Ajva Pietersan. Fota: ERR
U Estonii troje mužčyn, u tym liku lidar ruchu Koos («Razam») Ajva Pietersan, jaki nieadnarazova vystupaŭ u padtrymku Rasii, byli zatrymanyja pa padazreńni ŭ «stvareńni abo padtrymańni adnosin z zamiežnaj dziaržavaj, zamiežnaj arhanizacyjaj abo asobaj, jakaja dziejničaje pa zadańni zamiežnaj dziaržavy, z metaj ździajśnieńnia złačynstva», paviedamlaje DW sa spasyłkaj na estonskija ŚMI. Hety kryminalny artykuł estonskaha zakanadaŭstva praduhledžvaje da šaści hadoŭ pazbaŭleńnia voli.
Pavodle infarmacyi estonskaj nacyjanalnaj teleradyjoviaščalnaj kampanii ERR, zatrymańnie było praviedzienaje palicyjaj biaśpieki ŭ noč na 10 sakavika. Imiony dvuch inšych mužčyn, zatrymanych razam ź Pietersanam, — Dźmitryj Raotsi i Andrej Andronaŭ. Pieršy ź ich taksama, jak i Pietersan, źjaŭlajecca estonskim hramadzianinam. Andronaŭ maje rasijskaje hramadzianstva i pastajanny vid na žycharstva ŭ Estonii.
Jak paviedamiła pres-sakratarka prakuratury Kajry Kiunhas, sud zadavoliŭ chadajnictva dziaržaŭnaj prakuratury i pryznaŭ padazreńni ŭ ździajśnieńni złačynstva abhruntavanymi. Pa rašeńni suda, mužčyny pavinny być uziatyja pad vartu na termin da dvuch miesiacaŭ. Pastanova jašče nie nabyła moc i moža być abskardžanaja ŭ Talinskim akruhovym sudzie.
Udzieł Pietersana ŭ vybarach i pajezdka ŭ Danieck
U pačatku sakavika Ajva Pietersan bałatavaŭsia na vybarach u estonski parłamient Ryjhikohu pa śpisie Abjadnanaj levaj partyi Estonii ŭ pieravažna ruskamoŭnym rehijonie na paŭnočnym uschodzie krainy Ida-Virumaa. Za jaho było addadziena 3969 hałasoŭ, ale hetaha nie chapiła, kab atrymać deputacki mandat.
U kancy lutaha Pietersan naviedaŭ akupavany rasijskimi vojskami Danieck i vystupiŭ u efiry Uładzimira Sałaŭjova.
Čytajcie taksama: Vybary ŭ Estonii i Litvie: suviaź z Maskvoj stała styhmaj navat dla ruskamoŭnaha vybarca
