Fota Ofisa prezidenta ZŠA
U pačatku aficyjnaj prahramy vizitu Zialenskaha la Biełaha doma sustreli prezident Bajden z žonkaj.
«Dla mianie vialiki honar być pobač z vami ŭ sumiesnaj abaronie ad žorstkaj vajny, jakuju viadzie Pucin», — skazaŭ Bajden.
«Ciažka pavieryć, što prajšło ŭžo 300 dzion i što Pucin hruba pakvapiŭsia na prava ŭkraincaŭ na isnavańnie jak nacyi i napaŭ na ni ŭ čym nie vinavaty ŭkrainski narod tolki dla taho, kab zapałochać», — dadaŭ Bajden.
Bajden zapeŭniŭ Zialenskaha, što abiedźvie amierykanskija partyi ŭ Kanhresie padtrymlivajuć ukraincaŭ i razam z sajuźnikami ŭ Jeŭropie, Japonii i inšych krainach praciahnuć akazvać Ukrainie nieabchodnuju humanitarnuju i vajskovuju dapamohu, uklučajučy niadaŭna abvieščanuju pastaŭku sučasnych rakietnych kompleksaŭ SPA «Petryjat».
Sustreča dvuch prezidentaŭ doŭžyłasia bolš za dźvie hadziny.
Na pres-kanfierencyi paśla sustrečy Uładzimir Zialenski skazaŭ, u pryvatnaści, što prezident Bajden paćvierdziŭ naviny pra čarhovy pakiet vajskovaj dapamohi Ukrainie, u jaki ŭvojduć i mahutnyja srodki SPA.
«Ja viartajusia dadomu z dobrymi navinami, z pakietam vajskovaj dapamohi amal na 2 miljardy dalaraŭ, i asnoŭny elemient hetaha pakieta — sistemy «Petryjat», jakija ŭzmocniać mahčymaści našaj supraćpavietranaj abarony», — skazaŭ prezident Ukrainy.
Džo Bajden na pres-kanfierencyi znoŭ padkreśliŭ, što Rasija bje zimoj pa ŭkrainskaj infrastruktury, kab «ludzi pakutavali ad choładu i hoładu, kab raźjadnać ludziej».
U adkaz na pytańnie, nakolki ZŠA chvaluje tryvałaść kaalicyi sajuźnikaŭ Ukrainy, Bajden skazaŭ, što ZŠA nie ličać hetaje pytańnie prablemnym.
«My nie bačyli bujnoha ŭvarvańnia ŭ jeŭrapiejskuju krainu z časoŭ Druhoj suśvietnaj. […] My razumiejem, što pad pahrozaj — sama ideja suvierenitetu. Pucin dumaŭ, što asłabić NATA, ale jon uzmacniŭ jaho. Jon pryvioŭ NATA da jadnańnia, da dałučeńnia Finlandyi i Šviecyi», — skazaŭ Bajden.
Karespandent «Si-en-en» spytaŭ Bajdena, ci dumali ZŠA pra mahčymuju eskałacyju z boku Rasii ŭ adkaz na pastaŭki Ukrainie kompleksaŭ «Petryjat». Prezident adkazaŭ, što nie dumali, bo «Petryjat» — heta abarončaja zbroja.
Karespandent ukrainskaha telekanała «Inter» spytaŭ prezidentaŭ, jakim jany bačać «spraviadlivy» abo «sumlenny» kaniec vajny.
Uładzimir Zialenski, jaki adkazvaŭ na pytańnie pieršym, skazaŭ, što asnoŭnaja ŭmova Ukrainy ŭ mirnych pieramovach — viartańnie terytoryj i pakryćcio strat.
«Dla mianie jak dla prezidenta spraviadlivy mir — heta adsutnaść kampramisaŭ pa našaj terytoryi i pakryćcio ŭsich strat. Rasija pavinna adkazać za ŭsio, što zrabiła suprać nas, Jeŭropy i ŭsiaho cyvilizavanaha śvietu. My prapanavali ZŠA kroki, jakija mohuć pryvieści ŭ vyniku da miru», — skazaŭ jon.
Bajden dadaŭ, što ZŠA padzialajuć ŭkrainskuju pazicyju adnosna ŭmoŭ miru. «U nas ź Zialenskim absalutna adnolkavaje bačańnie», — skazaŭ amierykanski prezident.
Adpor Pucinu i pamiać pra baraćbu z nacyzmam
U pramovie pierad abiedźviuma pałatami Kanhresa ZŠA Zialenski znoŭ padziakavaŭ amierykancam za dapamohu ŭ vajnie i skazaŭ, što dla pieramohi i Ukrainy, i ŭsiaho volnaha śvietu stojkaść pryjdziecca prajavić i ŭkraincam, i ich sajuźnikam.
Zialenski, akramia inšaha, znoŭ paraŭnaŭ ciapierašniuju vajnu i pucinskuju Rasiju z Druhoj suśvietnaj i hitleraŭskaj Niamieččynaj.
Ściah z Bachmuta. Skrynšot videa
«Jany kinuli suprać nas usio, hetak ža, jak i takaja tyranija kaliści… Kinuli ŭsio, što ŭ ich jość, suprać volnaha śvietu. Hetak ža, jak advažnyja amierykanskija sałdaty, jakija trymali abaronu i adkinuli hitleraŭskija vojski ŭ Kalady 1944 hoda, advažnyja ŭkrainskija sałdaty robiać toje ž samaje z pucinskimi vojskami ŭ hetyja Kalady. Ukraina trymaje svaje pazicyi i nikoli nie zdasca», — skazaŭ prezident Ukrainy ŭ Kanhresie ZŠA.
Na hetych słovach kanhresmieny čarhovy raz ustali i apładziravali Zialenskamu stojačy.
Zialenski vystupaŭ na anhlijskaj, i jaho słovy «nikoli nie zdasca» — «will never surrender» — byli vidavočnaj adsyłkaj da znakamitaj pramovy Uinstana Čerčyla.
Padčas vystupu Zialenskaha Kanhres ZŠA 21 raz apładziravaŭ stojačy
Prezident Ukrainy padziakavaŭ amierykanskamu narodu za padtrymku. Jon taksama źviarnuŭsia pa padtrymku, raspavioŭ, u jakich umovach žyvuć ukraincy ŭ čas vajny.
Zialenski zaklikaŭ da praciahu finansavaj padtrymki z boku ZŠA, źviartajučysia da Kanhresa: «Vašy hrošy — heta nie dabračynnaść. Heta inviestycyi ŭ hłabalnuju biaśpieku i demakratyju, jakimi my kirujem vielmi adkazna».
U zaviaršeńnie svajho vystupu Zialenski ŭručyŭ Kanhresu bajavy ściah z Bachmuta ŭ znak padziaki za dapamohu. Paśla hetaha śpikier Pałaty pradstaŭnikoŭ Nensi Pełosi ŭručyła Zialenskamu ściah ZŠA.
