Volha Pietuch na sudzie
Vinu nie pryznaje, z sukamiernikami aściarožnaja i abačlivaja
Byłuju supracoŭnicu haścinicy «Jeŭropa» Volhu Pietuch abvinavačvajuć pa 5 kryminalnych artykułach, siarod jakich «Teraryzm», «Zmova dla zachopu dziaržaŭnaj ułady», «Hvałt u adnosinach da supracoŭnika orhanaŭ unutranych spraŭ». Jaje schapili 13 žniŭnia 2021 hoda i ŭtrymlivajuć u SIZA-1. Svajoj viny žančyna nie pryznaje. Jakuju rolu joj advioŭ KDB u spravie, źviazanaj sa sprobaj padpału doma Hajdukieviča, pakul niajasna. U joj fihuruje bahata byłych siłavikoŭ.
Byłaja niavolnica Vaładarki, jakaja paprasiła ab ananimnaści, prasiadzieła z Volhaj Pietuch u adnoj kamiery amal čatyry miesiacy i stała jaje blizkaj siabroŭkaj. Pa jaje słovach, Volhu vyłučaje vysokaja samadyscyplina, štodzionnyja zaniatki sportam, kłopat pra źniešni vyhlad.
«Mianie pryviali ŭ kamieru, kali źniavolenyja byli na prahułcy. Volha zajšła ŭ kamieru apošniaj. Jaje zaŭždy z prahułki pryvodzili apošniaj. Jana kinułasia ŭ vočy rudymi daŭhimi vałasami, pryhožaj postaćciu dy natreniravanym ciełam. Źniešnaściu Volha čaplaje ludziej», — zhadvaje jaje byłaja sukamiernica.
Volha niekalki tydniaŭ pryhladałasia da novaj susiedki, trymała jaje na dystancyi, kamunikavała aściarožna.
Volha Pietuch za dva miesiacy da aryštu. Fota: sacyjalnyja sietki
«Da novych ludziej jana zaŭždy stavicca aściarožna, bo da jaje časta padsadžvali «kačak», jakija sprabavali vypytać, što jana dumaje pra spravu, čamu nie pryznaje vinu, ci źvierniecca pa pamiłavańnie, kali jaje asudziać. Volha naohuł nikomu ničoha nie kazała pra spravu».
Byłaja sukamiernica raskazvaje, jak jany vyličvali padsadnych.
«Pa pavodzinach bačna, što za čałaviek. Kali źviartajecca da ŭsich z adnym pytańniem i nie adzin raz, jaje adhaniajuć, maŭlaŭ, nie chočam havaryć, a jana nazojliva praciahvaje vypytvać, to stanovicca zrazumieła, chto jana. Takich ludziej časta vyklikajuć z kamiery na niekalki chvilin, kab nibyta paviedamić pra niejki rapart, ale ŭsie viedajuć, što hety čałaviek ničoha nie parušaŭ, kab na jaho skłali rapart. Heta vydavała padsadnuju».
Žartam nazyvali hałoŭnaj pa kipni
Byłaja palitźniavolenaja zaŭvažaje: navat u sudovaj kletcy Volha siadzić prybranaja: vałasok da vałaska, akuratnyja brovy.
«Za kratami maładaja žančyna robić usio, kab viarnuć choć niejkuju narmalnaść žyćcia.
Volha štodnia rabiła praktykavańni na pres, jeła pa hadzinach, pilnavała, što jeści i kolki, tamu dobra vyhladaje», — zhadvaje surazmoŭnica.
Volha kazała joj, što na voli nikoli nie zajmałasia sportam, bo na jaho brakavała času. Niezadoŭha da taho, jak jaje schapili, stała chadzić na zaniatki bajavych adzinaborstvaŭ.
«Z-za natreniravanaha cieła novyja sukamierniki Volhu pabojvalisia. Jana žartam kazała, što jaje vinavaciać u naniasieńni ciažkich cialesnych paškodžańniaŭ. Volha napraŭdu vyhladaje tak, što strašnavata padychodzić, zdajecca, što ŭ jaje dužaja chvatka. Sama jana kazała, što da niavoli tak nie vyhladała. My žartam nazyvali jaje hałoŭnaj pa kipni. Ranicaj jana padymałasia pieršaj, kab zhatavać dziaŭčatam harbatu».
Nie dumaje, što na volu vyjdzie daterminova
Volha praciahły čas pracavała art-dyrektaram minskaha hatela «Jeŭropa», i hetaja praca joj padabałasia. Jana lubić tancavać. Kali byŭ čas, to zavitvała na vulicu Zybickuju. Maładoha čałavieka ŭ jaje nie było.
Volzie ŭ listach rodnyja dasyłali fotazdymki, i za čas niavoli ich nabraŭsia ceły stos.
«Volha pakazvała na zdymkach svaju siamju, dom, viasielle siastry. Našy hutarki jana nazyvała ciŭkańniem. Pierad maimi sudami ja prychodziła da Volhi abdymacca. Mnie zdavałasia, što bieź mianie joj budzie adzinoka», — raskazvaje jaje byłaja sukamiernica.
Volha Pietuch. Fota: sacyjalnyja sietki
Volha pieražyvaje za baćkoŭ, a, rasčuliŭšysia, narakaje, što ŭ jaje samoj niama siamji i što była karjerystkaj. Ale takija momanty byli duža redkimi.
«Kali joj viešali novyja artykuły ci davodzili, što jaje vina całkam dakazanaja, to jana adkazvała: heta niejki siur, jak na heta možna reahavać, bo toje niapraŭda».
Volha starajecca nie dumać, što na volu vyjdzie daterminova.
«Usie spadziajucca, što ich vypuściać raniej, ale kali tam siadziš, to tabie zdajecca, što ŭžo nikoli ničoha nie źmienicca, — zaŭvažaje surazmoŭnica. — Tamu Volha nie vieryć, što vyjdzie praz dva ci try hady. Maralna jana siabie rychtuje, što budzie siadzieć uvieś termin.
Heta słušna. Kali jaje vypuściać praz dva hady, to hetamu budzie vielmi rada. Ale kali jana budzie spadziavacca, što jaje vypuściać praz dva ci try hady i taho nie adbudziecca, to joj maralna budzie duža ciažka».
Adnaho pohladu chapała, kab čałaviek zmoŭk
Byłaja palitźniavolenaja kaža, što pavodziny achoŭnikaŭ da źniavolenych žančyn byli karektnymi. Pavodle jaje, kali da ich stavišsia biez ahresii i staraješsia nie pryciahvać da siabie ŭvahi, to i jany buduć adekvatnymi. Takaja mietodyka pracuje z žanočymi kamierami.
Pa jaje słovach, achoŭniki za 19 miesiacaŭ vyvučyli Volhu i biez nahody staralisia nie čapać.
«Jana moža pastajać za siabie, dać adpor. Jaje pohladu chopić, kab čałaviek zmoŭk i adčapiŭsia. Kali joj niešta było nie daspadoby, to jana hladzieła chałodnym pozirkam, surjoznym, navat ledzianym. Niejak u nas była dziaŭčyna, jakaja ŭsim nie padabałasia, dyk na jaje časam Volha tak hladzieła. Ja bačyła jaje vočy. Jany byli nie złyja, ale duža chałodnyja».
Volha Pietuch. Fota: sacyjalnyja sietki
Kali ŭ nievialikaj kamiery było šaściora niavolnikaŭ, to jany ŭžyvalisia miž saboju. U ich byŭ adładžany byt.
«Čałaviek da ŭsiaho pryzvyčajvajecca. Pieršyja dva tydni tabie zdajecca, što ty nie zmožaš u takich umovach žyć. Praź miesiac abstanoŭka ŭžo vyhladaje niakiepskaj», — kaža surazmoŭnica.
«U nas była chałodnaja vada. Štodzień myli padłohu, prybirali tualet. Pa čarzie myli rečy ŭ tazie. Štoviečar chadzili ŭ «duš», jaki my nazyvali SPA. Heta značyć mylisia va ŭmyvalniku ŭ chałodnaj vadzie. Namylvalisia hubkami dla myćcia posudu. Jany dobra pieniacca i nie šmat dajuć vilhaci. Imi było dobra ź siabie ścirać pienu. Heta było zručna dla tych umoŭ. U kožnaha była svaja hubka».
Daŭno nie była ŭ ludskich umovach i zvykłasia ź niavolnickimi realijami
Štotydzień niavolnikaŭ kamierami vadzili ŭ duš, jaki nazyvaŭsia «łaźniaj». Na pamyŭku advodziłasia 15 chvilin. Vada ciakła z truby strumieniem.
«Volha tak daŭno nie była ŭ narmalnych ludskich umovach, što zvykłasia ź niavolnickimi realijami, — tłumačyć surazmoŭnica. — Kali doŭha tam siadziš, to zabyvaješ, što čałaviek musić chadzić adzin-dva razy na dzień u duš. Padładžvaješsia, zvykaješsia z realnaściu, maŭlaŭ, jana była inšaja, albo jaje i nie było naohuł. Razmyvajucca miežy. Heta abaronnaja reakcyja mozhu, kab nie zjechać z hłuzdu. Kab nie dumać, što ty zrabiŭ by, kab byŭ na voli. Tak trochu lahčej».
Volha ŭ niavoli bieraže svaje daŭhija vałasy.
«U niavoli vałasy na vahu zołata. Mnie zdavałasia, što Volha raścić kasu, kab vyjści na volu z hustoj kasoj da pojasa».
Škonku ličyć asabistaj prastoraj i nie dazvalaje sadzicca na jaje
U vieraśni 2022 hoda šaścimiesnaja kamiera stanaviłasia pierapoŭnienaj. U joj było 7—8 niavolnikaŭ.
«My nie viedali, jak užyvacca, što rabić dla hetaha. Niekatoryja spali na padłozie. Na škonkach nižniaha jarusa pastajanna niechta siadzieŭ. Na majoj siadzieli zaŭždy, bo jana była zručnaja. Volha nie dazvalała siadzieć na svajoj, bo ličyła jaje svajoj asabistaj prastoraj. Vyklučeńnie było tolki dla mianie», — raskazvaje dziaŭčyna.
Vyžyvać u pierapoŭnienaj kamiery było maralna ciažka.
«Kali ŭ ciabie niama dvuch kvadratnych mietraŭ asabistaj prastory, to heta napružvaje, nie daje spakoju. Nam nie chapała pavietra. Było prablematyčna zachoŭvać rečy. Zavarvać harbatu. Ad taho nie było kudy padziecca. Kali patok źniavolenych skončyŭsia, to žyćcio ŭ našaj kamiery narmalizavałasia», — raskazvaje byłaja źniavolenaja.
Volzie admovili ŭ spatkańni z baćkami. Pajezdki na sudovyja pasiadžeńni jaje stamlajuć.
***
18-ci fihurantam spravy, źviazanaj sa sprobaj padpału doma Hajdukieviča, vystaŭleny abvinavačańni pa 14 kryminalnych artykułach, siarod jakich «Zmova dla zachopu ŭłady», «Teraryzm», «Stvareńnie ekstremisckaha farmavańnia», «Hvałt u adnosinach da dziaržaŭnaha i hramadskaha dziejača», «Niezakonnyja dziejańni sa zbrojaj i bojeprypasami». Padsudnym pahražajuć praciahłyja terminy źniavoleńnia.
Sudovaje pasiadžeńnie pa spravie «ab sprobie padpału domu Hajdukieviča»
Pavodle KDB, dom Hajdukieviča źbirałasia padpalić siamja Vajciachoŭskich: sužency Vital i Volha, ich syn Uładzisłaŭ i jaho žonka Nastaśsia.
Siarod źniavolenych taksama Pavieł Čychinski — 44-hadovy śledčy z Baranavičaŭ, 39-hadovy Eduard Piastrak — instruktar śpiecnaza.
51-hadovaha Vadzima Prakopjeva, byłoha minskaha restaratara, a ciapier hramadskaha dziejača i palityka sudziać zavočna.
Spravaj zajmaŭsia KDB. Minski sud razhladaje spravu z 6 sakavika.
U ciapierašniaj jaje viersii asnoŭny fihurant spravy, eks-restaratar Vadzim Prakopjeŭ, nibyta źbiraŭsia zachapić uładu, stvaryŭšy hrupoŭku zmoŭnikaŭ, raźmierkavaŭšy miž imi abaviazki, i padčas vybaraŭ źbiraŭsia dziejničać.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Zmova siłavikoŭ»: chto tyja aficery, jakich sudziać razam z Prakopjevym
«Litva straciła suvierenitet», «Polšča lahła pad Bajdena», «Ukrainy niama». Deputat Aleh Hajdukievič pryjšoŭ da absurdnych vysnoŭ na telebačańni
Vadzima Prakopjeva abviaścili ŭ vyšuk. Chto jašče ŭ śpisie?
