Alaksandr Łukašenka siońnia zajaviŭ hienprakuroru Andreju Šviedu, što «Zachad» praciahvaje rychtavać jaho źviaržeńnie, a Švieda ŭ vypadku pośpiechu čakaje niezajzdrosnaja budučynia. Pra heta Łukašenka kazaŭ, razvažajučy ab kamisii pa viartańni biełarusaŭ, jakija vyjechali, ukaz ab stvareńni jakoj jon padpisaŭ siońnia.
«Zachad budzie finansavać tolki kankretnyja mierapryjemstvy, — kaža Alaksandr Łukašenka. — Pažadana takoha radykalnaha płanu, i navat užo nie ŭzroŭniu 2020 hoda. Źviaržeńnie, zabojstvy prezidenta, słužbovych asob. I ty tam nie ŭ apošnich radach (heta nie dla taho, kab ciabie napałochać, ty sam heta viedaješ). Heta značyć, usich, chto ŭstaŭ papiarok horła, — usich prybrać. Heta budzie finansavać Zachad».
Asablivy niespakoj u jaho vyklikaje Połk Kalinoŭskaha.
«Usie jany kryčali: Połk Kalinoŭskaha i inšaje … Voś jany biehajuć tam, niekatoryja vialikija pałkoŭniki i padpałkoŭniki, kryčać, što «my stvarajem narodna-vyzvalenčuju armiju».
Nahadajem, niadaŭna paviedamlałasia, što ŭ Polščy atrymali dakumienty, jakija dajuć prava na doŭhaterminovaje znachodžańnie, bolš za 68 tysiač hramadzian Biełarusi, a ŭznosy sacyjalnaha strachavańnia ŭ minułym hodzie zapłacili amal 106 tysiačy biełarusaŭ. U Litvie majuć prava na pražyvańnie bolš za 48,8 tysiačy hramadzian našaj krainy.
