Fota: AP Photo / Ng Han Guan
Pracu, što vyjšła na hetym tydni ŭ vydańni Journal of Allergy and Clinical Immunology, daśledčyki nazyvajuć navukovym praryvam. Pavodle jaje, chałodnaje pavietra samo pa sabie škodzić sistemie imunnaha adkazu na ślizistaj nosa, piša CNN.
Kali źnizić tempieraturu ŭnutry nosa ŭsiaho na 5 hradusaŭ, heta, zhodna z vysnovami navukoŭcaŭ, źniščyć amal pałovu z tych miljardaŭ kletak u nozdrach, što dapamahajuć zmahacca z bakteryjami i virusami. Takim čynam vy atrymajecie pavyšanuju imaviernaść zachvareć na virusnuju infiekcyju.
Asnoŭnymi aŭtarami pracy byli rynołah Biendžamin Blejer, supracoŭnik Masačusietskaj balnicy voka i vucha i prafiesar Harvardskaj miedycynskaj škoły, i Mansur Amidžy — kiraŭnik fakulteta farmaceŭtyki ŭ Paŭnočna-Uschodnim univiersitecie ŭ Bostanie. Kab razabracca ŭ sutnaści pradmieta, im daviałosia ledźvie nie stać sapraŭdnymi miedycynskimi detektyvami.
Kamanda vyśvietliła, što, kali virus ci bakteryja traplajuć u nos, ich śpiarša vyjaŭlajuć kletki ślizistaj piaredniaj častki nosa, jakija adrazu ž pačynajuć vydzialać miljardy tak zvanych pazakletačnych viezikuł. Blejer nazyvaje ich mini-viersijami kletak, śpiecyjalna stvoranych dla taho, kab źniščać virusy.
Zhodna z pracaj navukoŭcaŭ, kali imunnyja kletki ŭ nosie traplajuć pad ataku virusaŭ ci bakteryj, vytvorčaść pazakletačnych viezikuł pavyšajecca na 160%. Vučonyja taksama vyśvietlili, što na pavierchni hetych mini-viersij kletak jość našmat bolš receptaraŭ, čym na zvyčajnych kletkach, što palapšaje ich zdolnaść «pahłynać» virusnyja čaścinki.
Što ž adbyvajecca z usim hetym bahaćciem, kali na vulicy chaładaje? Kab vyśvietlić heta, Blejer i jaho kamanda pratrymali ŭdzielnikaŭ daśledavańnia 15 chvilin pry tempieratury 4,4 hradusa Celsija i potym daśledavali ŭmovy ŭnutry ich nozdraŭ. Akazałasia, što, kali ludzi znachodziacca va ŭmovach choładu, tempieratura ŭ ich nosie moža źnizicca na 5 hradusaŭ, i hetaha dastatkova, kab vybić z baraćby z bakteryjami prykładna 42% pazakletačnych viezikuł. Razam z hetym pahoršaje i jakaść samich viezikuł: naprykład, kolkaść receptaraŭ na ich moža źnizicca da 70%. Usio heta prykładna ŭ dva razy pamianšaje vašu zdolnaść abaraniać siabie ad virusaŭ.
Takoje daśledavańnie pakazvaje, čym karysnaje našeńnie masak uzimku: jany nie tolki abaraniajuć ad udychańnia virusaŭ, ale i dapamahajuć padtrymlivać u nosie vyšejšuju tempieraturu.
Čytajcie taksama:
«Spadziajusia, piataha razu nie budzie». Biełarusy, jakija chvareli na kavid try i bolš razy, raskazvajuć, jak heta
8 prykmiet, što vaš chrap moža być niebiaśpiečny
Niekalki prostych pravił — i vy nie budziecie chvareć zimoj
