Pra abstaviny zatrymańnia Mikałaja Kulašova nie havorycca. U filmie akcentujecca ŭvaha na tym, što jon dapamahaŭ achvotnym za hrošy niezakonna pierachodzić biełaruska-litoŭskuju miažu.
U siužecie pakazali i jaho syna Ivana. Pa jaho słovach, baćka ŭ pryvatnaj hutarcy raskazaŭ jamu, čym zajmajecca.
Jak vynikaje ź filma, Mikałaj Kulašoŭ supracoŭničaŭ ź niekamiercyjnaj arhanizacyjaj «Dapamoha», jakaja dziejničaje ŭ Litvie i dapamahaje ŭciekačam. Jaho nazyvajuć «samym nadziejnym pravadnikom u Biełarusi sa stažam bolš za 10 hadoŭ». Jaho mianuška Trenier.
U hetym ža filmie pakazvali, jak na miažy zatrymali maładuju dziaŭčynu Anitu Bakunovič. Ale tvar jaje pravadnika nie pakazvaŭsia.
Kulašovu inkryminujecca «naŭmysnaje niezakonnaje pierasiačeńnie dziaržaŭnaj miažy Respubliki Biełaruś, ździejśnienaje arhanizavanaj hrupaj» (č. 3 art. 371 KK) i «stvareńnie ekstremisckaha farmiravańnia albo ŭdzieł u im» (č. 1 art. 361 KK). Aktyvistu pahražaje da 7 hadoŭ pazbaŭleńnia voli.
Mikałaj Kulašoŭ u minułym mytnik. U 2016 hodzie suprać jaho była raspačataja kryminalnaja sprava za napad na pahraničnika. Padčas znachodžańnia ŭ śledčym izalatary Kulašoŭ abviaščaŭ haładoŭku.
Jaho kryminalny pieraśled tady źviazvaŭsia z tym, što jon vypadkova akazaŭsia śviedkam dziejnaści kantrabandystaŭ, jakich nibyta «kryšujuć» pastaŭskija pahraničniki. Kulašoŭ haładoŭkaj damahaŭsia, kab kryminalnuju spravu suprać jaho spynili i kab pakarali za pieravyšeńnie słužbovych paŭnamoctvaŭ pahraničnikaŭ dy śledčaha, jaki, pavodle Kulašova, sfabrykavaŭ spravu. Čym skončyłasia taja historyja ź pieraśledam Kulašova, nie paviedamlałasia.
Mikałaj Kulašoŭ žyŭ u Dubroŭnie. Paśla pratestaŭ 2020 hoda jaho pieraśledavali, ale ŭžo za apazicyjnuju dziejnaść. Niekalki razoŭ u domie pravodzili vobšuk. Tady Kulašova padazravali ŭ tym, što jon nanosiŭ pratesnyja nadpisy na roznych abjektach rajcentra. Sam aktyvist zajaŭlaŭ, što pieraśled źviazvaje sa svajoj aktyŭnaj hramadskaj pazicyjaj.
Pa dziaržkanałach pakazali, jak palitźniavolenaja sprabavała pierajści miažu ź Litvoj
Litoŭskija ŚMI: Vilenski fond «Dapamoha» Natalli Kalehavaj vykarystoŭvaŭ machlarskija schiemy, kab zarabić na raźmiaščeńni biełaruskich emihrantaŭ
