Artykuł «akty teraryzmu», pa jakim jaho pieršapačatkova zatrymali, u spravie nie fihuruje. Sud spačatku byŭ adkryty, ale amal adrazu sudździa Alena Ananič zakryła praces. Za kratami palitviazień znachodzicca bolš za hod — sud siońnia admoviŭ jamu ŭ chadajnictvie źmianić mieru strymańnia na nie źviazanuju z pazbaŭleńniem voli, paviedamlaje «Viasna».
Jaŭhien Juškievič — były śledčy SK i inicyjatar prajekta bychange.me. U 2017 hodzie jon zvolniŭsia z pasady staršaha śledčaha adździeła pa rasśledavańni ekanamičnych złačynstvaŭ upraŭleńnia Śledčaha kamiteta pa Minsku, a ŭ 2020-m staŭ raspracoŭščykam i inicyjataram prajekta bychange.me, jaki dapamahaŭ u navučańni, pierapadrychtoŭcy siłavikoŭ, dziaržsłužačych i ludziej, jakija zvolnilisia z pracy pa mierkavańniach sumleńnia ci jakich zvolnili.
Pieršy raz Jaŭhien byŭ zatrymany ŭviečary 24 listapada 2020 hoda ŭ Minsku. Tady jamu inkryminavali č. 1 art. 342 Kryminalnaha kodeksa (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Ale praz 10 sutak jaho vyzvalili sa śledčaha izalatara № 1.
Druhi raz Jaŭhiena Juškieviča zatrymali 19 krasavika 2021 hoda pa padazreńni pa art. 289 Kryminalnaha kodeksa (akt teraryzmu). Doma ŭ jaho praviali vobysk, a jaho samoha źmiaścili ŭ SIZA KDB, kudy doŭhi čas nie puskali advakata. Za miesiac da zatrymańnia ŭ mašynie, jakaja naležyć jaho baćku, nieviadomyja ŭstalavali prasłuchoŭvajučy aparat — adpaviednaje videa z rehistratara Jaŭhien apublikavaŭ u fejsbuku.
U Jaŭhiena ŭziali padpisku ab nierazhałošvańni materyjałaŭ spravy, kab jon navat svaim sukamiernikam nie moh raspavieści, u čym jaho kankretna abvinavačvajuć. Sam palitviazień rasceńvaŭ u listach na volu svoj pieraśled i zatrymańnie jak pomstu za vykładzienaje videa z ustanoŭkaj aparatury dla prasłuchoŭvańnia ŭ mašynie jaho baćki, na jakoj jon pryjechaŭ 17 sakavika na dopyt u Śledčy kamitet.
Dopyt Juškieviča ŭ naručnikach na inšym sudzie
8 kastryčnika 2021 hoda Jaŭhiena dapytali ŭ jakaści śviedki na sudzie nad inšym byłym śledčym Jahoram Viaršyninym. Jaho pryvieźli na sud u naručnikach. Padčas dopytu pa bakach u Jaŭhiena stajali dva kanvairy, a pobač siadzieła jaho advakatka. Juškieviča dapytvali pa hetaj spravie, tamu što zhodna z abvinavačvańniem, Viaršynin braŭ udzieł u maršach mienavita ź im — svaim lepšym siabram.
Z pakazańniaŭ Jaŭhiena stała viadoma, što jamu pradjaŭlena abvinavačvańnie pa art. 342 KK za ŭdzieł u maršy 16 žniŭnia. Za ŭdzieł u masavych mierapryjemstvach 23 i 30 žniŭnia jon prachodzić u jakaści śviedki. Na sudzie Juškievič raskazaŭ, što 23 žniŭnia sustreŭsia ź Viaršyninym, kab abmierkavać sport. U astatnim jon paŭtaryŭ, što kazaŭ Jahor. Pa jaho słovach, jany nie vykrykvali nijakich łozunhaŭ, nie pakazvali znaki, nie pamiataje, kab była niejkaja simvolika z saboj. Havoryć, što nie było matyvu ŭdzielničać u maršach, ale było cikava pahladzieć, kolki čałaviek budzie. Juškievič skazaŭ, što bieź Viaršynina dałučaŭsia da maršu tolki 16 žniŭnia, a ź siabram tolki 23 i 30 žniŭnia. Adznačaje, što zakon dobra viedaje, i na maršach jany nazirali ŭ tym liku za paradkam.
Juškievič adznačyŭ, što iści pa pierakrytaj darozie zakonam nie zabaroniena. Kaža, što vyhladała ŭsio tak, što darohu śpiecyjalna pierakryli, kab ludzi mahli pa joj iści.
«Takija maršy adbyvajucca ŭ Biełarusi ŭpieršyniu, i prapuścić takuju padzieju było b złačynstvam».
Bolš za hod u źniavoleńni
Jaŭhien adrazu ŭtrymlivaŭsia ŭ SIZA KDB, a potym jaho pieraviali ŭ SIZA-1. Viadoma, što ŭ SIZA palitviazień pierachvareŭ na COVID-19. Taksama padčas źniavoleńnia ŭ jaho jość prablemy ź pierapiskaj — jamu nie addajuć listy.
«Usiakija drobiazi zusim pa-inšamu tut aceńvajucca. Pieršy čas ślozy navaročvalisia ad kožnaj pieradačy, ciapier užo pryvyk da ich. Ale časam, kali hladziš na niejkuju drobiaź nakštałt dvuch pačkaŭ cyharet, dumaješ: «Heta ž 7 rubloŭ, heta amal 1/100 zarpłaty majoj mamy, dy jašče i čas vydatkavany na kuplu hetych pačkaŭ». Akuratna składvaješ i zachoŭvaješ hetyja 40 cyharet, tamu što rodnyja tabie ich kuplali», — pisaŭ jon u listach da dziaŭčyny Valeryi Ejsmant.
4 maja Juškievič byŭ pazbaŭleny zvańnia staršy lejtenant justycyi zapasu.
Padtrymajcie Jaŭhiena pasyłkami, hrašovymi pieravodami i paštoŭkami: SIZA-1, 220030, h. Minsk, vuł. Vaładarskaha, 2, Jaŭhien Michajłavič Juškievič
