Vałnavachu rasijanie abstralali ŭžo 25 lutaha. Z 27 lutaha tam pačalisia nadzvyčaj žorstkija bai. Bambardziroŭki horada nahadvali siryjski scenar. Užo praz paru dzion Vałnavacha była na miažy humanitarnaj katastrofy i praktyčna całkam źniščanaja. U horadzie nie było ježy, vady i elektryčnaści, na vulicach lažali cieły zabitych ludziej. 11 sakavika rasijanie całkam zaniali horad, tym samym samknuŭšy koła akružeńnia Maryupala.
Žančyna kaža, što była ŭ horadzie padčas bajoŭ.
«Jany bambili samalotami, jany bili z «Hradaŭ», a potym jašče vystavili ŭ jutubie, jak z boku Buhasa staić šeść «Hradaŭ» i łupić pa Vałnavasie. Jany navat sami radujucca», — uzhadvaje jana.
Ciapier, kaža jana, rasijanie zapeŭnivajuć, što Vałnavachu razburyli «banderaŭcy».
«Jakija banderaŭcy? Jakija tam banderaŭcy? My ruskamoŭnyja. Narmalna da nas stavilisia. Nichto nas nie pryciskaŭ. Chto nas prymusić?»
Jana raspaviadaje, što syšła na piensiju ŭ 2006 hodzie, u ich užo tady była dakumientacyja na ŭkrainskaj movie. «Nas heta nie napružvała. Doma my ŭsie razmaŭlali pa-rusku. Nichto nas nie pryciskaŭ. Biazhłuździca heta».
Jaje siastra paśla 2014 hoda apynułasia ŭ «DNR», u Makiejeŭcy, — žančyna i sama adtul rodam. «Jany pryjazdžali da nas, afarmlali pašparty ŭkrainskija, kab była mahčymaść kudyści vyjechać, piensii afarmlali, za naradžeńnie dziciaci — usio heta jany atrymlivali na Ukrainie. Piensii atrymlivać pryjazdžali ŭ Vałnavachu. I raptam… My nie dumali, što heta tak usio pačniecca.
My nie padrychtavalisia. My biehli: u mianie byli dakumienty (jakija byli sabranyja z 2014 hoda, u sumačcy tak i byli) i tabletki, bo my staryja ludzi. Usio. My 13 dzion byli ŭ adnych i tych ža trusach, u tym ža adzieńni, u jakim u padvale siadzieli. My kali siudy pryjechali, my byli bamžy».
Jana kaža, što jany nie chacieli vyjazdžać, ale syn nastajaŭ, skazaŭ, što jamu tak budzie spakajniej. Syn — doktar. Jon skazaŭ: «Ja pakul svaich chvorych nie adpraŭlu, nie źjedu».
«Jany apieryravali da apošniaha, pakul nie razbambili apieracyjnuju balnicu «Hradami».
Siamja ŭ hety čas była ŭ balnicy: syn tudy pieravioz baćkoŭ. «Ścieny padali, a my lažali. Jon źvierchu na svaich dziaciej zalez i dumaŭ: kali zabjuć, dyk choć mianie, jany cełyja zastanucca».
«Jany stralali pa balnicy. Jany. A potym havorać: «Heta «bandery» stralali». Dy što ž jany sami pa sabie [stralali]?»
Rolik sabraŭ 27 tysiač łajkaŭ i 750 tysiač prahladaŭ. U kamientarach mnohija ludzi dziakavali žančynie. Ëść i šmatlikija kamientary ludziej z Vałnavachi i Maryupala, jakija pišuć, što kožnaje słova — praŭda.
Jašče adzin rolik z hetaj žančynaj, dzie jana molić biełarusaŭ nie iści vajnoj suprać Ukrainy, nabraŭ bolš za 328 tysiač prahladaŭ.
eto ž vidno