Juryj Biełavusaŭ (sprava)

Juryj Biełavusaŭ (sprava)

Hramadzianin Biełarusi Juryj Biełavusaŭ, jaki sa žniŭnia 2022 hoda słužyŭ pa kantrakcie va Uzbrojenych siłach Ukrainy i ŭdzielničaŭ u bajach za vyzvaleńnie ad rasijan paŭdniovych terytoryj Ukrainy, užo amal paŭhoda znachodzicca ŭ śledčym izalatary, piša «Radyjo Svaboda».

Jaho zatrymali 18 kastryčnika 2022 hoda. Ciapier sud admoviŭsia vyzvalić jaho pad chatni aryšt, jak nastojvaŭ advakat biełarusa, i pradoŭžyŭ trymańnie pad vartaj da 3 červienia ŭklučna.

Sud pahadziŭsia z dovadami abvinavačańnia ab tym, što abvinavačvany, «znachodziačysia na svabodzie, moža ŭčynić sprobu schavacca ad suda, uličvajučy pakarańnie, jakoje jamu pahražaje ŭ vypadku pryznańnia sudom jaho vinavataści, učynić inšaje kryminalnaje pravaparušeńnie, majučy dostup da zbroi i nie majučy mocnych sacyjalnych suviaziaŭ, miesca pražyvańnia, miesca pracy».

Sud taksama admoviŭsia zadavolić chadajnictva advakata, jaki prasiŭ zakryć kryminalnuju spravu suprać Juryja Biełavusava za daŭnaściu terminaŭ pryciahnieńnia jaho da adkaznaści.

Juryja Biełavusava abvinavačvajuć u troch ciažkich złačynstvach: niezakonnaje pazbaŭleńnie voli i vykradańnie čałavieka (č. 2 art. 146 Kryminalnaha kodeksa Ukrainy), katavańnie (č. 2 art. 127) i pahroza zabojstvam (č. 1 art. 129).

Padstavaj zatrymańnia biełarusa stała toje, što jon nie źjaŭlaŭsia na pasiadžeńni suda. Na sudovym pasiadžeńni advakat Juryja Biełavusava zajaviŭ, što toj nie moh samavolna pakinuć terytoryju vajskovaj čaści, kab pryjechać na razhlad spravy. Ale sud nie ŭličyŭ hetych abstavin.

Jašče adzin fihurant hetaj spravy — Juryj Ijonaŭ, viadomy bajec bataljona «Azoŭ» 2014 hoda, ale jon zahinuŭ u 2022 hodzie pry abaronie Maryupala. U rozny čas Juryj Ijonaŭ byŭ aktyvistam šerahu hramadskich arhanizacyj, jakija stvaryŭ jašče adzin viadomy azoviec, Siarhiej Karotkich; jon da atrymańnia ŭkrainskaha pašparta byŭ hramadzianinam Biełarusi.

U časie rasśledavańnia śledčyja vyznačyli, što ŭ śniežni 2017 hoda Juryj Biełavusaŭ i Juryj Ijonaŭ jechali na aŭtamabili BMW pa Kijevie i, prajazdžajučy pa adnoj z centralnych vulic, vyjechali na piešachodnuju zonu. Adzin ź minakoŭ zrabiŭ im zaŭvahu. U adkaz jany zašturchali taho ŭ aŭtamabil na zadniaje siadzieńnie.

Jak udakładniŭ na adnym z sudovych pasiadžeńniaŭ prakuror, Juryj Biełavusaŭ pahražaŭ paciarpiełamu pradmietam, padobnym da pistaleta, zahadvaŭ tamu «lehčy na ziamlu tvaram uniz i pić vadu z łužyny», a hetyja dziejańni supravadžaŭ «źbićciom i inšymi hvałtoŭnymi dziejańniami».

Pieršapačatkova Juryja Biełavusava zatrymali 28 maja 2020 hoda. Jon znachodziŭsia pad vartaj da 8 vieraśnia 2020 hoda — da taho momantu, kali sud źmianiŭ mieru papiaredniaha strymańnia na alternatyŭnuju — uniasieńnie hrašovaha zakładu ŭ pamiery 42 040 hryŭniaŭ (na toj momant kala 1,5 tysiačy dalaraŭ u ekvivalencie. — RS).

Ad žniŭnia 2022-ha Juryj Biełavusaŭ słužyŭ strałkom u adnoj z vajskovych čaściej Uzbrojenych sił Ukrainy. Jahonyja kamandziry źviartalisia ŭ sud z chadajnictvam ab uziaćci biełarusa na paruki, ale sud u hetym admoviŭ.

Čytajcie taksama:

«Rasiejcy, jak u Druhuju suśvietnuju, trupami vajujuć». Dzianis Urbanovič znoŭ jedzie na front

«My dakładna razumieli, što nie vyžyviem». Biełaruski dobraachvotnik Dzianis «Kit» raskazaŭ pra piekła pad Bučaj

«Kali vynosili paranienych, prylacieŭ druhi snarad». Historyja kalinoŭca, jaki straciŭ nahu na vajnie

Клас
13
Панылы сорам
36
Ха-ха
3
Ого
10
Сумна
7
Абуральна
14