Pavieł Antaŭ. Fota z sacsietak
65-hadovy Antaŭ 25 śniežnia ŭpaŭ z treciaha paviercha hatela Sai International. Usiaho ŭ hateli try pavierchi, na fasadzie ŭ niekalkich numarach jość bałkony.
Za niekalki dzion da taho, 22 śniežnia, siabru Antava, 61-hadovamu pradprymalniku Uładzimiru Bydanavu, stała drenna ŭ numary «ad praźmiernaj kolkaści ałkaholu», i jon pamior u špitali.
U palicyi śmierć Antava nazvali suicydam, a hienieralny konsuł Rasii ŭ Kalkucie Alaksiej Idamkin skazaŭ, što palicyja «pakul nie bačyć kryminalnaha składnika» ŭ abiedźviuch śmierciach.
Niekrałoh pa Antavie źjaviŭsia na sajcie uładzimirskaha Zakanadaŭčaha schodu, pryčyny śmierci tam nie nazyvajucca.
Pavodle infarmacyi rasijskaj «Miedyjazony», u 2000-ch Pavieł Antaŭ zasnavaŭ miasapierapracoŭčy kambinat «Uładzimirski standart». U 2018 hodzie, kali jon staŭ deputatam ad «Adzinaj Rasii», zadekłaravaŭ dachod u 9,97 młrd rubloŭ i ŭznačaliŭ rejtynh Forbes pa dachodach dziaržsłužačych i deputataŭ. U nastupnym hodzie jon zaniaŭ 26-je miesca, a ŭ 2021-m u śpis užo nie trapiŭ.
U červieni ŭ zapisie Antava ŭ Whatsapp źjaviłasia storys pra abstreł rasijskimi vajskoŭcami žyłoha doma ŭ Kijevie. Ad traplańnia rakiety ŭ šmatpaviarchoŭku paciarpieli šeść čałaviek, u tym liku rasijskaja hramadzianka i jaje dačka; muž žančyny zahinuŭ. U storys Antava byli słovy: «Pa praŭdzie kažučy, inakš, čym teror, heta ŭsio nazvać vielmi składana».
Nieŭzabavie storys vydalili, a Antaŭ nazvaŭ jaje «vynikam techničnaj pamyłki». «Padkreślu jašče raz, što ja źjaŭlajusia prychilnikam prezidenta i patryjotam svajoj krainy, ščyra padzialaju mety «SVA», — dadaŭ tady «adzinaros».
