Fota: AR
Skardzina: padtrymka naroda i siamiejnaje ščaście
Pieršaj na alimpijskuju dystancyju vyjšła Nadzieja Skardzina. Na pieršaj stralbie ŭradženka Pieciarburha adstralałasia biez promachaŭ, vykarystała dva dadatkovyja patrony na stojcy. U vyniku jana pieradała nastupnaj biełaruscy estafietu dziasiataj.
Praź niekalki miesiacaŭ paśla Pchiončchana Skardzina zaviaršyła karjeru. Ale i biez sportu jana nie sumavała: udzielničała ŭ pieradačach na biełaruskim TB, razam z Alaksandraj Hierasimieniaj pracavała nad prajektam spartovaha radyjo «Sport FM», ale ideja atrymała admovu ad Administracyi Łukašenki. Nadzieja zadumvałasia pra trenierskuju karjeru i navat havaryła, što źbirajecca kansultavać łyžnikaŭ i bijatłanistaŭ praź internet, ale pajšła ŭ bok siamji. U žniŭni 2019 hoda jana vyjšła zamuž za šviejcarskaha bijatłanista Marcina Jahiera, a 10 listapada naradziła syna. Chłopčyka nazvali Daniiłam.
29 kastryčnika 2020 hoda Skardzina stała 1000-j padpisantkaj adkrytaha lista spartsmienaŭ za sumlennyja vybary. Jana vykazvała salidarnaść pratestoŭcam, źbitamu bratu jaje siabroŭki Darji Domračavaj i zvolnienaj čempijoncy śvietu pa frystajle Alaksandry Ramanoŭskaj. Kali pačałasia vajna va Ukrainie, Nadzieja vykazałasia za mir.
Ciapier alimpijskaja čempijonka žyvie ź siamjoj u Šviejcaryi i treniruje dziaciej u dvuch kłubach: u adnym zajmajecca ź dziećmi bijatłonam, u druhim — katańniem na łyžach.
Kryŭko: nievyrazny praciah karjery i dekret
Druhoj estafietu biehła Iryna Kryŭko. Sa stralboj na stojcy jana spraviłasia biez promachaŭ i piataj pieradała estafietu kalezie pa kamandzie.
Paśla Pchiončchana, kali zbornuju pakinuli Skardzina i Domračava, Kryŭko zaniała miesca lidarki kamandy. U mižsiezońnie Iryna vyjšła zamuž za servismiena biełaruskaj zbornaj Arcioma Leščanku, ale karjeru na paŭzu stavić nie stała.
Siezon 2018/2019 prynios joj srebra i bronzu čempijanatu Jeŭropy, a taksama 15 miesca ŭ ahulnym zaliku Kubka śvietu. A voś nastupny siezon, 2019/2020, atrymaŭsia dla Iryny mienš udałym — u tym ža zaliku KS jana dabrałasia tolki da 45 miesca (praŭda, maje dva srebra z estafiet na etapach u Abierchofie i Novie-Miasta).
Paśla vybaraŭ bijatłanistka padpisała praŭładny list spartsmienaŭ. U siezonie 2020/2021 najlepšy vynik spartsmienki — 15 miesca na spryncie ŭ finskim Kantyjałachci, u nastupnym siezonie jana nie padymałasia vyšej za 16 miesca spryntu ŭ Abierchofie. Adnak jašče była srebranaja estafietnaja honka na etapie Kubka śvietu ŭ Estersundzie, jakuju Iryna biehła razam z kalehaj pa pchiončchanskim miedalam Dzinaraj Alimbiekavaj.
Na zimovuju Alimpijadu ŭ Piekin bijatłanistka, ciapier užo pad proźviščam Leščanka, jašče źjeździła, a potym pačałasia vajna va Ukrainie, i biełaruski bijatłon trapiŭ pad ban na mižnarodnych spabornictvach. Leščanka razam z kalehami pa zbornaj źmianiła suśvietna viadomyja trasy na turniry ŭ Rasii i nijakaha niezadavalnieńnia na hety kont nie vykazała.
U žniŭni 2022 hoda stała viadoma, što Iryna prapuścić siezon, bo pajšła ŭ dekret. U śniežni jana naradziła dačku.
Alimbiekava — karaleva rasijskich tras
Paśla Iryny na dystancyju vyjšła Dzinara Alimbiekava, samaja niedaśviedčanaja na toj čas spartsmienka z estafietnaj biełaruskaj kamandy. Pieršyja dva vystrały ŭ Dzinary pralacieli mima mišeniaŭ, ale samu honku jana pačała vielmi dobra, i ŭ vyniku čaćviortaj pieradała estafietu apošniaj ź biełarusak.
Ciapier Dzinara — adzin z tvaraŭ praŭładnaha biełaruskaha sportu. Razam z mužam Antonam Smolskim bijatłanistka, ciapier taksama Smolskaja, udzielničaje ŭ tych turnirach, što im zastalisia, — razmova pra biełaruskija i sumiesnyja z rasijanami turniry. Viadoma, padpisantka praŭładnaha lista nie vykazvajecca ni suprać vajny va Ukrainie, što pazbaviła jaje suśvietnych tras, ni suprać represij u Biełarusi, zatoje z achvotaj prymaje, naprykład, bukiet, pieradadzieny joj Alaksandram Łukašenkam praz muža Smolskaha (ź jakim jana, vierahodna, pačała sustrakacca jašče padčas jaho minułaha šlubu, što źviazvajuć z kanfliktam u žanočaj zbornaj).
Ciapier Dzinara — lidarka biełaruskaj zbornaj.
Raskažam trochi pra davajennyja vystupy Dzinary. Paśla zołata ŭ Pchiončchanie jana atrymała stabilnaje miesca ŭ pieršym składzie zbornaj, najlepšy vynik za 2018/2019 hod — 13-je miesca ŭ spryncie ŭ Estersundzie. U nastupnym siezonie Alimbiekava nie padymałasia vyšej za 33-je miesca ŭ indyvidualnaj honcy ŭ tym ža Estersundzie, a voś u siezonie 2020/2021 narešcie pajšła ŭvierch: uziała zołata spryntu ŭ Chachfilcenie i try srebry na etapach Kubka śvietu. U nastupnym siezonie Dzinara paśpieła ŭchapić srebra mas-startu ŭ Antcholcy, a potym była vajna — i dalej vy ŭžo viedajecie.
Domračava: pierajechała ŭ Manaka
Tuju słavutuju estafietu-2018 Darja Domračava biehła apošniaj — i, mahčyma, kali b nie jaje dośvied i zdolnaści, zołata b i nie było. Paśla Alimpijady Domračava, jak i jaje siabroŭka Nadzieja Skardzina, skončyła karjeru. U vieraśni 2019 hoda jana ŭznačaliła žanočuju zbornuju Kitaja pa bijatłonie, a jaje muž, tytułavany narviežski bijatłanist Ule-Ejnar Bjorndalen, staŭ hałoŭnym trenieram mužčynskaj zbornaj.
Vierahodna, zadača zaciahnuć kitajskich bijatłanistaŭ na alimpijski pjedestał akazałasia dla Domračavaj i jaje muža niepadjomnaj: na Hulniach u Piekinie zbornaja Kitaja była dalokaja ad miedaloŭ, i Darja z mužam pakinuli svaje pasady. Pa apošnich danych, ciapier Domračava žyvie ŭ Manaka, dzie jaje dačka Ksienija pajšła ŭ škołu.
Ad Domračavaj, jak ad hałoŭnaj zorki biełaruskaha bijatłona, zvyštytułavanaj spartsmienki i ŭładalnicy zvańnia Hieroj Biełarusi čakali ŭ 2020 hodzie padtrymki naroda. Ale spartsmienka admiažoŭvałasia ćmianymi zaklikami «spynić hvałt», adrasat jakich nie byŭ zrazumieły, i nie nadta źmianiła rytoryku navat paśla taho, jak siłaviki źbili jaje rodnaha brata Mikitu.
Što da vajny va Ukrainie, to Darja znoŭ vykazałasia davoli ćmiana: maŭlaŭ, jana za mir, ale hetak ža, jak vajna, jaje aburaje spartovy ban dla rasijskich i biełaruskich atletaŭ. Praz usio heta Domračava trapiła pad mocnuju krytyku i ŭ sacsietkach, i z boku byłych kaleh-spartsmienaŭ, ale mianiać svajo mierkavańnie nie stała.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»MAK patłumačyŭ, jak represavanyja biełaruskija spartsmieny zmohuć vystupić na Alimpijadzie-2024
«Bali i abdymanki z Łukašenkam — nie palityka?» Spytali ŭ sumlennych spartsmienaŭ, ci varta źniać spartovy ban z Rasii i Biełarusi
«Słava Ukrainie!» Hulec, jakoha Łukašenka prasiŭ nie źbiahać ź Biełarusi, pierajechaŭ va Ukrainu
