Fota: Biriu kroviniu terminalas
Na praciahu mnohich hadoŭ pradukcyja «Biełaruśkalija» pastaŭlałasia na zamiežnyja rynki praz port Kłajpiedy. Biełaruski vytvorca pa damoŭlenaści vałodaŭ 30% akcyj Biriu kroviniu terminalas (BKT). Jon vykupiŭ ich u 2013 hodzie za 30 młn dalaraŭ. Adnak «Biełaruśkalij» trapiŭ pad sankcyi i ź lutaha hetaha hoda spyniŭ pastaŭlać uhnajeńni praz terminał.
Ihar Udavicki źviartaŭsia ŭ Radu pa kankurencyi Litvy, kab atrymać dazvoł na ździełku. Ciapier jamu naŭprost i ŭskosna naležać 70% kampanii. U vyniku biznesmien moža stać adnaasobnym uładalnikam terminała.
Fota: portofklaipeda.lt.
Paśla taho, jak pra situacyju stała viadoma, u kabiniet premjer-ministra Litvy pastupiŭ zvarot ad biełarusa Vitala Alejnika. Z adkazu na jaho vynikaje, što ździełka Udavickaha z «Biełaruśkalijem» pad pytańniem.
«Ja i maje suhramadzianie byli ščyra ździŭlenyja, kali daviedalisia pra namier adnaho ź litoŭskich biznesoŭcaŭ strukturavać ździełku ab kupli akcyj hrupy «Biełaruśkalij». Jak tolki ździełka była pastaŭlena na stoł Rady pa kankurencyi Litvy, ja nieadkładna prasiŭ hety adździeł nakłaści vieta na ździełku, navat nie raźbirajučysia ŭ sutnaści jaje ŭździejańnia na kankurencyju ŭ hetym siektary litoŭskaj ekanomiki. Na žal, Rada pa kankurencyi Litvy dała svoj vodhuk, što budzie nie ŭ stanie nakłaści vieta na ździełku, bo pytańnie nie ŭvachodzić u śfieru ich kampietencyi», — adznačaŭ biełarus u svaim zvarocie.
«Naša meta — pieradać hetyja aktyvy i resursy ludziam, jakija paciarpieli ad represij u Biełarusi, u tym liku i represavanym pracaŭnikam «Biełaruśkalija», — kaža Vital Alejnik.
Ale ci moža być kankretny miechanizm dla takoha vykarystańnia aktyvaŭ?
«Jašče na pačatku hoda ja padaŭ chadatajnictva ŭ Hienprakuraturu Litvy, kab na biełaruskija aktyvy byli (prynamsi, u miežach jurysdykcyi Litvy) nakładzienyja abmiežavańni ŭ sensie niemahčymaści pieradačy pravoŭ ułasnaści na ich i hetak dalej, — kaža Vital Alejnik. — Prakuror aficyjna mnie adkazaŭ, što hetaje chadajnictva dałučana da materyjałaŭ kryminalnaj spravy, zaviedzienaj u Litvie pa faktach złačynstvaŭ režymu suprać hramadzian Biełarusi, zhodna z pryncypami ŭniviersalnaj jurysdykcyi. Sankcyi — heta palityčny instrument: siońnia ŭviali, zaŭtra admianili», — zaŭvažaje Vital.
A voś jurydyčny praces tak prosta palitykaj nie spyniš: tamu mienavita ŭ miežach jurydyčnaha pracesu aktyvisty mohuć «pieraciahnuć» navat sankcyjnyja aktyvy u rečyšča Kryminalnaha kodeksa i dalej raźbiracca, jak pa fakcie realizoŭvać rašeńnie suda, tłumačyć aktyvist.
Jon pryvodzić prykład: na dniach spadar Janulavičus z Kanfiederacyi pramysłoŭcaŭ Litvy zajaviŭ, što jany mohuć vykarystać sankcyjnyja aktyvy dla «kampiensacyi strataŭ inviestaraŭ i fizasob», kali Łukašenka nacyjanalizuje ich biznes u Biełarusi.
«Značyć, całkam takija aktyvy vykarystoŭvać možna. Ale ja pierakanany, što pierš za ŭsio heta treba vykarystoŭvać na karyść paciarpiełych biełarusaŭ, a nie niejkich inviestaraŭ, jakija hadami krucilisia vakoł dyktatury, a ciapier schamianulisia», — adznačaje Alejnik.
Aktyvist miarkuje, što ŭ vypadku prodažu biełaruskija aktyvy za miažoj pavinny pryjarytetna vykarystoŭvacca dla kampiensacyi strat paciarpiełych, u tym liku i supracoŭnikaŭ «Biełaruśkalija». Ale jon adznačaje i inšaje: Biełarusi vyhadna supracoŭničać ź Litvoj i mieć svaje aktyvy ŭ Kłajpiedzie z punktu hledžańnia łahistyčnych vydatkaŭ, dyviersyfikacyi ekspartnych kanałaŭ i h.d. Toje, što režym pačaŭ raspradavać «siamiejnaje srebra» ŭ vyhladzie aktyvaŭ taho ž «Biełaruśkalija», nie adpaviadaje nacyjanalnym intaresam biełarusaŭ.
«Upeŭnieny, što patrebna ŭsimi siłami zachavać našyja aktyvy za miažoj u rukach biełarusaŭ da taho času, kali my zmožam ich vykarystoŭvać u samoj Biełarusi», — padsumoŭvaje jon.
U adkazie ad litoŭskaha ŭrada padkreślena, što Litva zajmaje paśladoŭnuju pazicyju, zhodna ź jakoj asudžaje Rasiju i Biełaruś za ich dziejańni, i «prykładaje ŭsie namahańni dla akazańnia maksimalna mocnaha dypłamatyčnaha, palityčnaha i ekanamičnaha cisku».
«U miežach ekanamičnaha cisku nieabchodna zabiaśpiečyć biezumoŭnaje vykanańnie ŭsimi fizičnymi i jurydyčnymi asobami režymu sankcyj Jeŭrapiejskaha sajuza i metaŭ abmiežavalnych mier ES», — havorycca ŭ adkazie.
«Biełaruśkalij» znachodzicca ŭ śpisie padsankcyjnych kampanij. U liście adznačajecca, što srodki i ekanamičnyja resursy padsankcyjnych arhanizacyj i asob pavinny być zamarožany biez mahčymaści ich vykarystańnia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
