Pavieł Kuprejčyk, Taras Mačynski, Dźmitryj Sałaviančyk
U zaležnaści ad roli kožnaha, mužčyn abvinavačvajuć pa troch artykułach Kryminalnaha kodeksa: art. 358-1 (ahienturnaja dziejnaść), č. 1 art. 356 (zdrada dziaržavie), č. 1 art. 405 (pakryvalnictva złačynstvaŭ). Spravu budzie razhladać viadomy svajoj pracaj pa palityčnych spravach sudździa Rusłan Caruk. Praces pakul adkryty, piša «Viasna».
Try miesiacy tamu na dziaržaŭnym telebačańni vypuścili videasiužet, u jakim paviedamlałasia, što nibyta «KDB Biełarusi spyniŭ dziejnaść ahientury vajskovaj raźviedki Ukrainy». U siužecie pakazvajucca try zatrymanyja. Heta hramadzianin Ukrainy, pradprymalnik Pavieł Kupryjenka, i dvoje hramadzian Biełarusi — žychary Homielščyny Dźmitryj Sałaviančyk i Taras Mačynski. Pry hetym paviedamlajecca, što Mačynski atrymaŭ biełaruskaje hramadzianstva tolki ŭ 2010 hodzie — prapahandysty jaho nazyvajuć «byłym ukraincam». A Sałaviančyk pracavaŭ kurjeram u kampanii Kupryjenki.
Paviedamlajecca, što ŭ Paŭła Kupryjenki «byli zadańni ŭ tym liku manitorynhu hramadska-palityčnaj abstanoŭki ŭ Biełarusi».
U jaho nibyta znajšli dakumient za podpisam načalnika Hałoŭnaha ŭpraŭleńnia raźviedki Minabarony Ukrainy Kiryła Budanava.
Prapahandysty svviardžajuć, što Kupryjenku zavierbavali ŭkrainskija śpiecsłužby. Tarasa Mačynskaha abvinavačvajuć u tym, što jon pieradavaŭ danyja ab raźmiaščeńni i pierasoŭvańni pa Biełarusi vajskovaj techniki Kupryjenku, a toj, u svaju čarhu, — ukrainskim śpiecsłužbam. Śćviardžajecca, što Sałaviančyka «vykarystoŭvali ŭciomnuju». U videasiužecie raspaviadajuć, što Dźmitryj zdymaŭ pieramiaščeńnie vajskovaj techniki ŭ Biełarusi i prasiŭ pra heta rodnych, a potym pieradavaŭ Kupryjenku, «nie viedajučy, dla čaho jany jamu».
Paviedamlałasia, što ŭ dačynieńni da Kupryjenki raspačali kryminalnuju spravu pa artykule «Ahienturnaja dziejnaść», jakaja praduhledžvaje ad troch da siami hadoŭ pazbaŭleńnia voli. A suprać Sałaviančyka i Mačynskaha — pa artykule «Zdrada dziaržavie», pa jakoj praduhledžana da 15 hadoŭ pazbaŭleńnia voli.
20 kastryčnika pra ich zatrymańnie vykazvaŭsia kiraŭnik KDB Ivan Cierciel:
«My bačym aktyvizacyju viadzieńnia ahienturnaj raźviedki z boku ŭkrainskich zamiežnych śpiecsłužbaŭ. Zusim niadaŭna nami była spyniena praca na našaj terytoryi stvoranaj vajskovaj vyviedkaj Ukrainy rezidentury. Zatrymany rezident, hramadzianin Ukrainy, i dvoje našych hramadzian, jakija stupili na šlach zdrady i pracavali ŭ intaresach zamiežnaj dziaržavy».
KDB spatrebiłasia tolki try miesiacy dla rasśledavańnia hetaj spravy i pieradačy jaje ŭ sud.
