Fota: BiełTA
Pieršaje paviedamleńnie pra ŭzmacnieńnie režymu dla «chatnich chimikaŭ» apublikavała «Viasna» jašče 28 listapada. Tady stała viadoma, što ŭ Baranavičach i Minsku pavialičyli kolkaść pravierak, dy tak, što da niekatorych pačali prychodzić navat nočču, zmušali chadzić na lekcyi ŭ RUUS raz na tydzień (raniej jany byli raz na dva tydni), a niekatorym navat zabaranili vadzić dziaciej u siekcyi.
Paśla paviedamleńni pra ŭzmacnieńnie režymu pačali pastupać masava da roznych inicyjatyŭ i ŭ Redakcyju — ludziam źmianšali čas na šlach da pracy, skaracili volny čas ź dźviuch hadzin da adnoj, pačaścili pravierki (u tym liku stabilna siarod nočy i kali jany na pracy), zabaraniali pracoŭnyja kamandziroŭki, a niekatorych, chto ŭžo adbyŭ pakarańnie, zrabili nievyjaznymi. Pryčym u niekatorych miescach heta zakranuła i «chimikaŭ», asudžanych nie pa palityčnych spravach. Heta adbyvajecca pastupova ŭ roznych miescach, ale tendencyja vielmi vyraznaja.
Niekalki nie źviazanych miž saboj krynic raskazali nam, što kala troch tydniaŭ tamu ŭ strukturach MUS pačałasia «aktyvizacyja» z nahody taho, što ŭłady paličyli režym u asudžanych na chatniuju chimiju «zanadta miakkim». Zaŭvažyli, što šmat ludziej u vyniku źjazdžaje — da, padčas ci paśla adbyćcia chatniaj chimii.
Vidać, kožnaje adździaleńnie milicyi pajšło roznymi šlachami: niechta ŭzmacniŭ kantrol za tymi, chto adbyvaje pakarańnie, a niekatoryja vyrašyli zacisnuć hajki da maksimumu.
Jakaja meta musić być dasiahnutaja takim čynam, našy surazmoŭcy nie razumiejuć — bo bolšaść ludziej na «chatniaj chimii» i tak vykonvali ŭsie režymnyja mierapryjemstvy. A źjazdžali ludzi zvyčajna mienavita praz składanaści z adbyćciom pakarańnia i štučna stvorany cisk siłavikoŭ na ich.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
