Ź ciaham času pačaŭ užo dumać, što, ja jak i toj Salamon, «usio bačyŭ za hady marnaści majoj», ale ž, jak i jon, padmanuŭsia. A razburyła maju ŭpeŭnienaść prahrama navinaŭ Pieršaha kanału BT, što tranślavałasia 12 kastryčnika a 19‑j hadzinie. Tekstavy radok, što niaśpiešna poŭz pad šmatmoŭnym kamentataram, paviedamiŭ:

«V Vatikanie k čisłu śviatych siehodnia pričiśleno piať čiełoviek, sriedi nich Zihmunt Fielinskij, sud́ba kotoroho tiesno śviazana s Rośsijej».
Mianie ažno paralizavała. Tak i nia zdoleŭ uciamić, čaho ž u hetym skazie bolej: hłupstva abo cynizmu.

Čym ža tak ščylna paviazała z saboj Rasieja narodžanaha la Łucka, vypusknika Sarbony Fielinskaha? Dy tym samym, što i inšych sumlennych, nieabyjakavych da losu svajho kraju ludziej siaredziny XIX st.

Napačatku paviazała jana maci budučaha biskupa Varšaŭskaha, jakaja była vysłanaja ŭ Sibir, i šaściora dzietak faktyčna zastalisia sirotami i biaz dachu nad hałavoj. [Darečy, maci była rodam ź Biełarusi. A tata byŭ rodam ź Vilni. Abodva pachodžańniem ź biełaruskaj šlachty. — Red.]

Paviazała jana i kiraŭnika połackaha paŭstanckaha adździełu Atona Hrabnickaha, jaki pamior na etapie. Paviazała i znakamitaha dziejača biełaruskaje kultury Arcioma Viaryhu‑Dareŭskaha, jakoha śmierć napatkała ŭ Sibiry. Urešcie paviazała na Łukiškach i Kastusia Kalinoŭskaha. Pryjšła čarha i da biskupa. Paśla pratestu suprać represijaŭ carskich uładaŭ 14 červienia 1863 h. jon byŭ vysłany za Jarasłaŭl, dzie pravioŭ u vysyłcy cełyja 20 hadoŭ.

Bolš z Rasiejaj paviazanyja tolki tyja, chto naviečna spačyŭ na chałodnych absiahach Sibiry.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?