Fota: Paul Sakuma / AP Photo
Miljony ludziej prymajuć «Bienadrył», «Mucynieks», «Teraflu» i «Tajlenoł» abo ich anałahi — tabletki, siropy i vadkaści, u składzie jakich jość fieniłefryn — kampanient, što palahčaje zakładzienaść nosa. Inhredyjent biaśpiečny, ale prynamsi čatyry daśledavańni pakazali, što jon nie pracuje.
Sa spasyłkaj na vyniki daśledavańniaŭ, lekary i farmaceŭty, u tym liku Amierykanskaja akademija alerhii, astmy i imunałohii i Amierykanski kaledž kliničnaj farmacyi, zajavili, što hetyja leki treba zabaranić pradavać.
«Navošta pradavać štości, ad čaho niama karyści?» — kaža Eli Mielcer, alerhołah z San-Dyjeha, jaki pravodziŭ niekatoryja vyprabavańni. «Heta marnavańnie hrošaj».
Daśledčyki farmacyi Univiersiteta Fłarydy, jakija aceńvali vyprabavańnie tabletak, paprasili Upraŭleńnie pa sanitarnym nahladzie za jakaściu charčovych praduktaŭ i miedykamientaŭ prybrać fieniłefryn sa śpisu ŭchvalenych biezrecepturnych lekaŭ. Pietycyju padpisali jašče ŭ 2015 hodzie.
U 2016-m FDA paviedamiła daśledčykam, što jano razhladaje zapyt, ale nie moža pryniać rašeńnie, bo pietycyja «stavić składanyja pytańni, jakija patrabujuć ŭvažlivaha vyvučeńnia i analizu».
Stefani Fierery, prafiesar Farmaceŭtyčnaj škoły Ešełmana Univiersiteta Paŭnočnaj Karaliny, jakaja nie ŭdzielničaje ŭ pietycyi, ale sočyć za hetym pytańniem, skazała, što sanitarnaje ŭpraŭleńnie, vierahodna, nie prymaje nijakich dziejańniaŭ, bo imaviernaść škody dla ludiej — vielmi nizkaja. «Heta nie prablema biaśpieki, tamu heta nie źjaŭlajecca pryjarytetam FDA», — kaža doktar Fierery.
Handlovaja hrupa «Asacyjacyja spažyvieckich tavaraŭ dla zdaroŭja» zajaviła, što leki pavinny zastavacca na rynku. «FDA pryznała, što fieniłefryn biaśpiečna dziejničaje jak pieraralny supraćaciokavy srodak, i jaho kampanii-ŭdzielniki vykonvajuć fiederalnyja praviły», — skazaŭ pradstaŭnik hrupy.
Ludzi prymajuć supraćaciokavyja tabletki, kab ablehčyć zakładzienaść nosa pry prastudzie, hrypie abo alerhii. Pa danych daśledčaj kampanii IRI, letaś prodaž biezrecepturnych preparataŭ dla lačeńnia simptomaŭ kašlu, nasavych pazuch i hrypu, uklučajučy tabletki fieniłefrynu, prynios kala piaci miljardaŭ dalaraŭ.
Jak mnohija bolš staryja leki, fieniłefryn nie prajšoŭ strohich kliničnych vyprabavańniaŭ, jakija siońnia patrabujucca dla miedykamientaŭ.
Leśli Chendełs i Rendzi Chatan, prafiesary farmaceŭtyčnaj škoły Univiersiteta Fłarydy, jakija ŭ 2000-ch praanalizavali daśledavańni preparataŭ fieniłefrynu, zajavili, što nie znajšli dastatkovych dokazaŭ, jakija paćviardžajuć efiektyŭnaść hetaha kampanienta.
Z taho času było apublikavana jak minimum čatyry takija daśledavańni. U adnym ź ich, praviedzienym siarod 539 čałaviek i apublikavanym u 2015 hodzie ŭ Časopisie alerhii i kliničnaj imunałohii, vyjavili, što dozy pa 10 milihramaŭ, a taksama try bolš mocnyja nie dali nijakaha efiektu. Usie daśledavańni pakazali, što fieniłefryn nie bolš efiektyŭny dla palahčeńnia zakładzienaści nosa, čym płaceba.
Pa słovach lekaraŭ i farmaceŭtaŭ, praz toje, što pieraralny fieniłefryn mietabalizujecca ŭ kišečniku i piečani, jon nie moža traplać u kroŭ u dastatkovaj kolkaści.
«Dokazy vidavočnyja, što pieraralny fieniłefryn nie pracuje», — kaža doktar Chatan. «Kali rečyva naohuł nie traplaje ŭ kroŭ, jano nie moža trapić u nos i vyklikać zvužeńnie kryvianosnych sasudaŭ i, takim čynam, palehčyć zakładzienaść nosa».
nu jak heta navošta? na karyść farmaceŭtyčnych kampanij