Zasłaŭski z namieśnikam ministra ŭnutranych spraŭ, hienierałam Dźmitryjem Karziukom

Zasłaŭski z namieśnikam ministra ŭnutranych spraŭ, hienierałam Dźmitryjem Karziukom

Dniami my paviedamili pra pavarot losu Siarhieja Zasłaŭskaha — namieśnika Dźmitryja Paŭličenki ŭ asacyjacyi vieteranaŭ śpiecnaza, stvaralnika ruchu «Za mocnuju Biełaruś», etałonnaha jabaćki, jaki niečakana apynuŭsia na Akreścina «za palityku». 

Jabaćki ŭ šoku. Na Akreścina adpravili namieśnika Paŭličenki ŭ asacyjacyi vieteranaŭ śpiecnaza «Čiesť» 

Da svajho aryštu Zasłaŭski hastralavaŭ pa vajennych čaściach i adździełach milicyi z majstar-kłasami dla siłavikoŭ i kursantaŭ, i pa škołach z «patryjatyčnymi» lekcyjami dla dziaciej.

Kožny jahony ruch padrabiazna aśviatlaŭsia ŭ dziaržaŭnych miedyja: STB, «Minsk-Naviny», «Vajar» i h.d. 

Jon pravodziŭ pryzyŭnikoŭ u vojska, cisnuŭ ruki milicejskim hienierałam i łukašenkaŭskim ministram, abdymaŭsia z Bałabam. 

Z 2020 hoda Zasłaŭski sabraŭ ceły ikanastas padziak i hramat ad siłavych struktur Biełarusi. Jon pravodziŭ sieminary dla rabotnikaŭ MUS i Minabarony pa ŭsioj krainie. 

Hieroj publikacyi z kiraŭnikom minskaha AMAP Dźmitryjem Bałabam i hramataj ad hetaj arhanizacyi 

Hieroj publikacyi z kiraŭnikom minskaha AMAP Dźmitryjem Bałabam i hramataj ad hetaj arhanizacyi 

Pradstaŭlajučysia milicyjantam, abkradaŭ kijoski

«Naša Niva» z dapamohaj «Bajpoła» vyśvietliła, što ŭ realnaści pad psieŭdanimam Siarhiej Zasłaŭski chavajecca recydyvist Siarhiej Aŭtuchovič. 

U anamnezie hetaha piersanaža pad 20 kryminalnych złačynstvaŭ, ź jakich 15 razbojaŭ.

«Aŭtuchovič S.S. u kafe «Tavierna» pa praśpiekcie Haziety «Praŭda» u stanie ałkaholnaha apjanieńnia z užyvańniem miedycynskaha preparata «Azałapcin» davioŭ [paciarpiełaha] da stanu komy, paśla čaho, skarystaŭšysia jaho nieśviadomym stanam, 12.04.2010 kala 20:00, znachodziačysia pa adrasie […] zavałodaŭ aŭtamabilem Sitrajen S5, jaki naležaŭ [paciarpiełamu], nanios škodu na 33 000 000 rubloŭ», — prykład vypiski z kryminalnaj bijahrafii Zasłaŭskaha-Aŭtuchoviča, jakoj z nami padzialiŭsia «Bajpoł». 

Hety čałaviek adbiraŭ u inšych hrošy prosta na prypynkach, załaziŭ u čužyja kvatery. Adnojčy jon navat umudryŭsia «šlacham padmanu» adabrać u paciarpiełaha D. hrošy prosta ŭ pamiaškańni Frunzienskaha RUUS Minska.

Voś jašče: «Aŭtuchovič S.S ź lipienia 2005 pa 09.03.2006, pradstaŭlajučysia rabotnikam pravaachoŭnych i inš. orhanaŭ i nie źjaŭlajučysia takim, samavolna, vykarystoŭvajučy ŭładu adkaznych asob, traplaŭ u pamiaškańni kamiercyjnych kijoskaŭ i ŭčyniaŭ dziejańni, praduhledžanyja art. 206 č. 2 (kradziež), 205 č.2 (rabaŭnictva z užyvańniem hvałtu), 209 č.2 (machlarstva) KK RB u dačynieńni da hramadzian K., Ł., D., i inš».

Nižej, dla paraŭnańnia, fota Siarhieja Aŭtuchoviča z bazy «Pašpart». 

Fota Siarhieja Aŭtuchoviča z bazy «Pašpart»

Fota Siarhieja Aŭtuchoviča z bazy «Pašpart»

Pa bolšaj častcy svaich złačynstvaŭ turemnaha pakarańnia nie panios u suviazi z tym, što sud vyzvaliŭ jaho ad kryminalnaj adkaznaści z «užyvańniem prymusovych zachadaŭ biaśpieki i lačeńnia ŭ psichijatryčnaj klinicy z uzmocnienym nazirańniem».

Ni ŭ vojsku, ni ŭ orhanach unutranych spraŭ Siarhiej Aŭtuchovič nikoli nie słužyŭ. Jon za svajo žyćcio pracavaŭ šmat dzie: ad kambinata chlebapraduktaŭ da zavoda «Bulbaš», ale tolki nie ŭ orhanach. 

Majorskija pahony, a taksama znački na jahonym kicieli ab «samaaddanaj słužbie», skančeńni Akademii MUS i słužbie ŭ v/č 3214 moža i sapraŭdnyja, ale Aŭtuchoviču nie naležać.

Skrynšot ź siužeta lidskaha rajonnaha telebačańnia pra vystupleńnie Zasłaŭskaha-Aŭtuchoviča pierad kalektyvam lidskaj milicyi. 

Skrynšot ź siužeta lidskaha rajonnaha telebačańnia pra vystupleńnie Zasłaŭskaha-Aŭtuchoviča pierad kalektyvam lidskaj milicyi. 

Heta vyhladaje absalutna fantastyčnaj historyjaj — niebiaśpiečny recydyvist, nadzieŭšy formu majora ŭnutranych vojskaŭ, hadami vučyŭ žyćciu kursantaŭ i biełaruskich dziaciej, prykryvajučysia łozunham «Za Baćku!». Aktyŭničaŭ u ŁDPB i źbiraŭsia ŭ deputaty, a kiraŭniki milicyi, ideołahi i ŭsie inšyja nie zaŭvažali, chto pierad imi.

My prasačyli historyju hetaha čałavieka, kab zrazumieć, jak łukašenkaŭskaja sistema da takoha dajšła. 

Źjaŭleńnie «jabaćki lejtenanta Šmita»

Publičnuju karjeru Siarhieja Aŭtuchoviča praściej za ŭsio adsačyć praz sajt dziaržaŭnaha ahienctva BiełTA — tam psieŭdaśpiecnazaviec zhadvajecca až 14 razoŭ. 

Pieršy raz dziaržaŭnaje ahienctva napisała pra Aŭtuchoviča 4 vieraśnia 2020-ha. Havorka ŭ publikacyi pra toje, što Aŭtuchovič razam z atletam Viačasłavam Charaniekam rychtujucca «stavić suśvietnyja rekordy» na prapahandysckim mierapryjemstvie 12 vieraśnia. 

Adpaviedna, nastupnaja publikacyja ŭžo 12-ha — rekordy «pastaŭleny». 

Fota: BiełTA

Fota: BiełTA

Sa spartovaha hledzišča toje, što ŭ publikacyi nazyvajecca «suśvietnym rekordam» Aŭtuchoviča, takim nie jość. 

Dyscypliny na kolkaść adciskańniaŭ na kułakach za 45 siekund (!) prosta nie isnuje. Kolkaściu adciskańniaŭ atlety mierajucca inačaj i rekordy na spabornictvach pačynajucca ad tysiačy paŭtareńniaŭ za najmienšuju kolkaść času i skančajucca dziasiatkami tysiač paŭtareńniaŭ za peŭny čas, naprykład, za hadziny ci sutki.

A toje, za što chvalili Aŭtuchoviča-Zasłaŭskaha — prapahandysckaja manipulacyja. 

Paśla svajho pieršaha «rekordu» Aŭtuchovič-Zasłaŭski pierastaŭ saromiecca. Na BiełTA jaho pačali pradstaŭlać užo jak trochrazovaha rekardsmiena śvietu i Knihi rekordaŭ Hinesa (!), jaki stavić novyja «rekordy». Naturalna, pierabivajučy pry hetym tolki svaje ŭłasnyja. 

Rekardsmienam Knihi rekordaŭ Hinesa jon taksama nikoli nie byŭ — na aficyjnym sajcie arhanizacy ni Aŭtuchovič, ni jahonaje alter-eha nie zhadvajucca. 

U bolšaści publikacyj na BiełTA jon źjaŭlajecca razam ź Viačasłavam Charaniekam, jaki taksama ŭ niejki momant, na spartovaj piensii, pačaŭ stavić «rekordy» u nastolki ekzatyčnych dyscyplinach, u jakich kankurencyi prosta niama. 

Fota: BiełTA

Fota: BiełTA

Jak Aŭtuchovič-Zasłaŭski zapisaŭsia ŭ jabaćki

Na fonie ŭvahi žurnalistaŭ Aŭtuchovič zasnavaŭ «patryjatyčna-spartovy ruch «Za mocnuju Biełaruś». Abapiercisia jamu było na što — na publikacyi aficyjnaha łukašenkaŭskaha resursu, jakija, imavierna, ź jahonych ułasnych słovaŭ i zrabili ź nikomu raniej nieviadomaha čałavieka spartovuju fihuru. 

Vidać, była i inšaja pryčyna. Ad našych surazmoŭcaŭ my viedajem, što Aŭtuchovič — blizki znajomy Siarhieja Maćvijenki, jaki raniej byŭ namieśnikam Dźmitryja Paŭličenki ŭ Asacyjacyi vieteranaŭ śpiecnaza «Čiesť». U lipieni 2021 Maćvijenka vyjšaŭ z «Čiesti», Paŭličenka supravadziŭ heta kamientaryjem za svaim podpisam na sajcie asacyjacyi. 

Skrynšot sajta asacyjacyi

Skrynšot sajta asacyjacyi

Zabaŭny momant, što, pa infarmacyi ź sistemy «Pašpart», Maćvijenka sam nie maje nijakaha dačynieńnia da siłavych struktur — jahony maksimum heta rabota achoŭnikam u «Ideja Banku». Ale niejak jon umudraŭsia być nie tolki siabram asacyjacyi vieteranaŭ, ale i namieśnikam Paŭličenki. 

Jon ža, jak možna mierkavać, pryciahnuŭ u arhanizacyju i Aŭtuchoviča, jaki taksama staŭ namieśnikam u Paŭličenki. A tam usio pajšło zusim prosta — paśla 2020-ha takim ludziam stała strašna admaŭlać.

I voś tut užo «viadomy ŭ krainie siłavik» zusim hublaje soram i pačynaje hastroli pa krainie ź niaścipłaj u svajoj štučnaści bijahrafijaj. Daroha da pavažanaha ŭ sistemie čałavieka zajmaje ŭ jaho try miesiacy.

(kali ličyć ad momantu pieršaj publikacyi na BiełTA da ideałahičnaj lekcyi pierad siłavikami). 

Zirnicie videa ź Lidy pra sieminar, jaki Aŭtuchovič pravioŭ dla supracoŭnikaŭ RAUS i Departamienta achovy ŭ śniežni 2020-ha. 

Na videa kiraŭnik Lidskaha RAUSa Dźmitryj Ulaška, jaki pryvioŭ na sustreču 50 svaich supracoŭnikaŭ, robić revieransy ŭ bok «Siarhieja Siarhiejeviča», jaki «surjozny matyvatar», i raskazvaje, nakolki takija sustrečy patrebny «ŭ ramkach ideałahičnaj padrychtoŭki asabovaha składu». 

U kancy sieminara «majoru» Aŭtuchoviču vydali hramatu ad Lidskaha RAUS za ŭniosak u ideałahičnuju rabotu z asabovym składam. Nahadajem, što heta ŭ Lidzie byŭ aryštavany palitviazień Vitold Ašurak, tajamnica hibieli jakoha ŭ Škłoŭskaj kałonii dahetul nie rasśledavanaja.

Bieniefisy ŭ škołach i ŭ minskim AMAP

Tym časam, dziaržaŭnyja ŚMI praciahvali stvarać ideałahična pravilnamu «rekardsmienu-siłaviku» lehiendu.

«Jašče adzin viadomy ŭ našaj krainie siłavik Siarhiej Zasłaŭski ŭstanaviŭ rekord Hinesa ŭ adciskańni na paralelnych brusach z dadatkovaj vahoj u 26 kiłahramaŭ», — raskazvaje dyktarka STB pry kancy 2020-ha. 

«Minčuka zaprasili ŭ Łondan ustanavić novaje dasiahnieńnie dla Knihi rekordaŭ Hinesa», — pišuć «Minsk-Naviny» ŭ sakaviku 2021-ha, dałučajučy fota Aŭtuchoviča z dypłomam, jaki napisany pa-anhlijsku z katastrafičnymi pamyłkami.

Ale praviarać infarmacyju — nie ŭ ich tradycyi. 

Fota z tym samym dypłomam z pamyłkami

Fota z tym samym dypłomam z pamyłkami

Dalej iduć efiry na TNT, ustupleńnie ŭ Libieralna-demakratyčnuju partyju Hajdukieviča, bieniefisy ŭ škołach i ŭ minskim AMAPie. 

Byccam radkami ź Ilfa i Piatrova hučać apublikavanyja ŭ repartažy «Minsk-Navinaŭ» słovy minskaha kaardynatara Libieralna-demakratynaj partyi pra vizit Aŭtuchoviča-Zasłaŭskaha ŭ staličnuju škołu №1. 

«U kancoŭcy mikrafon uziaŭ S. Razžyvajkin.

— Pierad vami vystupili ludzi, jakija realizavali siabie. Imkniciesia da vynikaŭ, usio atrymajecca!», — cytujuć prapahandysty S. Razžyvajkina. 

Vizit Aŭtuchoviča-Zasłaŭskaha ŭ staličnuju škołu №1. Fota: «Minsk-Naviny»

Vizit Aŭtuchoviča-Zasłaŭskaha ŭ staličnuju škołu №1. Fota: «Minsk-Naviny»

Zaprašaŭ Aŭtuchoviča na mierapryjemstvy sa školnikami i namieśnik staršyni Minharvykankama Arciom Curan. Časta jany źjaŭlalisia na mierapryjemstvach razam. 

Curan ža prymaŭ byłoha kryminalnika z «pracoŭnym vizitam» u svaim kabiniecie. Curan — pieršy adnosna vysoki čynoŭnik, jaki pryniaŭ u siabie Aŭtuchoviča. Nu, paśla ministra sportu Siarhieja Kavalčuka, sustreču jakoha z Aŭtuchovičam jašče možna patłumačyć imknieńniem ministra viedać usich novych dziejačaŭ u svajoj śfiery. 

Curan z Aŭtuchovičam i inšym siabram Libieralna-demakratyčnaj partyi

Curan z Aŭtuchovičam i inšym siabram Libieralna-demakratyčnaj partyi

Paśla «lehitymizacyi» ŭ Curana Aŭtuchovič z kim tolki nie sustrakaŭsia. 

Ź im abdymaŭsia kiraŭnik minskaha AMAP i padvodziŭ da jaho svaich kadraŭ, jaho prymali ŭ svaich kabinietach ministry sielskaj haspadarki i miedycyny. 

Jaho zaprašali na sustrečy z kursantami ŭ Vajskovuju akademiju i vypisvali hramaty ad Minabarony. 

Z Aŭtuchovičam vitaŭsia za ruku namieśnik ministra ŭnutranych spraŭ Dźmitryj Karziuk i ŭručaŭ jamu padziaku. Zahadka, jak Ministerstva ŭnutranych spraŭ nie praviało elemientarnaj pravierki, z kim maje spravu. 

Aŭtuchovič pravodzić sieminar dla minskich amapaŭcaŭ. 

Aŭtuchovič pravodzić sieminar dla minskich amapaŭcaŭ. 

«Jakija pravaachoŭniki, takija i ich prapaviedniki», — skazaŭ nam na situacyju adzin z zasłužanych rabotnikaŭ MUS, jaki zvolniŭsia paśla 2020-ha. 

Va ŭmovach palityčnych represij na pavierchniu jak u ŚMI, tak i ideałahičnym aparacie ŭspłyli sapraŭdnyja adkidy hramadstva: im addali prajm-tajm telekanałaŭ, jany trymajuć hramadstva ŭ strachu svaimi danosami, ich voziać da studentaŭ i ŭ škoły. Hałoŭnaje — kab prasłaŭlali Łukašenku i apraŭdvali dziaržaŭnuju palityku. Piarečyć lubomu z takich jabaciek, admaŭlać u vykanańni ich časam ludažerskich patrabavańniaŭ treba mieć nieabyjakuju mužnaść. Chłuśnia i strach pranizali dziaržavu źnizu davierchu.

Pakazalna, jak lohka šmatrazova sudzimy Zasłaŭski-Aŭtuchovič nie prosta trapiŭ u arhanizacyju vieteranaŭ śpiecnaza na čale z Paŭličenkam, ale i staŭ namieśnikam jaje kiraŭnika.

Nahadajem, što «Čiesť» — heta struktura, udzielniki jakoj dapamahali ŭ razhonie demanstrantaŭ u 2020 hodzie. A Dźmitryj Paŭličenka — były kamandzir vajskovaj čaści 3214, jakoha padazrajuć u vykanańni palityčnych zabojstvaŭ kanca 1990-ch i pačatku 2000-ch.

«Nijakich dziasiatkaŭ tysiač siabroŭ u joj niama, — raskazaŭ «Našaj Nivie» aficer MUS, znajomy ź situacyjaj u «Čiesti». — A stvorana jana była Paŭličenkam najpierš dla taho, kab vyrašać svaje asabistyja pytańni na fonie chraničnaha biezhrašoŭja.

Jon rassyłaŭ dziasiatki listoŭ u kamiercyjnyja arhanizacyi z prośbaj dapamahčy «vieteranam śpiecnaza». Uličvajučy važnaść unutranych vojskaŭ u sistemie i hučnaj nazvy, ludziam ciažka było admaŭlać.

A kudy išli hetyja hrošy i jak Paŭličenka imi rasparadžaŭsia — dumaju, na hetyja pytańni adkaža śledstva, kali ŭ krainu vierniecca zakonnaść.

Jak nie sakret i toje, što paśviedčańni asacyjacyi pradavalisia, i byli vypadki, kali vypadkovyja ludzi kłali paśviedčańnie pad škło mašyny ŭ nadziei paźbiehnuć prablem z DAI», — skazaŭ aficer MUS. 

My praciahniem sačyć za raźvićciom situacyi. I pišycie nam, jak tolki viedajecie važnaje. Abo asabista tym aŭtaram «Našaj Nivy», jakich viedajecie, abo redaktaru «Našaj Nivy» ŭ TH, na [email protected] ci [email protected].

Клас
51
Панылы сорам
93
Ха-ха
288
Ого
26
Сумна
24
Абуральна
62