Fota: biathlon.by
Miedali i kankurencyja
Paśla pačatku vajny va Ukrainie biełarusy, jak i rasijanie, atrymali zabaronu na ŭdzieł u mižnarodnych spabornictvach pa bijatłonie. U ich rasparadžeńni ciapier tolki Kubak Biełarusi, Kubak Rasii i Kubak Sadružnaści, i, hledziačy na vyniki, biełarusam tam nie nadta cikava. Naprykład, lidarka biełaruskaj zbornaj Dzinara Alimbiekava ciapier ačolvaje žanočy miedalny zalik Kubka Sadružnaści, jaje muž Anton Smolski — na druhoj prystupcy anałahičnaha zaliku ŭ mužčyn. Za Dzinaraj i Antonam zastalisia i pryzavyja miescy ŭ bolšaści etapaŭ Kubka Rasii, u jakich jany ŭdzielničali. Taksama hetyja bijatłanisty, jakija padpisali ŭ svoj čas praŭładny list spartoŭcaŭ, vyjhrali pa dźvie honki Kubka Biełarusi — sprynt i pieraśled.
Što da astatnich biełaruskich zbornikaŭ, ich vyniki mienš jarkija. Bijatłanistki, akramia Alimbiekavaj, tolki čatyry razy zajazdžali ŭ top-10 pa vynikach honak, i najlepšy vynik pakazała Alena Kručynkina na Kubku Razani ŭ kancy śniežnia — 5-je miesca.
U pačatku studzienia Alimbiekava kazała pra etap Kubka Sadružnaści ŭ Razani, dzie zavajavała dva zołata: «Nasamreč dzieści ŭźnikała dumka pra toje, jak usio dobra idzie, usio lohka, niama z kim paspaborničać». A jaje muž pryznavaŭ, što «ŭ žančyn krychu kankurencyja asłablenaja i kankuryruje pamiž saboj u asnoŭnym čałaviek šeść».
Tym časam, jak ich kalehi zmahalisia ŭ Rasii, dźvie biełaruskija bijatłanistki adznačylisia na inšym poli. U śniežni z roźnicaj u dzień naradzili dziaciej Hanna Soła i Iryna Leščanka (raniej Kryŭko). Hledziačy na akaŭnt u instahramie, Soła ŭžo viarnułasia na łyžniu, i heta mienš čym praź miesiac paśla rodaŭ, ale pakul tolki dla trenirovak.
Prezidenckija bali i katok la Kramla
Niadaŭna Alaksandr Łukašenka ŭručyŭ Smolskamu premiju «Biełaruski spartyŭny Alimp». Hetaja premija była b šarahovaj padziejaj, kali b nie adna akaličnaść. Na cyrymonii Łukašenka pieradaŭ Smolskamu bukiet, jaki paprasiŭ pieradać žoncy bijatłanista Alimbiekavaj, — Anton tak i zrabiŭ.
Paźniej fota kvietak źjaviłasia ŭ instahramie Dzinary, a jaje muž zapisaŭ videa, dzie dziakavaŭ Łukašenku za atrymany «nakaz» i za kvietki dla žonki.
Napeŭna, najlepšamu bijatłanistu Biełarusi było b što skazać Łukašenku i pra spartovy ban praz vajnu, jaki, mahčyma, pazbaviŭ Smolskaha i jaho žonku mižnarodnaj karjery. Adnak i namiokaŭ na niejkija vykazvańni pra vajnu ad Antona nie było.
Dzinara ž pra mir vykazvałasia. U Novy hod dziaŭčyna vykłała storys, dzie napisała nastupnyja słovy: «Mirnaha nieba nam usim — samaje hałoŭnaje žadańnie 2022 hoda». Praŭda, hetyja słovy supravadžalisia kadrami taho, jak Dzinara bavić čas na katku la maskoŭskaha Kramla — taho samaha miesca, adkul zychodziać złačynnyja zahady ŭ čas rasijskaj vajny suprać Ukrainy.
Za pieršuju pałovu studzienia lidary biełaruskaha bijatłona, Smolski i Alimbiekava, paśpieli adznačycca jašče i na bali, jaki ładziŭ Łukašenka 14 studzienia, u dzień, kali rasijskaja rakieta źniesła padjezd žyłoha doma va ŭkrainskim Dniapry i zabrała žyćci 44 čałaviek.
Dźvie biełaruski ŭ suśvietnym bijatłonie, ale daloka nie ŭ topie
Pakul biełaruskija bijatłanisty starajucca ŭziać jak maha bolš ad sportu va ŭmovach banu, ich byłyja supierniki i supiernicy skarajuć etapy Kubka śvietu. Naprykład, u mužčynskim asabistym zaliku Kubka śvietu zaraz lidzirujuć narviežcy — Jochanes Bio, Sturła Chołm Lehrejd i Vietle Šosta Kryścijansen, kankurenty Smolskaha ŭ davajennym bijatłonnym śviecie.
Anałahičnaja karcina i ŭ žanočym bijatłonie. Naprykład, adzinym asabistym miedalom Alimbiekavaj na Kubku śvietu 2021/2022 hadoŭ stała srebra mas-startu ŭ italjanskim Antcholcy, francužanka Žulija Simon stała tady dziasiataj. Ciapier Simon — lidarka žanočaha zaliku na sioletnim Kubku.
Adnak na suśvietnych spabornictvach jość dźvie biełaruski, jakija vystupajuć za zamiežnyja zbornyja. Heta Darja Błaško, jakaja niekali pierajšła va ŭkrainskuju nacyjanałku, i Nastaśsia Kinunien (raniej Dubarezava), na siońnia spartoŭka finskaj zbornaj. Pakul što vysokich vynikaŭ biełaruski nie pakazvajuć, ich najlepšyja indyvidualnyja pakazčyki takija: 43-je miesca dla Kinunien u spryncie na etapie KS u finskim Kantyjałachci i takoje ž miesca Błaško ŭ paśjucie na etapie ŭ słavienskaj Paklucy.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Sankcyi, što nie pracujuć. Jak paskoryłasia dehradacyja biełaruskaha sportu paśla pačatku vajny
Hety bijatłanist — adzin ź lepšych u Biełarusi. Jaho historyja kachańnia raskałoła žanočuju zbornuju
«Usio pieraviernutaje z noh na hałavu». Słavuty biełaruski łyžnik Siarhiej Dalidovič asieŭ u Zakapanym
