Adzin sa šmatlikich žartaŭ, jakija źjavilisia ŭ internecie paśla apraŭdalnaha prysudu
U svajoj skarzie palicyja źviarnuła ŭvahu na pacyfiscki znak, jaki, pavodle jaje łohiki, aznačaje «razzbrajeńnie, antyvajenny i antyjadzierny ruchi», a značyć, «vykazvaje niazhodu z abvieščanaj mabilizacyjaj». Pa słovach Klimientavaj, na apielacyjnym pasiadžeńni pradstaŭnik MUS nie patłumačyŭ, jak pacyfiscki znak dyskredytuje rasijskich vajskoŭcaŭ.
«Vyvučanyja byli dovady maje i palicyi, ale na pasiadžeńni asabista mnie zadali tolki adno pytańnie: čamu nie napisała słova całkam. A da palicyi naohuł pytańniaŭ nie było. Z nami praktyčna nie razmaŭlali, navat tekst skarhi i maich piarečańniaŭ całkam nie začytali», — raskazała dziaŭčyna.
Sama Klimientava skazała palicyjantam, što namalavała «pacyfik», bo jon «pryhožy i padabajecca joj».
Raniej 12 kastryčnika Centralny rajonny sud Ciumieni razhledzieŭ spravu suprać Klimientavaj. Palicyja pastaviła joj u vinu nadpis na asfalcie «Niet v***ie» jak antyvajenny.
Klimientava tady patłumačyła, što ŭ nadpisie majecca na ŭvazie «vobła» i što jana adčuvaje «niepryjaznaść da hetaha vidu ryb». Na sudzie palicyja nie zmahła abvierhnuć hetaje śćviardžeńnie, i sudździa Siarhiej Ramanaŭ staŭ na bok zatrymanaj.
Apraŭdalnaje rašeńnie na karyść Klimientavaj sparadziła chvalu miemaŭ i žartaŭ u internecie, źviazanych z zamienaj słova «vajna» na «vobła».
Pierasud ža ź mierkavanym vyniasieńniem užo abvinavaŭčaha prysudu musić pakazać, što ŭ Rasii čas žartaŭ taksama skončyŭsia, a zboi ŭ sistemie mohuć być tolki vypadkovyja i časovyja. U Biełarusi takaja dazačystka sudovaj sistemy była praviedzienaja padčas zadušeńnia pratestaŭ vosieńniu 2020 hoda, ciapier jana pracuje jak hadzińnik i padobnyja kazusy niemahčymyja ŭ pryncypie.