16 studzienia sud razhladaŭ apielacyju, dzie istcom była Kurylskaja, a adkazčykam — Staś. U sud himnastku pryviało žadańnie vyznačyć, što častka niejkaj ździełki źjaŭlajecca nikčemnaj (heta značyć nie maje jurydyčnaj siły), a taksama pytańnie spahnańnia alimientaŭ i sudovych vydatkaŭ.
Para šmat hadoŭ była ŭ šlubie, ale ci znachodzicca ŭ im ciapier — dakładna nieviadoma. Adnak na staroncy bronzavaj pryziorki ČS i ČIE pa mastackaj himnastycy ŭ Instagram nie zastałosia nivodnaj fatahrafii sa Stasiem.
Adkładali śviatkavańnie viasiella z-za kryzisu, dziaciej-bliźniat addali ŭ chakiej
Valeryja paznajomiłasia z chakieistam Stasiem padčas atrymańnia vyšejšaj adukacyi ŭ BDUFK, jaki, pavodle jaho słoŭ, «hady ŭ rady zajšoŭ na vučobu». Sustrakacca maładyja ludzi pačali ŭ studzieni 2009-ha. Paśla spartyŭnaj karjery himnastka sprabavała siabie ŭ jakaści madeli, a ŭ 2010-m stała ŭdzielnicaj konkursu «Mis Biełaruś» — tam ničoha nie vyjhrała, zatoje adrazu paśla konkursu atrymała prapanovu ad svajho abrańnika, što pierakryła ŭsio zasmučeńnie.
Spartsmieny raśpisalisia ŭ 2011-m, pryčym farmalna viasielle było dva razy: spačatku ŭ Minsku, a potym na zamiežnym kurorcie padčas miadovaha miesiaca. A voś uračystaść na šyrokuju nahu adkłali na hod z-za finansavaha kryzisu. Nakolki viadoma, proźvišča Kurylskaja ŭ šlubie aficyjna nie mianiała.
U vyniku Valeryja zamiest podyumaŭ skancentravałasia na chatnich spravach. A ŭ lutym 2013-ha naradziła bliźniat — synoŭ Alaksieja i Arciemija. Dzieci pajšli pa šlachu baćki i pačali zajmacca chakiejem u adnoj ź minskich škoł.
«Chakiej dla mianie — heta ŭžo žyćcio. Ranicaj — treniroŭki dziaciej, uviečary — chakiej muža. Časam chočacca, viadoma, uziać paŭzu — ni chakieja, ničoha. Ale ja razumieju, što tak nie zmahu. Chaciełasia b hodna prajści naš šlach», — raspaviadała Kurylskaja na dziaržTB u kastryčniku 2020-ha.
Žonka ŭstavała na abaronu muža — kažuć, za heta atrymała pa tvary ad jaho adnakłubnika (jość viersija, što było naadvarot)
U 2016-m Staś trapiŭ u skandał na chakiejnym ČS — paśla niečakanaj parazy Biełarusi ad Vienhryi (2:5) jaho paprasili pra kamientaryj, na što chakieist adkazaŭ vielmi hruba. Praŭda, praź niekatory čas jon astyŭ i prynios svaje prabačeńni.
A voś Kurylskaja tady ŭstała na abaronu muža z dapamohaj sacsietak. Tam jana napisała hnieŭny post, u jakim zajaviła, što «nieviadomy pradstaŭnik nieviadomaha ŚMI» prosta chacieŭ prasłavicca za košt Stasia, i pažadała asabista paznajomicca z «kryŭdzicielem» svajho muža, kab vykazać jamu, što pra jaho dumaje. Ci adbyłasia takaja sustreča — nieviadoma.
A na styku 2017-ha i 2018-ha žadańnie abaranić muža, jak kažuć, kaštavała Kurylskaj vielmi niepryjemnaha epizodu ŭ žyćci. Tady Staś vystupaŭ u omskim «Avanhardzie», u raździavalni jakoha tleŭ kanflikt — 16 hulcoŭ patrabavali adstaŭki (i ŭ vyniku jaje dabilisia) biełaruskaha hałoŭnaha treniera Andreja Skabiełki, čyje mietady ich nie zadavalniali, a inšyja hulcy vystupać suprać koŭča nie stali. U vyniku napružanaść pierarasła ŭ kanflikt na navahodnim karparatyvie kłuba — i, pa śćviardžeńniach insajdaraŭ, niemały pa habarytach sukamandnik Michaił Fisienka źbiŭ Stasia, u vyniku čaho Andrej atrymaŭ nie tolki ranki i finhały, ale i pierałom nosa, a supracoŭnikam restarana, dzie prachodziła mierapryjemstva, pryjšłosia admyvać łužynu kryvi. Niadziŭna, što na pieršy paśla hetych padziej matč Staś vyjšaŭ u achoŭnaj mascy, pad jakoj usio roŭna byli bačnyja ślady źbićcia na tvary.
Kurylskaja, jak paviedamlałasia, sprabavała vyratavać Stasia i raźniać bojku — ale ŭ vyniku tolki atrymała pa tvary ad jašče adnaho adnakłubnika muža Michaiła Čudzinava, ad čaho nibyta navat «adlacieła». Kali da eks-himnastki źviarnulisia pa kamientaryj, jana skazała, što «nie budzie admaŭlać fakty», ale raskazvać jakija-niebudź padrabiaznaści admoviłasia.
Adznačym, što paźniej inšyja krynicy paviedamili i alternatyŭnuju viersiju — zajavili, što bojku spravakavała sama Kurylskaja, jakaja nibyta vyjaviła niejkuju niepavahu da ŭdzielnikaŭ karparatyvu, paśla čaho Staś vyrašyŭ abaranić žonku, z-za čaho i paciarpieŭ.
U 2020-m Staś byŭ suprać hvałtu (ale praz hod vinšavaŭ Łukašenku)
Kali paśla prezidenckich vybaraŭ—2020 Staś byŭ adnym z tych, chto vystupiŭ suprać hvałtu. 18 žniŭnia 2020-ha chakieist zajaviŭ, što jon choča, kab «mirnych ludziej nie čapali», dy i ŭvohule ŭ Biełarusi «žach niejki robicca, kali heta praŭda».
Adnak bolš nijakich padobnych vykazvańniaŭ Staś nie dapuskaŭ, a praz hod paśla tych słoŭ saliravaŭ u videa, dzie chakieisty zbornaj Biełarusi ŭśled za pravałam u alimpijskaj kvalifikacyi vinšavali Łukašenku z dniom naradžeńnia.
Hadavy zarobak 326 tysiač dalaraŭ
Apošnim časam pa pary Staś — Kurylskaja naviny pastupali tolki pra chakieista, bo jon praciahvaje svaju karjeru. Hulec, jaki ŭvachodzić u top-10 pa kolkaści matčaŭ u KCHŁ, druhi siezon pravodzić u šerahach čalabinskaha «Traktara». Hadavaja zarpłata Andreja ŭ Čalabinsku składaje 22 miljony rasijskich rubloŭ (326 tysiač dalaraŭ) — heta 13-y pakazčyk u kamandzie i, viadoma, vialikaja baza dla vypłaty alimientaŭ.
Pierad startam siezona Staś atrymaŭ našyŭku asistenta kapitana, a jašče vydatna hladzicca na ŭkidvańni, vyjhrajučy 61,2% sprob (4-y pa lizie). Voś tolki hałoŭny chakiejny pakazčyk — kolkaść nabranych ačkoŭ — u chakieista minimalny. Na jaho rachunku ŭ siezonie-2022/23 try asista, nu a pieršuju šajbu forvard zakinuŭ tolki paru dzion tamu — 13 studzienia, u 42-m dla siabie matčy (paciarpieŭ maskoŭski «Spartak»).
