Śpiavačka Keci Pery. Fota ź jaje instahrama

Śpiavačka Keci Pery. Fota ź jaje instahrama

Ciapierašniaje raźbiralnictva pačałosia ŭ 2019 hodzie, kali dyzajnierka adzieńnia Keci Tejłar, jakaja vykarystoŭvaje svajo dziavočaje proźvišča Pery ŭ naźvie svajoj nievialikaj kampanii Katie Perry, padała ŭ sud na śpiavačku, abvinavaciŭšy jaje ŭ parušeńni kapirajtu, paviedamlaje Bi-bi-si.

Śpiavačka padała isk u adkaz, patrabujučy całkam anulavać aŭstralijskuju marku adzieńnia Katie Perry. Isk śpiavački sudździa adchiliła.

Isk dyzajnierki tyčyŭsia imiannoha mierču śpiavački — tałstovak, futbołak, šalikaŭ i spartyŭnych štanoŭ jaje brenda Kitty Purry, jakija pradavalisia ŭ kramach i anłajn padčas aŭstralijskich turne vykanaŭcy ŭ 2014 i 2018 hadach.

U vyniku fiederalnaja sudździa Brydžyt Markavič pryjšła da vysnovy, što kampanija śpiavački, pradajučy i rekłamujučy tavary praz sacsietki, častkova parušyła pravy na aŭstralijski tavarny znak Katie Perry, pad jakim dyzajnierka Keci Tejłar pradaje svaju vopratku ŭ internecie.

«Hetaja historyja — pra dźviuch žančyn, dźvie padletkavyja mary i adno imia», — napisała ŭ svaim vierdykcie sudździa. «Padletkavaja mara» (Teenage Dream) — viadomaja pieśnia Keci Pery.

Sudździa pastanaviła, što śpiavačka, narodžanaja Katryn Chadsan, vykarystała psieŭdanim Keci Pery ŭ Aŭstralii biez złoha namieru i nie pavinna vypłačvać dyzajniercy asabistaj kampiensacyi, adnak kampaniju Kitty Purry sudździa Markavič abaviazała pakryć aŭstralijskamu brendu pryčynienuju škodu, pamier jakoj budzie vyznačany ŭ mai.

Dyzajnierka Keci Tejłar pačała pradavać vopratku pad brendam Katie Perry ŭ 2007 hodzie, i na nastupny hod zarehistravała jaho jak handlovuju marku ŭ Aŭstralii.

Śpiavačka Keci Chadsan pad psieŭdanimam Keci Pery vypuściła sinhł «I Kissed A Girl», jaki staŭ jaje pieršym suśvietnym chitom, u 2008 hodzie.

U 2009 hodzie, kali Tejłar adkryła svaju pieršuju handlova-vystavačnuju zału, joj pryjšło apaviaščeńnie ad advakataŭ śpiavački ab tym, što jany buduć damahacca admieny jaje handlovaj marki, ale paśla jany admovilisia ad hetych dziejańniaŭ.

Kamientujučy vynik ciapierašniaj sudovaj bitvy, dyzajnierka Keci Tejłar, jakaja z časoŭ pandemii Covid-19 zajmajecca svajoj spravaj z domu ŭ Sidnei, paraŭnała jaho ź pieramohaj Davida nad Halijafam.

«Ja zmahałasia nie tolki za siabie, ale ŭ cełym za mały biznes u hetaj krainie. Mnohija z hetych kampanij zasnavanyja žančynami, i jany mohuć apynucca ŭciahnutymi ŭ sutyčku z zamiežnymi arhanizacyjami, u jakich našmat bolš finansavaj mocy, čym u nas», — napisała Tejłar na svaim sajcie.

Pradstaŭniki śpiavački nijak nie prakamientavali rašeńnie suda.

Čytajcie taksama:

Śpiavak Illa Silčukoŭ, zvolnieny ź minskaha Opiernaha za ŭdzieł u pratestach, debiutuje ŭ La Scala

Paŭdniovakarejski dziavočy hurt ustanaviŭ absalutny rekord pa prahladach na Youtube. 30 miljardaŭ!

Kolkaść prahladaŭ Despacito dasiahnuła 8 miljardaŭ. Heta bolš, čym nasielnictva Ziamli

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?