Uznaharoda Illi «Litvina» Chrenava. Fota: fond «Vilna Biłoruś»
Illa «Litvin» Chrenaŭ abaraniaŭ niezaležnaść Ukrainy ŭ 2014 hodzie, a ŭ 2022-m viarnuŭsia na front. Ën zahinuŭ pad Bučaj 4 sakavika 2022 hoda.
Illa «Litvin» Chrenaŭ. Fota: sacyjalnyja sietki
Miedal pryvioz u Lvoŭ 24 sakavika na adkryćcio fotavystavy «Z Ukrainaj u sercy» pradstaŭnik administracyi Bučy. Ekspazicyju, pryśviečanuju biełarusam, jakija zahinuli, baroniačy Ukrainu ad rasijskaj ahresii, razharnuŭ fond «Vilna Biłoruś». Uznaharodu Chrenava pieradaduć jaho žoncy, kaža kiraŭnik fondu Alaksiej Franckievič.
Vulica, jakuju nazavuć imiem biełaruskaha dobraachvotnika. Sprava — Alaksiej Franckievič. Fota: fond «Vilna Biłoruś»
Letaś u vieraśni haradskaja rada Bučy ŭznaharodziła vajaroŭ Pałka Kalinoŭskaha miedalom «Za abaronu Bučy». Uznaharodu atrymali kamandzir pałka Dzianis «Kit», Alaksiej «Psichołah» i, paśmiarotna, Illa «Litvin».
Napiaredadni hadaviny śmierci kalinoŭca fond «Vilna Biłoruś» źviarnuŭsia ŭ bučanskuju administracyju, kab taja nazvała adnu z vulic horada imiem biełaruskaha dobraachvotnika. Na haradskoj siesii inicyjatyva była padtrymanaja, ale kančatkovaje rašeńnie pakul nie pryniataje. U prajekcie pastanovy ab pieranazvańni vulic horada imia Chrenava zhadanaje.
Na vulicy, u naźvie jakoj moža być uviekaviečanaje imia «Litvina», jon i zahinuŭ.
Mer Bučy padpisvaje biełaruski ściah dla muzieja Volnaj Biełarusi. Fota: fond «Vilna Biłoruś»
27 sakavika Alaksiej Franckievič sustrakaŭsia z meram Bučy, Anatolem Fiedarukom, jaki dla muzieja «Vilna Biłoruś» padpisaŭ bieła-čyrvona-bieły ściah.
«Meru pieradali majku, u jakoj chadziŭ «Litvin», a taksama pahutaryli z bučanskaj vartaj, jakaja pieršaj dała rasijskim zachopnikam boj na podstupach da horada. Nam pakazali vulicu, jakuju nazavuć u honar biełarusa», — raskazvaje Alaksiej Franckievič.
Mohiłki ŭ Bučy. Fota: fond «Vilna Biłoruś»
Pa jaho słovach, Buča ciapier — vialikaja budaŭničaja placoŭka. Paŭsiudna iduć adnaŭlenčyja pracy.
31 sakavika horad adznačyć pieršuju hadavinu vyzvaleńnia ad rasijskaj akupacyi. U carkvie razhornutaja vystava, na jakoj ekspanujucca fotazdymki nastupstvaŭ uvarvańnia.
«Na ich zabityja žychary Bučy, niekatoryja zakatavanyja, sa źviazanymi rukami», — kaža Alaksiej Franckievič.
Buča — horad u Kijeŭskaj vobłaści. Da vajny ŭ im žyło bolš za 35 tysiač čałaviek. Pieradavaja kałona rasijan uvajšła ŭ horad unačy z 27 na 28 lutaha. Rasijanie adstupili z horada 31 sakavika 2022 hoda.
Pa vyzvaleńni byli vyjaŭlenyja šmatlikija trupy žycharoŭ z prykmietami katavańniaŭ. U 90% zahinułych vyjaŭlenyja kulavyja, a nie askiepkavyja ranieńni.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Rasiejcy, jak u Druhuju suśvietnuju, trupami vajujuć». Dzianis Urbanovič znoŭ jedzie na front
