Žychary Pružan stajać u čarzie pa vadu. Fota: «Rajonnyja budni»
U horadzie vada źnikła rankam 16 studzienia. Miascovyja žychary adznačajuć, što jaje adklučyli adrazu absalutna ŭsiudy. Pavodle ich, adbyłasia «technahiennaja katastrofa rajonnaha maštabu».
«Niama vady i nie kažuć, kali jaje daduć. Šmat hadoŭ žyvu, ale takoj situacyi nie zhadaju, — adznačaje žycharka rajcentra.
Žančyna kaža, što paśpieła kupić butylavanaj vady dla pićcia i ježy.
«U svajaka jość studnia, dyk u jaho nabrali jašče, dy i doždž cełuju noč išoŭ, dapamoh z vadoj dla techničnych patrebaŭ», — raskazvaje surazmoŭnica.
Pružany biez vady
Pavodle miascovaha rajvykankama, 16 studzienia padača vady spažyŭcam była prypynienaja ŭ suviazi z praviadzieńniem avaryjna-adnaŭlalnych prac na sietkach vodazabieśpiačeńnia i kanalizacyi horada.
Pryčynaj avaryi čynoŭniki nazvali pałomku adnaho z nasosaŭ. Kab dać rady prablemie, davodziać jany, zadziejničanyja śpiecyjalisty ŭsich haradskich słužbaŭ.
«Vodazabieśpiačeńnie budzie adnoŭlena pa ramoncie ŭsich niepaładak», — paabiacaŭ rajvykankam i painfarmavaŭ žycharoŭ, što ŭ horadzie ŭ 11 miescach arhanizavany padvoz pitnoj vady, raźmieščana 37 bijatualetaŭ.
Na paviedamleńni čynoŭnikaŭ žychary rajcentra adreahavali niezadavolenymi kamientarami ŭ sacyjalnych sietkach.
«Pra padvoz usio zrazumieli. Ale, napeŭna, narod maje prava viedać, jak prasoŭvajucca raboty pa ramoncie. Kab płanavać svaje spravy», — havorycca ŭ adnym z charakternych dopisaŭ.
«Heta prosta ciažka było navat ujavić, z čym my sutykniomsia, — zaŭvažaje žycharka Pružan. — Niama vady, i nie abiacajuć, kali jaje daduć. Takoje ciapier u nas žyćcio».
Žančynie daviałosia vystajać paŭhadziny ŭ čarzie, kab nabrać dźvie butli vady.
«Zrazumieła, što pić jaje syroj nielha. Jana śmiardzić, ale inšaj niama», — narakaje jana.
Rajonny centr hihijeny i epidemijałohii nastojliva paraiŭ žycharam kipiacić vadu, nabranuju ŭ miescach jaje padvozu, pierad užyvańniem.
«U horadzie vady pakul niama, ale ŭsio pracuje. Škoły, balnica. Pastavili bijatualety, arhanizavany padvoz vady», — raskazvaje pra situacyju jašče adna surazmoŭnica.
Jana kaža, što joj pašancavała z vadoj.
«U mianie svoj kałodziež u dvary ad babuli zastaŭsia. Ale nie va ŭsich haradžan jość takaja vyhoda», — zaŭvažaje žančyna.
U rajonnaj balnicy abmiežvanńni ŭ pryjomie pacyjentaŭ. Fota: instagram.com/pruzhany_crb/
Tym časam Centralnaja rajonnaja balnica paviedamiła, što z-za situacyi z vadoj abmiežavanaja płanavanaja špitalizacyja i pryjom analizaŭ «da momantu padačy vady».
U balnicy kažuć, što vadu im pryvoziać try razy na dzień, a pacyjenty jaduć z adnarazovaha posudu.
«Sami razumiećcie, jakaja moža być situacyja biez vady. My ž balnica. Nam jana patrebnaja navat dla padtrymańnia zvyčajnaj hihijeny: padłohu pamyć, prybiralni. Pakul pastavili ŭ dvary bijatualety», — raskazała adna z supracoŭnic lakarni.
Taksama abmiežavany pryjom pacyjentaŭ stamatałahičnaha profilu. Dapamohu im akažuć tolki ŭ ekstrannych vypadkach.
Paŭpłyvała adklučeńnie vady i na funkcyjanavańnie piaci miascovych škoł. Ich naviedvaje 747 vučniaŭ.
Namieśnik staršyni Pružanskaha rajvykankama Vadzim Kraŭčuk zapeŭnivaje: usie navučalnyja ŭstanovy zabiaśpiečanyja pryvaznoj vadoj, a adukacyjny praces arhanizavany ŭ štatnym režymie.
«Pry dvuchrazovym charčavańni škoły ŭ poŭnaj miery zabiaśpiečanyja suchimi pajkami i adnarazovym posudam. U troch škołach ustanoŭleny bijaprybiralni, u dźviuch dziejničajuć nadvornyja prybiralni», — davodzić čynoŭnik.
Pa słovach miascovych žycharoŭ, u dziciačych sadach baćkam paviedamili, kab dziaciej nie pryvodzili, pakul vady niama. U škołach vučniam treba być sa svajoj vadoj i vilhotnymi survetkami.
Pružany biez vady. Pić pryvaznuju vadu možna tolki pa kipiačeńni
U kramach raskuplenaja butylavanaja vada. Niekatoryja handlary ŭ sacyjalnych sietkach paviedamlajuć, što jany buduć dastaŭlać vadu pa źnižanych cenach, pakul prablema nie budzie vyrašana.
Vyrašyć prablemu z vadoj rajvykankam abiacaŭ da 10 hadzin ranicy 17 studzienia. Ciapier kaža, što vodazabieśpiačeńnie budzie adnoŭlenaje da viečara hetaha dnia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Z-za avaryi zastalisia biez vady Pružany. I heta nie na adzin dzień
U Drybinie haračuju vadu dajuć tolki ranicaj i viečaram, kruhłyja sutki — niavyhadna
U Minsku zatapiła cełuju vulicu
