Štučny intelekt zdolny padabrać vam idealnaha partniora. Sumna? Zatoje nadziejna 1

Fota: pixabay

Što adbyłosia?

Źjaŭleńnie i burlivaje raźvićcio takich madelaŭ štučnaha intelektu, jak našumieły ChatGPT, nie daje ścichnuć abmierkavańniam i razvažańniam nakont śfier čałaviečaha žyćcia, jakija padobnyja niejrasietki mohuć zakranuć. A zakranuć jany praktyčna ŭsie śfiery.

Vialikaja razmoŭnaja madel, stvoranaja OpenAI, amal adrazu paśla źjaŭleńnia pačała vykarystoŭvacca siarod inšaha dla napisańnia vieršaŭ, adkazaŭ na ekzistencyjnyja pytańni pra kachańnie i žyćcio, a ciapier i dla ramantyčnaj kamunikacyi. Ciapier ChatGPT moža za ličanyja siekundy napisać dla vas pieśniu pra kachańnie, jakaja rastopić serca vašaha mahčymaha partniora. 

Vyhladaje, što ŭ niedalokaj budučyni ludzi mohuć vykarystoŭvać botaŭ u jakaści pasiarednikaŭ u razmovie — padobna tamu, jak zaraz vy možacie vykarystoŭvać pravierku arfahrafii, kab vypravić pamyłki ŭ čarnaviku elektronnaha lista. Akramia naładžvańnia dyjałohu, madeli mašynnaha navučańnia taksama mohuć zrabić pošuk pary praściejšym, bolš biaśpiečnym, z bolš šyrokimi mahčymaściami. Ale heta taksama moža zrabić spatkańni bolš nudnymi.

Jakija pierśpiektyvy vykarystańnia?

Inžyniery OpenAI stvaryli ChatGPT, zapoŭniŭšy jaho vielizarnymi abjomami tekstu (kala 300 miljardaŭ słoŭ) i navučyŭšy jaho vykonvać peŭnyja zadačy, naprykład, składać teksty prozy abo adkazvać na pytańni — mahčymaści, viadomyja jak hienieratyŭny ŠI (štučny intelekt), u tym sensie, što bot prymaje zapyt ad karystalnika i stvaraje častku kantentu.

Taksama hienieratyŭny ŠI moža nie tolki ažyvić razmovy pamiž dvuma patencyjnymi zakachanymi, ale jon taksama moža zrabić bolš dakładnymi zdahadki ab tym, ź jakim čałaviekam u vas było b bolš šancaŭ zaviazać doŭhaterminovyja adnosiny.

Tak, zvyčajnyja słužby znajomstvaŭ nakštałt Tinder užo vykarystoŭvajuć niekatoruju technałohiju mašynnaha navučańnia, kab dapamahčy karystalnikam znachodzić inšyja adzinokija sercy, ale novyja štučnyja intelekty ŭjaŭlajuć saboj skačok napierad ad prostaha supastaŭleńnia profilaŭ. 

Naprykład, servis pošuku supadzieńniaŭ AIMM vykarystoŭvaje štučny intelekt, kab daviedacca pra​ karystalnika i paznajomić jaho z supadzieńniami prykładna hetak ža, jak heta moža zrabić svat. Stvaralniki takoha servisu nazyvajuć jaho niečym nakštałt kiravanaha šlachu, jaki moža dapamahčy źniać «usie hetyja niajomkija momanty, kali vy sustrakajeciesia abo kali vy nie viedajecie, ci padabajeciesia čałavieku, ci jon prosta zaniaty». Elektronnyja svaty pryzvanyja całkam źniać takija prablemy, kažučy naŭprost, ci sapraŭdy dva karystalniki zacikaŭlenyja ŭ praciahu kamunikacyi.

Aŭtamatyzacyja flirtu i padkazki suprać nieadekvataŭ

Inšyja startapy imknucca całkam aŭtamatyzavać flirt. Siarod ich Keys AI, stvaralniki jakoha natchnilisia faktam, što niekatorym ludziam adčajna nie chapaje navykaŭ, kab naležnym čynam mieć znosiny ź siabrami i siamjoj. Tamu byŭ stvorany virtualny trenier pa razmovie, jaki pracuje jak dadatak da kłavijatury telefona.

Vy možacie adkryć Keys AI ŭ sacyjalnych sietkach, prahramach dla znajomstvaŭ abo ŭ lubym tekstavym čacie, i jon budzie prapanoŭvać paviedamleńni dla takich typovych scenaroŭ, jak pačatak razmovy, pieranos spatkańniaŭ i navat inicyjavańnie razryvu. Vy navat možacie zahruzić skrynšot razmovy ŭ prahramu, kab jana mahła padkazać, jak rastapić lod padčas niazručnaha zacišša ŭ razmovie.

Akramia palahčeńnia razmoŭ, niadaŭnija dasiahnieńni mašynnaha navučańnia taksama mohuć zrabić znajomstvy ŭ internecie bolš biaśpiečnymi. U toj čas jak Match Group (uładalnik Tinder) i inšyja bujnyja hulcy dadali funkcyi biaśpieki z padtrymkaj ŠI, niekatoryja ekśpierty ličać, što dadatki mohuć i pavinny rabić bolš dla biaśpieki karystalnikaŭ.

Tak mohuć źjaŭlacca ałharytmy, jakija majuć dapamahčy abaranić karystalnikaŭ ad seksualnaha hvałtu. Roznyja kamandy raspracoŭščykaŭ navučajuć madeli vyjaŭlać «čyrvonyja ściažki» ŭ razmovach — słovy albo cełyja frazy, vykarystańnie jakich vašym subiasiednikam pavinna vas naściarožyć. Taksama prahramy mohuć papiaredžvać karystalnika pierad adpraŭkaj paviedamleńnia, što niejkija słovy ŭ im mohuć usprymacca jak abraźlivyja dla peŭnych kultur — niešta padobnaje da funkcyi Tinder, jakaja źjaviłasia ŭ 2021 hodzie i zapytvaje karystalnikaŭ, ci chočuć jany adpravić patencyjna škodnaje paviedamleńnie.

Dyk jakija ž minusy?

Choć dahetul usio vyhladaje davoli prystojna, ale ž kampjutarny raman maje, viadoma, i padvodnyja kamiani. Pa-pieršaje, usie razmovy, jakija kirujucca čat-botami, mohuć prytrymlivacca padobnych adno da adnaho šabłonaŭ.

Tak jak ludzi časta čerpajuć natchnieńnie dla svaich profilaŭ i razmoŭ u inšych karystalnikaŭ abo internet-hidaŭ, dadatki ŭžo mohuć zdavacca adnastajnymi. Pryroda štučnaha intelektu takaja, što madeli ruchajucca, jak śniežny kamiak z hary: nadzvyčaj chutka źbirajučy infarmacyju ad karystalnikaŭ i sajtaŭ pa ŭsim internecie. Taksama ludzi ŭ prahramach dla znajomstvaŭ mohuć rabicca vielmi padobnymi adno da adnaho — i štučny intelekt tolki paskaraje heta.

Śpiecyjalisty pa vyvučeńni ŭzajemadziejańnia čałavieka sa štučnym intelektam kažuć, što čat-boty niby ŭnifikujuć toje, pra što ludzi mohuć havaryć. Moŭnyja madeli mohuć vyhladać «kreatyŭna» ŭ tym sensie, što heta niešta novaje dla karystalnikaŭ u peŭny momant, ale ŭ hłabalnym maštabie jany mohuć prapanoŭvać padobnyja ci adnolkavyja pytańni i padkazki mnohim ludziam.

Da taho ž čałaviek moža taksama niapravilna interpretavać ramantyku robataŭ — asabliva kali dadatki abo karystalniki dakładna nie paviedamlajuć, ci vykarystoŭvajuć jany štučny intelekt u razmovach abo asabistych bijahrafijach. Naprykład, vieršy pra kachańnie, jakija stvaraje ChatGPT, mohuć uvieści ŭ zman karystalnikaŭ, jakija zanadta šmat čytajuć pamiž radkoŭ, napisanych botam.

S. Šyjam Sundar, dyrektar Centra sacyjalna adkaznaha štučnaha intelektu ŭ Penn State University, śćviardžaje, što jaho daśledavańnie pakazała, što ludzi mohuć daviarać paviedamleńniu, stvoranamu kampjutaram, hetak ža, jak i paviedamleńniu, stvoranamu čałaviekam.

Pry hetym naša hatoŭnaść daviarać štučnamu intelektu moža zaachvocić nas prapanoŭvać usio bolš asabistych danych kampanijam, jakija stajać za botami. Niahledziačy na śćviardžeńni pradstaŭnikoŭ kampanij pra toje, što ramantyčnyja dadatki šyfrujuć infarmacyju karystalnikaŭ, heta nie harantyja, što infarmacyja nie trapić u ruki złamyśnikaŭ ci prosta rekłamadaŭcaŭ. Prahramy i veb-sajty dla znajomstvaŭ, jakija patrabujuć šmat asabistaj infarmacyi, užo majuć reputacyju raspaŭsiudžvalnikaŭ hetaj infarmacyi i, jak praviła, uraźlivyja da bujnych uzłomaŭ.

Niahledziačy na ​​​​ŭsie nieviadomyja, spadar Sundar ličyć, što nam nasamreč nie treba viedać, čałaviek ci robat napisaŭ miłyja słovy. «Udzieł ŠI stanie nastolki zvyčajnaj častkaj našaj kamunikacyi, što nam moža nie spatrebicca raskryvać infarmacyju [pra toje, što my karystajemsia ŠI], — kaža jon. — Ja dumaju, što ŭ doŭhaterminovaj pierśpiektyvie heta stanie ŭzajemapryznanaj sacyjalnaj chłuśnioj, jakuju my havorym sami sabie».

Što kaža sam robat?

Na pytańnie vydańnia Inverse, ci moža štučny intelekt dapamahčy kamuści znajści kachańnie, ChatGPT adkazaŭ:

«Jak moŭnaja madel štučnaha intelektu, ja mahu dapamahać ludziam roznymi sposabami, ale pošuk kachańnia — heta składany i asabisty dośvied, jaki lepš za ŭsio pakinuć kankretnaj asobie. U toj čas jak technałohija štučnaha intelektu moža być vykarystanaja, kab dapamahčy ludziam znajści patencyjnych partnioraŭ praz dadatki i veb-sajty dla znajomstvaŭ, praces pabudovy značnych i praciahłych adnosin u kančatkovym rachunku źjaŭlajecca čałaviečym dośviedam, jaki patrabuje emacyjnaha i sacyjalnaha intelektu, jakim štučny intelekt nie vałodaje».

14

6

2

8

4

1

Nashaniva.com