Technałohiju placieńnia łapciej z nazvaj «viduščyja» prydumali na Drybinščynie šmat stahodździaŭ tamu. U takim abutku pamiž padešvaj i piacielkami pad abory zastajucca adtuliny — «vočki». Sakrety majsterstva niekali pieradavali z pakaleńnia ŭ pakaleńnie, a potym jano straciła aktualnaść, paviedamlaje mogilev.media.
Małodšy navukovy supracoŭnik Doma ramiostvaŭ ahraharadka Karoŭčyna Valancina Majsiejeva raspaviała pra adnaŭleńnie tradycyi:
— I my voś da babuli pryjšli. Jana ŭziała ŭ ruki łyka i pačała pleści. Kaža: «Oj, hałava nie pamiataje, a ruki pamiatajuć». My chadzili, zdymali na fotaaparat, videa zdymali, usio fiksavali, potym hladzieli, sprabavali. Što nie atrymlivałasia — znoŭ da jaje išli. Doŭha heta ŭsio, ale navučylisia.
Zaraz u Karoŭčynie vyrablajuć pad 300 par łapciej štohod, samych roznych pamieraŭ i ŭ tym liku suvienirnyja.
Raniej na Drybinščynie adradzili jašče adzin staradaŭni abutkovy brend — valonki. Technałohii valańnia, jakuju miascovyja šapavały stvaryli ŭ XVII stahodździ, tut taksama navučajuć dziaciej. Šapavalstva i łapcieplacieńnie ŭvachodziać u Dziaržaŭny śpis historyka-kulturnych kaštoŭnaściej Biełarusi.
