Fota: pres-słužba handbolnaha kłuba «Miaškoŭ Brest»
U lutym 2023-ha ŭ Breście byŭ niečakana zaŭvažany ŭkrainski śpiecyjalist Siarhiej Biabieška (ciapier jon žyvie ŭ Ispanii).
Heta byŭ nie prosta vizit pa staroj pamiaci ŭ horad, dzie Biabieška treniravaŭ z 2015-ha pa 2018-y. Trenier moh znoŭ uznačalić «Miaškoŭ» i navat byŭ da hetaha blizki, ale pahadnieńnie sarvałasia.
Heta ździŭlaje najpierš praz toje, jakuju pazicyju Biabieška zaniaŭ paśla pačatku vajny va Ukrainie. Tady koŭč, jaki ŭznačalvaŭ rasijski kłub «Danskija kazaki — JUFU», adrazu ž jaho pakinuŭ, a zatym daŭ intervju «Trybunie», dzie vyrazna vykazaŭsia suprać bajavych dziejańniaŭ režymu Pucina, a zaadno zakranuŭ i biełaruskuju tematyku.
Biabieška skazaŭ, što na vybarach u našaj krainie «malujuć pracenty jašče da pačatku hałasavańnia», ludzi paśla ich «pratestavali, małajcy», a pośpiechu nie dabilisia, tamu što «vakoł dyktatura, i dyktatary ŭ kryvi mohuć utapić narod».
Dy i prosta abvinavaciŭ Łukašenku ŭ chłuśni pa temie saŭdziełu ŭ vajnie. Toj fakt, što biełaruskija handbalisty addajuć pieravahu pa ŭsich hetych nahodach maŭčać, treniera «zasmučvaŭ», bo, na jaho dumku, «prosta nazirać — heta niapravilna».
U studzieni 2023-ha vyjšła jaho intervju «Lusterku», dzie trenier iznoŭ zajaviŭ, što «Pucin i Łukašenka — adnaznačna dyktatary», a ŭ biełaruskich spartoŭcaŭ «u asnoŭnym «chata z kraju», heta «niaščasnyja ludzi z bajaźlivaściu».
Pry takoj rytorycy trenier razhladaŭ varyjant z Brestam. Čamu jon sarvaŭsia, možna tolki zdahadvacca.
