakiravany na ŭzbudžeńnie sacyjalnaj varožaści ŭ adnosinach da hrupy asobaŭ, abjadnanych pa prykmiecie prynaležnaści da supracoŭnikaŭ vajenizavanych ministerstvaŭ i viedamstvaŭ, padryŭ davieru i ŭźniknieńnie varožaści da ich, prynižeńnie honaru i hodnaści, uzmacnieńnia nieciarpimaści, farmiravańnia niehatyŭnaha stereatypu, admoŭnaha ładu, antypatyi, ahidy i nianaviści ŭ dačynieńni da nazvanaj sacyjalnaj hrupy asob, padbuchtorvańnie da ŭžyvańnia hvałtu da ich, a taksama zachoŭvaŭ i raspaŭsiudžvaŭ nazvany tekst až da 7 krasavika 2022 hoda».
Hety kamientar kvalifikavali pa č. 1 art. 130 Kryminalnaha kodeksa — raspalvańnie inšaj sacyjalnaj varožaści. Akramia heta, aršancu stavicca ŭ vinu č. 1 art. 368 KK — abraza Łukašenki.
Što cikava, adrazu Andreja abviaścili ŭ vyšuk. Heta adbyłosia 7 krasavika hetaha hoda. A tolki praź miesiac — 11 sakavika — suprać Ruskich vynieśli pastanovy ab pryciahnieńni jaho ŭ jakaści abvinavačanaha i ab prymianieńni zavočnaha ŭziaćcia pad vartu ŭ adnosinach aršanca. 28 maja Ruskich zatrymali ŭ Sankt-Pieciarburhu pa prośbie biełaruskich uładaŭ. Hienieralnaja prakuratura Biełarusi nakiravała zapyt da rasijskich kalehaŭ ab vydačy Andreja Ruskich dla pryciahnieńnia da adkaznaści pa č. 1 art. 130 Kryminalnaha kodeksa (raspalvańnie inšaj sacyjalnaj varožaści). 21 vieraśnia namieśnik Hienieralnaha prakurora Rasijskaj Fiederacyi pryniaŭ rašeńnie ab zadavalnieńni zapyta Hienieralnaj prakuratury Respubliki Biełaruś.
Termin utrymańnia Ruskich praciahnuty da 27 listapada. Ciapier Andrej utrymlivajecca ŭ SIZA-1 Sankt-Pieciarburha.
Jak rasijski sud abhruntavaŭ, što heta nie palityčny pieraśled aršanca
30 vieraśnia advakatka Ruskich źviartałasia ŭ Sankt-Pieciarburhski haradski sud sa skarhaj na rašeńnie namieśnika prakurora ab vydačy Andreja i prasiła admianić jaho. Jana adznačyła, što aršaniec prasiŭ palityčny prytułak u Rasii, ale jamu admovili, na što jon padaŭ skarhu. Taksama ŭ skarzie advakatka adznačyła ryzyku katavańniaŭ i žorstkaha abychodžańnia ŭ vypadku prymusovaha viartańnia Ruskich na radzimu, jak u suviazi z pradjaŭlenymi abvinavačvańniami, tak i padziejami 2020 hoda ŭ Biełarusi.
Ale rasijski sud zapeŭnivaje, što dziejańnie, jakoje inkryminujecca Ruskich, nie moža być adniesiena da palityčnych złačynstvaŭ. Adznačajecca, što zakanadaŭstva Rasijskaj Fiederacyi nie ŭtrymlivaje paniaćcia «palityčnyja złačynstvy».
«Va ŭsich vypadkach pry rašeńni pytańnia ab vydačy Rasijskaja Fiederacyja nie budzie razhladać u jakaści «palityčnych złačynstvaŭ» abo «złačynstvaŭ, źviazanych z palityčnymi złačynstvami» razam sa złačynstvami, nazvanymi ŭ artykule 1 Dadatkovaha pratakoła 1975 hoda da Jeŭrapiejskaj kanviencyi ab vydačy 1957 hoda, šerah dziejańniaŭ, praduhledžanych adpaviednymi mižnarodnymi damovami».
Sud spasłaŭsia i na Kanviencyju Šanchajskaj arhanizacyi supracoŭnictva pa supraćdziejańni ekstremizmu, zhodna ź jakoj «dziejańni, jakija achoplivajucca Kanviencyjaj, ni pry jakich abstavinach nie mohuć być apraŭdanyja, a asoby, vinavatyja ŭ ździajśnieńni takich dziejańniaŭ, pavinny być pryciahnutyja da adkaznaści». Dziejańni, jakija staviacca ŭ vinu Ruskich, pa mierkavańni rasijskaha suda, padpadajuć pad jaje.
«Inšaje śćviardžeńnie ŭ publikacyjach niezaležnych pravaabarončych prajektaŭ pravavoha značeńnia nie maje».
Taksama sud adreahavaŭ na dovady advakatki, što pieraśled Ruskich źviazany z padziejami 2020 hoda ŭ Biełarusi:
«Bieručy pad uvahu, što pravavoj metaj zapytu ab vydačy Ruskich źjaŭlajecca kryminalny pieraśled za ŭčynieńnie dziejańniaŭ ŭ pieryjad z 6 studzienia pa 7 krasavika 2022 hoda, padstaŭ da vysnovy pra ŭpłyŭ palityčnych pracesaŭ leta-vosieni 2020 hoda, na vyšuk apošniaha niama. Pry takich abstavinach, dovady skarhi advakata ŭ častcy detalaŭ palityčnych pracesaŭ u Respublicy Biełaruś u nazvany pieryjad nie mohuć być pryniatyja pad uvahu, pakolki nie śviedčać ab tojesnaści nazvanych abstavin na pieryjad, u jaki inkryminujucca dziejańni, i na ciapierašni čas».
Taksama rasijski sud nazvaŭ nadumanymi dovady advakatki Andreja Ruskich ab najaŭnaści ryzyk katavańniaŭ i žorstkaha abychodžańnia ŭ vypadku prymusovaj vydačy biełarusa Biełarusi. Akramia hetaha, jak adznačaje Sankt-Pieciarburhski haradski sud, Respublika Biełaruś harantavała, što Ruskich «u adpaviednaści z normami mižnarodnaha prava buduć pradastaŭleny ŭsie mahčymaści dla abarony, u tym liku dapamoha advakataŭ, jon nie budzie padviarhacca katavańniam, žorstkim, biesčałaviečnym, prynižajučym hodnaść vidam abychodžańnia i pakarańnia». A Hienieralnaja prakuratura Biełarusi harantavała, što zapyt ab vydačy Ruskich nie maje mety pieraśledu pa palityčnych matyvach.
«Hetak ža Respublika Biełaruś harantuje, što Ruskich budzie pieraśledvacca tolki za złačynnaje dziejańnie, za ździajśnieńnie jakoha zapytana vydača, paśla adbyćcia pakarańnia jon zmoža svabodna pakinuć terytoryju Respubliki Biełaruś».
«Jakich-niebudź danych pra toje, što Ruskich pieraśledujecca ŭładami Biełarusi za palityčnyja pierakanańni, pa prykmietach rasy, nacyjanalnaści i vieravyznańnia, nie majecca, ab čym pradastaŭleny adpaviednyja i dastatkovyja harantyi», —pryjšła da vysnovy sudździa Sankt-Pieciarburhskaha haradskoha suda V. Kavalova.
Andrej — psichołah-seksołah, psichaterapieŭt, trenier u śfiery tryvožna-fabičnych i seksualnych razładaŭ, jakija majuć psichałahičnuju asnovu. Jon aŭtar niekalkich knih pa praktyčnaj psichałohii, taksama viadzie sajt i staronki ŭ sacsietkach, dzie publikuje parady pa roznych psichałahičnych prablemach.
