Da 2020 hoda ŭ Volhi byŭ svoj biznes u Minsku. Padčas prezidenckich vybaraŭ jana vyrašyła być niezaležnym naziralnikam i była śviedkaj falsifikacyj. Paśla masavych zatrymańniaŭ hramadzian, žančyna stała vieści svoj TikTok, dzie publikavała videa z pratestami i źbićciom biełarusaŭ. Jaje publikacyi nabirali dziasiatki i sotni tysiač prahladaŭ. Volha nie chavała svaich pohladaŭ u sacyjalnych sietkach i rabiła taksama pieraposty materyjałaŭ, zapisvała videa, u jakich vykazvała svaju pazicyju suprać dyktatury i vajny va Ukrainie.

Volhu zatrymali 12 krasavika 2022 hoda pavodle art. 342 KK (hrupavyja dziejańni, jakija hruba parušajuć hramadski paradak) — za ŭdzieł u paślavybarčych pratestach u 2020 hodzie. Doma ŭ Volhi zastaŭsia 12-hadovy syn. Paśla zatrymańnia žančynu pavieźli ŭ HUBAZiK. Tam ź jaje ździekavalisia supracoŭniki słužby.

— Užo vychodziačy z mašyny, adzin ź siłavikoŭ udaryŭ mianie ŭ hałavu i skazaŭ, kab ja hladzieła ŭ padłohu. U kabiniecie jon udaryŭ mianie jašče raz — i ja ŭpała. A ŭžo dalej pačalisia ŭdary nahami. U adzin momant zajšoŭ u kabiniet mužčyna — z vyhladu adekvatny čałaviek, jak akazałasia, jon uskryvaŭ moj telefon. Spytaŭ u kaleh, što tut adbyvajecca, ja ŭžo padumała pra pramień nadziei i skazała, što ŭ hetym miescy źbivajuć ludziej. Tady jon uziaŭ mianie za vałasy i vyciahnuŭ z kabinieta, ciahaŭ pa kalidory. Ja nie mahła ŭjavić, što takoje moža być u 2022 hodzie ŭ centry Minska, — raspaviadaje Volha.

Z žančynaj u HUBAZiKu pasprabavali zapisać videa. Ale vycisnuć ź jaje «pryznańnie» ŭ siłavikoŭ, vidavočna, nie atrymałasia. U videa, jakoje zmanciravali na fonie dźviarej, ustavili «narezki» z dopytu Volhi. Na im žančyna kaža tolki pra toje, što jaje zarobak składaje 500 rubloŭ i što ŭ jaje jość BMW 2013 hoda vypusku. I bolš ničoha.

— Na videa ja była z mokrymi vałasami, bo da hetaha momantu na mianie vylili litr vady. Ja lažała na padłozie, i, kab pryvieści ŭ prytomnaść, adzin z supracoŭnikaŭ liŭ na mianie vadu z butelki.

Paśla dopytu žančynu zavieźli na Akreścina, dzie jana praviała 10 dzion u niečałaviečych umovach. Dalej było SIZA na Vaładarskaha. Tam upieršyniu paśla zatrymańnia Volhu zvadzili ŭ duš, i joj paśla Akreścina Vaładarka padałasia sanatoryjem. U SIZA žančyna praviała try miesiacy. Jana siadzieła ŭ adnoj kamiery z hałoŭnym redaktaram TUT.BY Marynaj Zołatavaj.

4 lipienia sud Frunzienskaha rajona Minska pryznaŭ Volhu Rytus vinavataj u ździajśnieńni złačynstva pa č. 1 art. 342 KK (hrupavyja dziejańni, jakija hruba parušajuć hramadski paradak) i prysudziŭ žančynie try hady abmiežavańnia voli biez nakiravańnia ŭ papraŭčuju ŭstanovu adkrytaha typu. Volha Rytus była vyzvalena ŭ zale suda. Praź miesiac žančyna źbiehła ź Biełarusi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?