Ilustracyjnaje fota: «Naša Niva»

Ilustracyjnaje fota: «Naša Niva»

«Pa-pieršaje, rynku prodažu siaredniaha biznesu ŭ Biełarusi ŭžo, u pryncypie, niama», — skazaŭ «Našaj Nivie» čałaviek sa śfiery deviełapmientu. 

«U sumlennym biznesie moža być dźvie stratehii: abo zarabić, abo nie stracić. Kali ty chočaš zarabić i ŭ ciabie jość žyvyja hrošy na inviestycyi, to toje, što pradajecca ŭ Biełarusi, tabie nie vielmi cikava, skažam ščyra.

Što ty tut u pierśpiektyvie zarobiš ci vyviedzieš hrošy, tabie nichto nie harantuje: ryzyka i ekanomika siońnia nie praličvajucca, biznes-płany možna napisać tolki ź vialikimi dapuščeńniami, što supiarečyć biznes-padychodu. 

Kali ž ty žyvieš pa łohicy «nie stracić», to tym bolš u Biełarusi kuplać ničoha nie budzieš, a pakinieš hrošy ŭ bolš prystojnaj jurysdykcyi, ukłaŭšy ŭ kansiervatyŭny biznes. 

A kali pahladzieć na situacyju vačyma pradaŭca biznesu, to voś tabie zdajecca, što ŭ ciabie jość kampanija, majomaść, ludzi, abaroty, ty heta ŭsio ŭ niejkuju sumu aceńvaješ, ale praz adsutnaść kupcoŭ hetyja tvaje ličby i raźliki — tolki teoryja, na praktycy pamnožanaja na nul. 

Pradać niešta za miljony i dziasiatki miljonaŭ dalaraŭ u Biełarusi ciapier niemahčyma. Paniaćcie raźlikaŭ formuł dla acenki biznesu ŭ mnohich śfierach prosta źnikła — pradajecca ŭsio pa canie aktyvaŭ.

Košt ziamli z koštam budynkaŭ i abstalavańniem skłali razam — voś tabie i ŭsia formuła. I heta jašče niakiepska! Tamu što tady ty choć jak pradaŭ. Mnohija nijak nie mohuć, bo nikomu nie cikava.

Zachodniki adyšli, kitajcy ničoha nie kuplajuć histaryčna — tolki budujuć sami, tamu zastajucca tolki miascovyja, jakija [kuplajuć] amal biaspłatna», — skazaŭ nam deviełapier. 

Čałaviek z vytvorčym biznesam parazvažaŭ u tym ža klučy, ale ź niuansami. 

«Raniej biznes aceńvaŭsia ŭ 5—10 EBITDA. Ciapier pačynajecca ad troch, ale i sama vyručka padaje, i EBITDA mienšaje. Takim čynam, možna skazać, što kali pa farmalnym kryteryi aceńvać, to my ŭ try razy zhubili», — tłumačyć nam ułaśnik zavoda ŭ adnoj z abłaściej. 

«Ale heta ŭ teoryi i tolki z rasijanami, tamu što z zachodnikami ŭžo havaryć niama pra što», — dadaje jon. 

My spytali taksama ŭ pradstaŭnikoŭ vysokatechnałahičnaj vytvorčaści, jakija niekalki razoŭ u 2010-ja ŭžo byli ŭ pieramovach adnosna prodažu zavoda ŭ Biełarusi, ale raniej nie starhoŭvalisia ź jeŭrapiejcami pa canie, čakajučy bolš spryjalnaj kanjunktury. 

Jakija dumki ciapier? 

«Ciapier navat niezrazumieła, jak siabie aceńvać. EBITDA ŭ nas z «dakryzisnych časoŭ» vyras na 20%. Pa bolšaj častcy tamu, što naraścili dolu na rasijskim rynku paśla adychodu jeŭrapiejcaŭ u 2022-m.

Ale heta nie aznačaje, što cana na prodaž hatovaha biznesu vyrasła suvymierna formule abo što jana ŭvohule vyrasła. Čamu? Tamu što canu farmiruje taksama i kupiec. I nivodzin naš jeŭrapiejski kankurent, jaki raniej chacieŭ nas kupić, zaraz hetaha nie zrobić praz palityčnuju situacyju.

U Rasii ž tych, chto moh by dać rady našamu biznesu, ščyra kažučy, vobmal — z takoj ža rentabielnaściu možna zaniacca i čym praściejšym.

Mahčyma, mahli b kitajcy, ale łohika ŭ nabyćci ŭžo nie zusim zrazumiełaja, tamu što razhladać Biełaruś jak płacdarm dla ekspartu ŭ ES užo nie vypadaje.

Kali prydumać niejkuju inšuju pryčynu, pa jakoj im zachočacca kupić, to vialikaj čarhi z kupcoŭ nie budzie.

Tamu, kali nam zakarcić pradać zavod, my sami budziem biehać pa patencyjnych pakupnikach, jakija, bačačy situacyju, buduć vybivać dvuchznačnyja dyskonty. To-bok prybytak naš u biełaruskich rublach raście, a cana kampanii ŭ valucie padaje. 

Tamu pakul jašče možam pracavać, to pracujem i hladzim, što budzie dalej», — skazaŭ pradstaŭnik technałahičnaha biznesu. 

Toje samaje kaža staršy navukovy supracoŭnik ekanamičnaha centra BEROC Źmicier Kruk.

«Cana biełaruskich kampanij mocna źniziłasia, pa-pieršaje, z-za kardynalnaha padvyšeńnia krainavaj i imidžavaj ryzyki.

Mała chto ź biznesmienaŭ, uśviedamlajučy hetuju ryzyku, u ćviarozym stanie zadumajecca ab nabyćci biznesu ŭ Biełarusi (kali tolki jon niejak nie ŭbudavany ŭ roznyja schiemy i damovy).

Pa-druhoje, na hetym fonie ŭzmacniłasia śpiecyfičnaja ryzyka: dla šmat jakoha biznesu aktualnaj moža być, naprykład, prablema niedasiažnaści technałohij ci niazdolnaść znajści patrebnych śpiecyjalistaŭ z-za mihracyi. 

Dla šmat jakich kampanij na fonie vajny i sankcyj pamienšaŭ i sam prybytak ci staŭ mienš ustojlivym.

Heta źnižaje ŭžo bazu, ad jakoj buduć «skakać» u acency kampanii.

Možna i pastavić pytańnie: a ci jość ciapier naohuł niejki bazis dla taho, kab havaryć pra narmalny rynkavy miechanizm acenki? Da sankcyj i vajny možna było abapiracca na multyplikatary prybytkaŭ, ale ciapier za košt sukupnaści prablem takaja acenka ŭžo nie pracuje. 

U apisanaj situacyi na pieršy płan vychodziać śpiecyfičnyja rečy: niejkija nou-chau asobnaj kampanii, jaje ŭbudavanaść u biełaruskuju śpiecyfiku, asabistaje staŭleńnie i acenka kupcom ryzyki i pierśpiektyŭ», — kaža ekanamist.

Čytajcie taksama:

Try kampanii ź biełaruskim kapitałam uvajšli ŭ top-20 najbujniejšych biznesaŭ Daŭhaŭpiłsa

Čamu ŭ Pieciarburhu masava harać novyja aŭtobusy MAZ? Nastupstvy sankcyj

«Štadler Minsk» admoviŭsia pastaŭlać ciahniki dla staličnaha mietro

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?